പഹൽഗാമിലെ ഭീകരാക്രമണത്തിന്റെ പശ്ചാത്തലത്തിൽ ഇന്ത്യയും പാകിസ്താനും തമ്മിലുള്ള സംഘർഷം രൂക്ഷമാകുന്ന സാഹചര്യത്തിൽ, ഇരു രാജ്യങ്ങളോടും സംയമനം പാലിക്കാനും നയതന്ത്ര ചർച്ചകളിലൂടെ പ്രശ്ന പരിഹാരം കാണാനും അഭ്യർത്ഥന ചെയ്ത് G7 രാജ്യങ്ങൾ രംഗത്തെത്തിയിരിക്കുകയാണ്. കാനഡ, ജർമനി, ഇറ്റലി, ഫ്രാൻസ്, ജപ്പാൻ, യുണൈറ്റഡ് കിംഗ്ഡം, അമേരിക്ക എന്നീ രാജ്യങ്ങളുടെ വിദേശകാര്യ മന്ത്രിമാരും, യൂറോപ്യൻ യൂണിയൻ പ്രതിനിധിയും ചേർന്ന് പുറപ്പെടുവിച്ച ഔദ്യോഗിക പ്രസ്താവനയിൽ, പഹൽഗാമിലെ ഭീകരാക്രമണത്തെ അപലപിക്കുകയും ഇരു രാജ്യങ്ങളോടും അടിയന്തിരമായി സൈനിക നടപടികൾ അവസാനിപ്പിക്കണമെന്ന് ആവശ്യപ്പെടുകയും ചെയ്തു.
“ഇനിയും സൈനിക നടപടി തുടരുകയാണെങ്കിൽ, അതു പ്രദേശത്തിലെ സമാധാനത്തിന് ഭീഷണിയായി മാറും. ഇരു രാജ്യങ്ങളിലെയും സാധാരണക്കാരുടെ സുരക്ഷയെപ്പറ്റി ഞങ്ങൾ ആശങ്കയിലാണ്.” എന്ന് G7 രാജ്യങ്ങളുടെ പ്രസ്താവനയിൽ പറയുന്നു. സ്ഥിതിഗതികൾ നിരന്തരം നിരീക്ഷിക്കുന്നുണ്ടെന്നും, നയതന്ത്ര പരിഹാരത്തിനായുള്ള എല്ലാ ശ്രമങ്ങൾക്കും തങ്ങൾ പിന്തുണ നൽകുമെന്നും അവർ വ്യക്തമാക്കി. ഇരു രാജ്യങ്ങളും എത്രയും പെട്ടെന്ന് ചർച്ചകളിലൂടെ പ്രശ്ന പരിഹാരം കാണണമെന്നാണ് G7 രാജ്യങ്ങളുടെ നിലപാട്.
അതിനിടെ പാകിസ്താൻ നിരന്തരം സാധാരണക്കാരെ ലക്ഷ്യമിട്ടുള്ള ആക്രമണങ്ങൾ തുടരുകയാണെന്ന് ഇന്ത്യൻ കേന്ദ്ര സർക്കാർ അറിയിച്ചു. രാജ്യത്തിന്റെ വിവിധ ഭാഗങ്ങളിലായി 26 സ്ഥലങ്ങളിൽ പാക് ഡ്രോണുകൾ കണ്ടെത്തിയതായി സർക്കാർ വൃത്തങ്ങൾ സ്ഥിരീകരിച്ചു. എന്നാൽ ജനങ്ങൾ ആശങ്കപ്പെടേണ്ട സാഹചര്യമില്ലെന്നും സ്ഥിതിഗതികൾ നിരീക്ഷിച്ചു വരുന്നുണ്ടെന്നും കേന്ദ്ര സർക്കാർ വ്യക്തമാക്കി. ആഭ്യന്തര സുരക്ഷാ സേനകൾ ജാഗ്രത പുലർത്തുന്നുണ്ടെന്നും അധികൃതർ അറിയിച്ചു.
G7 രാജ്യങ്ങളുടെ ഇടപെടൽ അന്താരാഷ്ട്ര രാഷ്ട്രീയ നീക്കങ്ങളുടെ ഭാഗമായി കാണുന്നുണ്ടെങ്കിലും, ഇരു രാജ്യങ്ങളും തമ്മിലുള്ള സംഘർഷം വർദ്ധിക്കുന്നത് ദക്ഷിണേഷ്യൻ മേഖലയിലെ സമാധാനത്തിനും സ്ഥിരതയ്ക്കും വലിയ വെല്ലുവിളിയാണ് ഉയർത്തുന്നത്. 1947ൽ രാജ്യ വിഭജനം മുതൽ ഇരു രാജ്യങ്ങളും തമ്മിൽ നിരവധി യുദ്ധങ്ങളും സംഘർഷങ്ങളും ഉണ്ടായിട്ടുണ്ട്. കശ്മീർ വിഷയം ഉൾപ്പെടെയുള്ള തർക്ക വിഷയങ്ങൾ ഇപ്പോഴും പരിഹരിക്കപ്പെടാതെ തുടരുകയാണ്.
