ന്യൂഡൽഹി: രാജ്യത്തുടനീളം 138 അധിക ട്രെയിൻ സർവീസുകളുമായി ഇന്ത്യൻ റെയിൽവേ. ക്രിസ്മസ്, പുതുവത്സര ആഘോഷങ്ങളോടനുബന്ധിച്ചുള്ള യാത്രക്കാരുടെ വൻ തിരക്ക് പരിഗണിച്ചാണ് ഇന്ത്യൻ റെയിൽവേ ഈ തീരുമാനമെടുത്തിരിക്കുന്നത്. ഉത്സവകാലത്ത് നാട്ടിലേക്ക് മടങ്ങുന്നവർക്കും വിനോദസഞ്ചാരികൾക്കുമായി അടുത്ത ഒരു മാസക്കാലയളവിൽ ആകെ 650 ട്രിപ്പുകളാണ് ഈ ട്രെയിനുകൾ പൂർത്തിയാക്കുക. സാധാരണ ട്രെയിനുകളിലെ വൻ തിരക്ക് കുറയ്ക്കാനും യാത്രക്കാർക്ക് എളുപ്പത്തിൽ ടിക്കറ്റ് ലഭ്യമാക്കാനുമാണ് റെയിൽവേ മന്ത്രാലയം ഈ അധിക സർവീസുകൾ ഏർപ്പെടുത്തിയിരിക്കുന്നത്. അനുവദിച്ച 650 സർവീസുകളിൽ 244 എണ്ണം ഇതിനോടകം സർവീസ് ആരംഭിച്ചു കഴിഞ്ഞു. വരും ദിവസങ്ങളിൽ കൂടുതൽ ട്രെയിനുകൾ ടിക്കറ്റ് ബുക്കിംഗിനായി ലഭ്യമാകും.
ഏറ്റവും കൂടുതൽ യാത്രക്കാരുടെ തിരക്ക് അനുഭവപ്പെടുന്ന പശ്ചിമ റെയിൽവേ മേഖലയിലാണ് കൂടുതൽ ട്രെയിനുകൾ അനുവദിച്ചിരിക്കുന്നത്. പശ്ചിമ റെയിൽവേയിൽ നിന്നായി 26 പ്രത്യേക ട്രെയിനുകൾ 226 ട്രിപ്പുകൾ നടത്തും. മുംബൈ, ഗുജറാത്ത് തുടങ്ങിയ ഇടങ്ങളിൽ നിന്നുള്ള യാത്രക്കാർക്ക് ഇത് വലിയ ആശ്വാസമാകും. സെൻട്രൽ റെയിൽവേ 18 പ്രത്യേക ട്രെയിനുകളിലായി 118 ട്രിപ്പുകൾ പൂർത്തിയാക്കും. മുംബൈ, പുണെ, നാഗ്പൂർ എന്നീ നഗരങ്ങളെ ബന്ധിപ്പിച്ചാണ് ഈ സർവീസുകൾ ക്രമീകരിച്ചിരിക്കുന്നത്.
സ്ലീപ്പർ, ജനറൽ, എസി കോച്ചുകൾ ഉൾപ്പെടുത്തിയാണ് പ്രത്യേക ട്രെയിനുകൾ രൂപകൽപ്പന ചെയ്തിരിക്കുന്നത്. തിരക്കേറിയ റൂട്ടുകളിൽ പരമാവധി പ്രയോജനം ലഭിക്കുന്ന രീതിയിലാണ് സമയക്രമീകരണവും സ്റ്റോപ്പുകളും നിശ്ചയിച്ചിട്ടുള്ളത്. യാത്രക്കാരുടെ എണ്ണം വർദ്ധിക്കുന്നതിനനുസരിച്ച് കൂടുതൽ സർവീസുകൾ വരും ആഴ്ചകളിൽ പ്രഖ്യാപിക്കുമെന്നും റെയിൽവേ ഉദ്യോഗസ്ഥർ വ്യക്തമാക്കി.
യാത്രക്കാർക്ക് റെയിൽവേയുടെ ഔദ്യോഗിക വെബ്സൈറ്റ് വഴിയും കൗണ്ടറുകൾ വഴിയും ടിക്കറ്റുകൾ മുൻകൂട്ടി ബുക്ക് ചെയ്യാവുന്നതാണ്. ഉത്സവ സീസണിലെ സുരക്ഷിതവും സുഗമവുമായ യാത്ര ഉറപ്പാക്കാൻ റെയിൽവേയുടെ മൊബൈൽ ആപ്പ് വഴി ട്രെയിൻ വിവരങ്ങൾ പരിശോധിക്കണമെന്ന് അധികൃതർ അഭ്യർത്ഥിച്ചു. സുരക്ഷയ്ക്കായി കൂടുതൽ ഉദ്യോഗസ്ഥരെയും സഹായത്തിനായി പ്രത്യേക ഡെസ്കുകളെയും പ്രധാന സ്റ്റേഷനുകളിൽ റെയിൽവേ ഏർപ്പെടുത്തിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Christmas-New Year gift! Indian Railways announces 138 special trains
