കാനഡയിൽ തങ്ങളുടെ ജനപ്രിയ എസ്യുവി മോഡലായ ‘പാലിസേഡിന്റെ’ ആയിരക്കണക്കിന് വാഹനങ്ങൾക്ക് സുരക്ഷാ മുന്നറിയിപ്പുമായി പ്രമുഖ വാഹന നിർമാതാക്കളായ ഹ്യുണ്ടായി. അപകടമുണ്ടാകുന്ന സാഹചര്യങ്ങളിൽ യാത്രക്കാരുടെ പരിക്ക് വർധിപ്പിക്കാൻ ഇടയാക്കുന്ന സീറ്റ് ബെൽറ്റ് തകരാറാണ് വാഹനങ്ങളിൽ കണ്ടെത്തിയിരിക്കുന്നത്. വ്യാഴാഴ്ച പുതുക്കി പുറത്തിറക്കിയ അറിയിപ്പിലാണ് കമ്പനി ഇക്കാര്യം വ്യക്തമാക്കിയത്. കാനഡയിലെ റോഡുകളിലുള്ള ഏകദേശം 4,203 പാലിസേഡ് (2026 മോഡൽ) വാഹനങ്ങളെ ഈ പ്രശ്നം ബാധിച്ചിട്ടുണ്ടെന്നാണ് പ്രാഥമിക കണക്ക്.
വാഹനത്തിന്റെ മൂന്നാം നിരയിൽ ഡ്രൈവർ സൈഡിലുള്ള സീറ്റ് ബെൽറ്റ് ബക്കിളുകളുടെ വയറിങ്ങിലാണ് തകരാർ കണ്ടെത്തിയിട്ടുള്ളതെന്ന് ഹ്യുണ്ടായി അറിയിച്ചു. യാത്രക്കാർ സീറ്റ് ബെൽറ്റ് ബക്കിൾ വലിക്കുമ്പോൾ ഇതിനുള്ളിലെ വയറുകൾക്ക് കേടുപാടുകൾ സംഭവിക്കാൻ സാധ്യതയുണ്ട്. ഇത്തരത്തിൽ വയറിങ് തകരാറിലായാൽ, സീറ്റ് ബെൽറ്റ് ശരിയായി ധരിച്ചിട്ടില്ലെങ്കിലും കൃത്യമായി ധരിച്ചിട്ടുണ്ടെന്ന തെറ്റായ വിവരമായിരിക്കും വാഹനത്തിന്റെ ഡിസ്പ്ലേ പാനലിൽ കാണിക്കുക.
സീറ്റ് ബെൽറ്റ് സ്റ്റാറ്റസ് ഇൻഡിക്കേറ്റർ തെറ്റായ വിവരങ്ങൾ കാണിക്കുന്നത് വലിയ ആശയക്കുഴപ്പത്തിന് ഇടയാക്കുമെന്ന് കമ്പനി വ്യക്തമാക്കുന്നു. സീറ്റ് ബെൽറ്റുകൾ ശരിയായ രീതിയിൽ മുറുക്കാതിരിക്കുന്നത് അപകടസമയങ്ങളിൽ യാത്രക്കാർക്ക് ഗുരുതരമായ പരിക്കുകൾ ഏൽക്കാനുള്ള സാധ്യത വർധിപ്പിക്കും. ഈ സാഹചര്യത്തിലാണ് അടിയന്തര ജാഗ്രതാ നിർദേശവുമായി കമ്പനി രംഗത്തെത്തിയത്.
തകരാർ ബാധിച്ച വാഹനങ്ങളുടെ ഉടമകളെ കമ്പനി നേരിട്ട് എഴുത്തുപൂർവം വിവരമറിയിക്കും. ഇതുകൂടാതെ വാഹന ഉടമകൾക്ക് തങ്ങളുടെ വെഹിക്കിൾ ഐഡന്റിഫിക്കേഷൻ നമ്പർ (VIN) ഉപയോഗിച്ച് ഹ്യുണ്ടായിയുടെ ഔദ്യോഗിക റീകോൾ വെബ്സൈറ്റിലൂടെ വാഹനം ഈ പരിധിയിൽ പെടുമോ എന്ന് പരിശോധിക്കാവുന്നതാണ്. തകരാർ കണ്ടെത്തുന്ന വാഹനങ്ങൾ കമ്പനിയുടെ ഡീലർഷിപ്പുകളിൽ എത്തിച്ച് സൗജന്യമായി പരിഹരിച്ചു നൽകാനാണ് തീരുമാനം.
ഹ്യുണ്ടായി പാലിസേഡ് മോഡലുകൾ അടുത്തിടെ നേരിടുന്ന ആദ്യ സുരക്ഷാ പ്രശ്നമല്ല ഇത്. കഴിഞ്ഞ മാർച്ച് മാസത്തിൽ ഇതേ മോഡലിന്റെ രണ്ടും മൂന്നും നിരകളിലെ സീറ്റുകളുമായി ബന്ധപ്പെട്ട മറ്റൊരു പ്രശ്നത്തെ തുടർന്ന് അമേരിക്കയിലും കാനഡയിലുമായി 69,000-ത്തിലധികം വാഹനങ്ങൾക്ക് മുന്നറിയിപ്പ് നൽകിയിരുന്നു.
ഒഹായോയിൽ സീറ്റ് തകരാറുമൂലം രണ്ട് വയസ്സുള്ള കുട്ടി മരിച്ചതിനെ തുടർന്നാണ് ഈ നടപടിയെന്ന് വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്തിരുന്നു. ഇതിനു പിന്നാലെ പാലിസേഡിന്റെ ‘ലിമിറ്റഡ്’, ‘കാലിഗ്രാഫി’ എന്നീ വേരിയന്റുകളുടെ വിൽപന ഹ്യുണ്ടായി നിർത്തിവെക്കുകയും ചെയ്തിരുന്നു. ഈ വർഷം ജനുവരിയിലും എയർബാഗ് വിന്യാസവുമായി ബന്ധപ്പെട്ട പ്രശ്നത്തെ തുടർന്ന് 2020 മുതൽ 2025 വരെയുള്ള ആറ് ലക്ഷത്തോളം പാലിസേഡ് എസ്യുവികൾ കമ്പനി തിരിച്ചുവിളിച്ചിരുന്നു.
Hyundai to recall nearly 5,000 Palisade vehicles over seat belt defect
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
