വിന്നിപെഗ്: വിന്നിപെഗിലെ മാപ്പിൾസിൽ ഇന്ത്യക്കാരന്റെ ഉടമസ്ഥതയിലുള്ള ജ്വല്ലറിയിൽ വൻ കവർച്ച. ഒക്ടോബർ 9-ന് രാത്രി സ്വന്തം വീട്ടിൽ പ്രവർത്തിച്ചിരുന്ന ജ്വല്ലറി ബിസിനസ്സിൽ അതിക്രമിച്ച് കയറിയ മോഷ്ടാക്കൾ വീട്ടുടമസ്ഥനായ രാജൻ ധല്ലയെ ഏഴ് തവണ വെടിവെച്ചു. കാലിനാണ് ഇദ്ദേഹത്തിന് വെടിയേറ്റത്. തന്റെ ജീവിതത്തിലെ ഏറ്റവും വലിയ വേദനയാണിതെന്നും, ഉറങ്ങാൻ പോലും കഴിയുന്നില്ലെന്നും രാജൻ പറയുന്നു. ഈ ആക്രമണത്തിൽ രാജന്റെ അച്ഛനും വെടിയേറ്റ് ആശുപത്രിയിലാണ്. മോഷ്ടാക്കൾ കൊണ്ടുപോയത് ഏകദേശം $1 മില്യൺ ഡോളർ വിലവരുന്ന സ്വർണ്ണമാണ്.
വീട്ടുടമസ്ഥൻ കവർച്ചക്കാരെ ചെറുക്കാൻ ശ്രമിക്കുന്നതും, കുടുംബാംഗങ്ങളെ ഗാരേജിലേക്ക് മാറ്റുന്നതുമെല്ലാം സി.സി.ടി.വി. ദൃശ്യങ്ങളിൽ വ്യക്തമാണ്. വെടിയേറ്റ് ഗുരുതരാവസ്ഥയിലായ രാജൻ ധല്ല ഇപ്പോൾ ആശുപത്രിയിൽ ചികിത്സയിലാണ്. തുടയെല്ലിന് പൊട്ടലുണ്ടായിരുന്നു, അതിനായി ശസ്ത്രക്രിയയും കഴിഞ്ഞു. വെടിയുണ്ടകൾ ഏതാനും സെന്റിമീറ്റർ വ്യത്യാസത്തിൽ മാത്രം രക്ഷപ്പെട്ടതിനാൽ “ദൈവം ഒരു പുതിയ ജീവിതം നൽകി” എന്നാണ് ഡോക്ടർമാർ പറഞ്ഞതെന്ന് രാജൻ പറയുന്നു. പിറന്നാൾ ആഘോഷത്തിനായി കുടുംബാംഗങ്ങൾ വീട്ടിലുണ്ടായിരുന്ന സമയത്താണ് ഈ ഞെട്ടിക്കുന്ന സംഭവം നടന്നത്. മുഖം മൂടിയ മോഷ്ടാക്കൾ മൂന്ന് മിനിറ്റിനുള്ളിൽ കവർച്ച നടത്തി വാഹനം അതിവേഗം ഓടിച്ചുപോവുകയായിരുന്നു.
കവർച്ചയുടെ ഞെട്ടലിൽ നിന്ന് കുടുംബത്തിന് ഇതുവരെ മോചനം ലഭിച്ചിട്ടില്ല. “ഞങ്ങൾക്കിവിടെ സുരക്ഷിതരായി തോന്നുന്നില്ല,” രാജൻ ധല്ല പറയുന്നു. “ഞങ്ങൾ ഇവിടത്തെ പൗരത്വം നേടി, കഠിനാധ്വാനം ചെയ്തു, പക്ഷെ ജീവിക്കാൻ സുരക്ഷയില്ലെങ്കിൽ പിന്നെന്തിനാണ് ഇവിടെ താമസിക്കുന്നത്?” അദ്ദേഹം ചോദിക്കുന്നു. ഇന്ത്യയിലേക്ക് തിരിച്ചുപോകാൻ ആലോചിക്കുകയാണെന്നും അദ്ദേഹം വെളിപ്പെടുത്തി. നേരത്തെയും തന്റെ ബിസിനസ്സ് ഭീഷണിയിലായിരുന്നു എന്ന് രാജൻ ഓർക്കുന്നു. അന്ന് പോലീസിനെ അറിയിക്കാതിരുന്നത് വലിയൊരു പിഴവായിപ്പോയെന്നും അദ്ദേഹം ഖേദിക്കുന്നു.
സംഭവത്തിൽ വിന്നിപെഗ് പോലീസ് സ്ഥിരീകരണം നൽകിയിട്ടുണ്ട്. ഒക്ടോബർ 9-ന് വൈകുന്നേരം 6:30 ഓടെ നടന്ന കവർച്ചയാണിത്. വെടിയേറ്റ രണ്ടുപേരെ ആശുപത്രിയിൽ പ്രവേശിപ്പിച്ചു. നിലവിൽ, കേസ് പ്രധാന കുറ്റകൃത്യ വിഭാഗം (Major Crimes Unit) അന്വേഷിക്കുകയാണ്. കവർച്ചയുടെ ദൃശ്യങ്ങൾ പോലീസിന് കൈമാറിയിട്ടുണ്ട്. “ശാരീരികമായും മാനസികമായും സാമ്പത്തികമായും ഞങ്ങൾ തകർന്നുപോയി. എനിക്ക് നീതി ലഭിക്കണം,” രാജൻ ധല്ല ആവശ്യപ്പെടുന്നു. ജ്വല്ലറി ബിസിനസ്സ് വീട്ടിൽ നിന്ന് ഒരു കടയിലേക്ക് മാറ്റാനുള്ള ഒരുക്കത്തിലായിരുന്നു അദ്ദേഹം. ഇതിനിടെയാണ് ഈ ദുരനുഭവം.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Indian man's jewelry store robbed in Winnipeg; Huge amount of gold lost, owner shot 7 times
