ഒന്റാരിയോ: ട്രാഫിക് പരിശോധനയ്ക്കിടെ പോലീസ് ഉദ്യോഗസ്ഥനെ കാറിടിച്ച് വീഴ്ത്തി രക്ഷപ്പെടാൻ ശ്രമിച്ച കേസിൽ പഞ്ചാബി വിദ്യാർത്ഥി കുറ്റം സമ്മതിച്ചു. പഞ്ചാബിൽ നിന്നുള്ള 21-കാരനായ സാഹബ്ജോത് സിംഗ് ആണ് നോർത്ത് ബേ കോടതിയിൽ കുറ്റം സമ്മതിച്ചത്. ഇയാൾക്കെതിരെയുണ്ടായിരുന്ന കൊലപാതക ശ്രമം ഉൾപ്പെടെയുള്ള കുറ്റങ്ങൾ ഒഴിവാക്കിയിരുന്നു.
കഴിഞ്ഞ വർഷം മെയ് 31-നാണ് കേസിനാസ്പദമായ സംഭവം നടന്നത്. മോഷ്ടിച്ച വാഹനം ഓടിക്കുന്നതിനിടെയാണ് ഇയാളെ പോലീസ് തടയാൻ ശ്രമിച്ചത്. എന്നാൽ സാഹബ്ജോത് സിംഗ് ഉദ്യോഗസ്ഥനെ ഇടിച്ച ശേഷം രക്ഷപ്പെടാൻ ശ്രമിക്കുകയായിരുന്നു.
പോലീസ് നൽകിയ വിവരങ്ങൾ അനുസരിച്ച്, വാഹനം പാർക്കിങ് സ്ഥലത്ത് ഉപേക്ഷിച്ച ശേഷം ഇയാൾ ഉദ്യോഗസ്ഥർക്ക് തെറ്റായ വിവരങ്ങൾ നൽകി. തുടർന്ന് ഉദ്യോഗസ്ഥനെ ഇടിച്ചിട്ട് രക്ഷപ്പെടാൻ ശ്രമിച്ചു. പോലീസ് ഉദ്യോഗസ്ഥൻ വാഹനങ്ങൾക്കിടയിൽ കുടുങ്ങിയെങ്കിലും പിന്നീട് രക്ഷപ്പെട്ടു. തുടർന്ന് പോലീസ് ക്രൂയിസറിലും മറ്റൊരു വാഹനത്തിലും ഇടിച്ച ശേഷം ഇയാൾ വീണ്ടും രക്ഷപ്പെട്ടു. പിന്നീട് നടത്തിയ അന്വേഷണത്തിൽ ഇയാളെ പോലീസ് പിടികൂടി. മയക്കുമരുന്ന് ഉപയോഗിച്ചാണ് ഇയാൾ വാഹനം ഓടിച്ചതെന്ന് പോലീസ് കണ്ടെത്തി.
സംഭവത്തിൽ പോലീസ് ഉദ്യോഗസ്ഥന് ചെറിയ പരിക്കുകൾ മാത്രമേ ഉണ്ടായിരുന്നുള്ളൂ. ആദ്യം 19 കുറ്റങ്ങളാണ് ഇയാൾക്കെതിരെ ചുമത്തിയിരുന്നത്. എന്നാൽ പിന്നീട് കൊലപാതക ശ്രമം ഉൾപ്പെടെയുള്ള ചില കുറ്റങ്ങൾ ഒഴിവാക്കി. ഒക്ടോബർ 24-ന് കോടതി ശിക്ഷ വിധിക്കും.
സാഹബ്ജോത് സിംഗിന്റെ കുടുംബവും ഗുരുദ്വാരയും കോടതിയിൽ ദയ ആവശ്യപ്പെട്ട് കത്ത് നൽകിയിരുന്നു. പഠനത്തിനായി കാനഡയിലെത്തിയ ഇയാൾ മോശം കൂട്ടുകെട്ടിൽ പെട്ട് മയക്കുമരുന്നിന് അടിമയായി പോവുകയായിരുന്നുവെന്ന് കത്തിൽ പറയുന്നു. പഠനത്തിനായി കുടുംബം സമ്പാദ്യം മുഴുവൻ വിറ്റെന്നും അവർ കോടതിയെ അറിയിച്ചു.
Student from Punjab pleads guilty to ramming police officer in Canada
