സമൂഹ മാധ്യമങ്ങളിൽ വലിയ ചർച്ചകൾക്ക് വഴി തുറന്ന ഒരു വീഡിയോയാണ് ഇപ്പോൾ വൈറലായിക്കൊണ്ടിരിക്കുന്നത്. 30 വർഷം യുകെയിൽ ജോലി ചെയ്ത ഒരാളെ നാടുകടത്തുന്നു എന്ന പേരിൽ പ്രചരിക്കുന്ന വീഡിയോ വലിയ സംശയങ്ങളാണ് ആളുകളിൽ ഉണ്ടാക്കിയിരിക്കുന്നത്. ടിക്ടോക്കിലും ഇൻസ്റ്റഗ്രാമിലുമായി ആയിരക്കണക്കിന് ആളുകളാണ് ഈ വീഡിയോ കണ്ടിരിക്കുന്നത്.
പഞ്ചാബി സംസാരിക്കുന്ന ഒരു ഇന്ത്യക്കാരനെ വിമാനത്താവളത്തിൽ യാത്രയാക്കാൻ സുഹൃത്തുക്കൾ എത്തുന്നതാണ് വീഡിയോയുടെ ഉള്ളടക്കം. യുബി1യുബി2 എന്ന ഇൻസ്റ്റാഗ്രാം അക്കൗണ്ടിൽ പങ്കുവെച്ച ഈ വീഡിയോയുടെ അടിക്കുറിപ്പ്, ’30 വർഷത്തിന് ശേഷം യുകെയിൽ നിന്നും നാടുകടത്തുന്നു’ എന്നായിരുന്നു. ദീപ രംഗര വാല എന്ന ഉപയോക്താവാണ് ആദ്യം ടിക് ടോക്കിൽ ഇത് പങ്കുവെച്ചത്.
വീഡിയോയിലെ സംഭാഷണങ്ങൾ പ്രകാരം, 30 വർഷമായി ഇംഗ്ലണ്ടിൽ താമസിക്കുന്ന ഈ വ്യക്തിക്ക് അവിടെ തുടരാൻ നിയമപരമായ രേഖകളൊന്നും ഉണ്ടായിരുന്നില്ല. അതുകൊണ്ടാണ് അദ്ദേഹത്തെ നാടുകടത്തുന്നത്. 30 വർഷം യുകെയിൽ ജോലി ചെയ്ത് കുടുംബത്തെ അവിടെ സ്ഥിരതാമസമാക്കിയ ശേഷമാണ് ഈ നാടുകടത്തലെന്നും വീഡിയോയിൽ പറയുന്നു. അദ്ദേഹത്തോടൊപ്പം ചെലവഴിക്കുന്ന അവസാന നിമിഷങ്ങളാണിതെന്നും സുഹൃത്തുക്കൾ പറയുന്നു.
ഈ വീഡിയോ പലതരത്തിലുള്ള പ്രതികരണങ്ങൾക്കാണ് വഴി വെച്ചത്. ഇത് സത്യമാണോ എന്ന് പലരും സംശയം പ്രകടിപ്പിച്ചപ്പോൾ, മറ്റു ചിലർ സഹതാപം അറിയിച്ചു. എന്നാൽ 33 വർഷം യുകെയിൽ കഴിഞ്ഞ ഒരാളെ ക്രിമിനൽ പശ്ചാത്തലമില്ലെങ്കിൽ നാടുകടത്തില്ലെന്ന് ചിലർ വാദിച്ചു.
വീഡിയോയിൽ പറയുന്നത് പോലെ ഒരാൾക്ക് നിയമപരമായ രേഖകളില്ലാതെ 30 വർഷം യുകെയിൽ തുടരാനാകുമോ എന്ന സംശയവും ഉയർന്നു വന്നിട്ടുണ്ട്. ഈ വിഷയത്തിൽ യുകെ സർക്കാരിന്റെ ഭാഗത്തുനിന്നോ ഔദ്യോഗിക വൃത്തങ്ങളിൽ നിന്നോ ഒരു സ്ഥിരീകരണവും ഇതുവരെ ഉണ്ടായിട്ടില്ല. ഈ വീഡിയോയുടെ സത്യാവസ്ഥ ഇപ്പോഴും ഒരു ചോദ്യചിഹ്നമായി തുടരുകയാണ്.
Indian man deported from UK after 30 years, farewell goes viral on social media
