ബോയിലർ തകരാർ, പൊട്ടിത്തെറി ഭീഷണി; ജനപ്രിയ സ്റ്റീം ക്ലീനർ മോഡലുകൾക്ക് കാനഡയിൽ വിലക്ക്: ഉടൻ ഉപയോഗം നിർത്താൻ നിർദ്ദേശം

ഒട്ടാവ: പ്രമുഖ ഗാർഹിക ഉപകരണ നിർമ്മാതാക്കളായ ഡുപ്രേയുടെ (Dupray) ജനപ്രിയ സ്റ്റീം ക്ലീനർ മോഡലുകൾ വിപണിയിൽ നിന്ന് തിരിച്ചുവിളിക്കുന്നു. ഉപയോഗിക്കുന്നവർക്ക് കടുത്ത പൊള്ളലേൽക്കാനും ഉപകരണം പൊട്ടിത്തെറിക്കാനും സാധ്യതയുണ്ടെന്ന് കണ്ടെത്തിയതിനെത്തുടർന്ന് ഹെൽത്ത് കാനഡയാണ് രാജ്യവ്യാപകമായി ജാഗ്രതാ നിർദ്ദേശം പുറപ്പെടുവിച്ചത്. വീടിന്റെ വിവിധ ഭാഗങ്ങൾ വൃത്തിയാക്കാൻ ഉപയോഗിക്കുന്ന ‘ഡുപ്രേ നീറ്റ് സ്റ്റീം ക്ലീനർ’ (Dupray Neat Steam Cleaner) എന്ന മോഡലാണ് സുരക്ഷാ കാരണങ്ങളാൽ പിൻവലിക്കുന്നത്.

കാനഡയിൽ മാത്രം ഏകദേശം 97,000 യൂണിറ്റുകളും അമേരിക്കയിൽ ആറര ലക്ഷത്തോളം യൂണിറ്റുകളും വിറ്റഴിക്കപ്പെട്ട ഉൽപ്പന്നമാണിത്. ഉപകരണത്തിന്റെ ബോയിലർ അമിതമായി നിറയുകയോ നശിക്കുകയോ ചെയ്യുന്ന സാഹചര്യത്തിൽ പ്രഷർ റിലീസ് വാൽവ് (ബോയിലർ ക്യാപ്) ശരിയായി പ്രവർത്തിക്കാത്തതാണ് അപകടത്തിന് കാരണമാകുന്നത്. ഇത്തരത്തിൽ വാൽവ് തകരാറിലായാൽ ബോയിലർ പൊട്ടിത്തെറിക്കാനുള്ള സാധ്യതയുണ്ടെന്ന് ഹെൽത്ത് കാനഡ വ്യക്തമാക്കി. ഇതിനോടകം തന്നെ കാനഡയിലും അമേരിക്കയിലുമായി ബോയിലർ പൊട്ടിത്തെറിച്ച 15 സംഭവങ്ങൾ റിപ്പോർട്ട് ചെയ്തിട്ടുണ്ട്. ഇതിൽ നിസ്സാരമായ പൊള്ളൽ, മുറിവുകൾ, എല്ലിന് ഏൽക്കുന്ന ക്ഷതങ്ങൾ എന്നിവ ഉൾപ്പെടെ നാല് പേർക്ക് പരിക്കേൽക്കുകയും വീട്ടുപകരണങ്ങൾക്ക് നാശനഷ്ടങ്ങൾ സംഭവിക്കുകയും ചെയ്തിട്ടുണ്ട്.

DUP020WNA എന്ന മോഡൽ നമ്പറിലുള്ള സ്റ്റീം ക്ലീനറുകൾക്കാണ് നിലവിൽ നിയന്ത്രണം ഏർപ്പെടുത്തിയിരിക്കുന്നത്. ഉൽപ്പന്നത്തിന്റെ അടിഭാഗത്തുള്ള സ്റ്റിക്കറിൽ ബാച്ച്/തിയതി (Batch/Date) രേഖപ്പെടുത്തിയിട്ടുണ്ടാകും. ഇതിൽ 0118-01 മുതൽ 0425-05 വരെയുള്ള നമ്പറുകളുള്ള ഉപകരണങ്ങളാണ് തിരിച്ചുവിളിച്ചവയുടെ പട്ടികയിലുള്ളത്. അതേസമയം, 0525-XX എന്ന നമ്പറിൽ തുടങ്ങുന്ന പുതിയ ബാച്ചുകൾക്ക് സുരക്ഷാ പ്രശ്നങ്ങളില്ലെന്നും കമ്പനി അറിയിച്ചിട്ടുണ്ട്. 2018 ഏപ്രിൽ മുതൽ 2025 ഡിസംബർ വരെയുള്ള കാലയളവിൽ വിറ്റഴിക്കപ്പെട്ട ഉൽപ്പന്നങ്ങളെയാണ് ഈ തകരാർ ബാധിച്ചിരിക്കുന്നത്.

തിരിച്ചുവിളിച്ച പട്ടികയിലുള്ള സ്റ്റീം ക്ലീനറുകൾ കൈവശമുള്ളവർ അവയുടെ ഉപയോഗം ഉടൻ തന്നെ നിർത്തിവെക്കണമെന്ന് അധികൃതർ നിർദ്ദേശിച്ചു. തകരാർ പരിഹരിക്കുന്നതിനായി കമ്പനി സൗജന്യമായി പുതിയ ‘ബോയിലർ ക്യാപ്’ നൽകുന്നതാണ്. ഉപഭോക്താക്കൾക്ക് recall@dupray.com എന്ന ഇമെയിൽ വഴിയോ ഡുപ്രേയുടെ ഔദ്യോഗിക വെബ്സൈറ്റ് വഴിയോ ബന്ധപ്പെട്ട് പുതിയ പാർട്ടിനായി അപേക്ഷിക്കാവുന്നതാണ്. ഗാർഹിക സുരക്ഷ മുൻനിർത്തി അമേരിക്കൻ കൺസ്യൂമർ പ്രോഡക്റ്റ് സേഫ്റ്റി കമ്മീഷനുമായി (CPSC) ചേർന്നാണ് കമ്പനി ഈ സുരക്ഷാ നടപടികൾ സ്വീകരിക്കുന്നത്.

immediately-stop-using-health-canada-announces-canada-wide-recall-for-steam-cleaner-citing-a-burn-hazard

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt