ഭക്ഷ്യവസ്തുക്കളുടെ വില വർധനവിൽ വലയുന്ന കനേഡിയൻ കുടുംബങ്ങൾക്ക് ആശ്വാസമായി കാനഡ ഗ്രോസറി കാർഡ് പദ്ധതിക്ക് തുടക്കമാവുന്നു. 2025 സെപ്റ്റംബർ 15 മുതൽ പ്രാബല്യത്തിൽ വരുന്ന പദ്ധതി വഴി കുറഞ്ഞ വരുമാനമുള്ള കുടുംബങ്ങൾക്ക് പ്രതിമാസം $250 വരെ ലഭിക്കും. കനേഡിയൻ ഫെഡറൽ ഗവൺമെന്റ് പ്രഖ്യാപിച്ച ഈ പദ്ധതിക്ക് രണ്ട് വർഷത്തേക്ക് $1.2 ബില്യൺ ആണ് നിശ്ചയിച്ചിരിക്കുന്നത്.
വീട്ടിലെ അംഗസംഖ്യയുടെയും വരുമാനത്തിൻ്റെയും അടിസ്ഥാനത്തിൽ $100 മുതൽ $250 വരെ തുക റീലോഡ് ചെയ്യാൻ സാധിക്കുന്ന പ്രീപെയ്ഡ് ഗ്രോസറി കാർഡുകളാണ് പദ്ധതിയിലൂടെ ലഭ്യമാവുക. വാൾമാർട്ട്, ലോബ്ലാസ്, മെട്രോ, സോബീസ് തുടങ്ങിയ വലിയ സൂപ്പർമാർക്കറ്റുകളിൽ ഈ കാർഡ് ഉപയോഗിക്കാം. ഭക്ഷണം വാങ്ങാൻ മാത്രമായിരിക്കും കാർഡ് ഉപയോഗിക്കാൻ സാധിക്കുക. പണമായി പിൻവലിക്കാൻ സാധിക്കില്ല.
2024-ലെ ടാക്സ് റിട്ടേൺ വിവരങ്ങൾ ഉപയോഗിച്ചാണ് കാനഡ റെവന്യൂ ഏജൻസി (CRA) അർഹരായവരെ കണ്ടെത്തുക. കുറഞ്ഞ വരുമാനമുള്ള കനേഡിയൻ പൗരന്മാർക്കും സ്ഥിര താമസക്കാർക്കും പദ്ധതിയുടെ പ്രയോജനം ലഭിക്കും. കൂടാതെ, ചൈൽഡ് ബെനഫിറ്റ്, ജിഎസ്ടി/എച്ച്എസ്ടി ക്രെഡിറ്റ് തുടങ്ങിയ മറ്റ് ഫെഡറൽ ആനുകൂല്യങ്ങൾ ലഭിക്കുന്നവർക്കും മുൻഗണനയുണ്ടാവും.
ഒരാളടങ്ങിയ കുടുംബത്തിന് $22,000-ൽ താഴെ വരുമാനം ഉണ്ടെങ്കിൽ പ്രതിമാസം $100 ലഭിക്കും. നാലോ അതിലധികമോ അംഗങ്ങളുള്ളതും $46,000-ൽ താഴെ വരുമാനവുമുള്ള കുടുംബങ്ങൾക്ക് പ്രതിമാസം $250 ലഭിക്കും. പഴങ്ങൾ, പച്ചക്കറികൾ, പാൽ ഉൽപ്പന്നങ്ങൾ, മാംസം, ശിശുക്കൾക്കുള്ള ഭക്ഷണം, മറ്റ് ഭക്ഷ്യവസ്തുക്കൾ എന്നിവ ഈ കാർഡ് ഉപയോഗിച്ച് വാങ്ങാം. അതേസമയം മദ്യം, പുകയില ഉൽപ്പന്നങ്ങൾ, റെസ്റ്റോറന്റുകളിലെ ഭക്ഷണം, ടോയ്ലറ്ററികൾ, ക്ലീനിംഗ് ഉൽപ്പന്നങ്ങൾ തുടങ്ങിയവ വാങ്ങാൻ കഴിയില്ല.
ഉയർന്ന തോതിൽ ഭക്ഷ്യ ദൗർലഭ്യം നേരിടുന്ന ഒന്റാരിയോ, നോവാ സ്കോഷ്യ, ന്യൂഫൗണ്ട്ലാൻഡ് തുടങ്ങിയ പ്രവിശ്യകളിലായിരിക്കും പദ്ധതിയുടെ ആദ്യ ഘട്ടം ആരംഭിക്കുക. 2026-ഓടെ കാനഡയിലുടനീളം പദ്ധതി വ്യാപിപ്പിക്കാനാണ് സർക്കാർ ലക്ഷ്യമിടുന്നത്.
ഈ പദ്ധതി ഭക്ഷ്യ ബാങ്കുകളിലുള്ള ആശ്രിതത്വം കുറക്കാനും ആരോഗ്യകരമായ ഭക്ഷണക്രമം പ്രോത്സാഹിപ്പിക്കാനും ലക്ഷ്യമിടുന്നതായി അധികൃതർ അറിയിച്ചു. അർഹരായ കുടുംബങ്ങൾ 2024-ലെ ടാക്സ് റിട്ടേണുകൾ ഫയൽ ചെയ്യുകയും സിആർഎ പ്രൊഫൈൽ അപ്ഡേറ്റ് ചെയ്യുകയും ചെയ്യണമെന്ന് അധികൃതർ ഓർമ്മിപ്പിച്ചു. വിശപ്പ് കുറയ്ക്കുന്നതിനും ദുർബല കുടുംബങ്ങളെ ശാക്തീകരിക്കുന്നതിനും ഈ പദ്ധതി വലിയ പങ്കുവഹിക്കുമെന്നാണ് വിലയിരുത്തൽ.
