അറസ്റ്റിന് തൊട്ടുമുമ്പ് എപ്സ്റ്റീന്റെ ‘മൊറോക്കൻ പ്ലാൻ’; പിടിമുറുക്കി ബാങ്കുകൾ, ആഡംബര കൊട്ടാര ഇടപാടിന്റെ ഞെട്ടിക്കുന്ന വിവരങ്ങൾ പുറത്ത്

മാരക്കേഷ്: ലോകത്തെ നടുക്കിയ ലൈംഗികാതിക്രമക്കേസുകളിലെ പ്രതി ജെഫ്രി എപ്സ്റ്റീൻ, തന്റെ അറസ്റ്റിന് തൊട്ടുമുമ്പ് മൊറോക്കോയിൽ വൻതോതിൽ ആസ്തികൾ വാങ്ങിക്കൂട്ടാൻ പദ്ധതിയിട്ടിരുന്നതായി വെളിപ്പെടുത്തൽ. അമേരിക്കയുമായി കുറ്റവാളികളെ കൈമാറാൻ കരാറില്ലാത്ത മൊറോക്കോയിൽ, ഏതാണ്ട് 11.4 ഏക്കറിൽ വ്യാപിച്ചുകിടക്കുന്ന ‘ബിൻ എന്നാഖിൽ’ (Bin Ennakhil) എന്ന ആഡംബര കൊട്ടാരം സ്വന്തമാക്കാനായിരുന്നു എപ്സ്റ്റീന്റെ നീക്കം. യുഎസ് ഡിപ്പാർട്ട്‌മെന്റ് ഓഫ് ജസ്റ്റിസിൽ നിന്നുള്ള പുതിയ രേഖകൾ ഉദ്ധരിച്ച് അൽ ജസീറയാണ് ഈ നിർണായക വിവരങ്ങൾ പുറത്തുവിട്ടത്. 60 മാർബിൾ ജലധാരകളും ആയിരക്കണക്കിന് ഈന്തപ്പനകളും നിറഞ്ഞ ഈ കൊട്ടാരത്തിന് ഏകദേശം 200 കോടിയിലധികം രൂപയായിരുന്നു വില നിശ്ചയിച്ചിരുന്നത്.

2019 ഫെബ്രുവരി മുതൽ തന്നെ ഈ കൊട്ടാരം വാങ്ങുന്നതിനുള്ള ചർച്ചകൾ എപ്സ്റ്റീൻ ആരംഭിച്ചിരുന്നു. നേരിട്ട് ഇടപാട് നടത്തുന്നതിന് പകരം ടാക്സ് വെട്ടിക്കാനായി ലിക്റ്റൻസ്റ്റൈൻ, ബ്രിട്ടീഷ് വെർജിൻ ഐലൻഡ്‌സ് എന്നിവിടങ്ങളിലെ വ്യാജ ട്രസ്റ്റുകൾ വഴിയാണ് പണം കൈമാറാൻ ശ്രമിച്ചത്. എപ്സ്റ്റീന്റെ കാമുകിയെന്ന് പറയപ്പെടുന്ന കരീന ഷുലിയാക്കായിരുന്നു ഈ ഇടപാടുകൾക്ക് പിന്നിൽ പ്രവർത്തിച്ചിരുന്നത്. എന്നാൽ, എപ്സ്റ്റീന്റെ ക്രിമിനൽ പശ്ചാത്തലം പുറത്തുവന്നതോടെ ബാങ്കുകൾ പണമിടപാടുകളിൽ കർശന നിയന്ത്രണം ഏർപ്പെടുത്തി. ഡച്ചെ ബാങ്ക് എപ്സ്റ്റീന്റെ അക്കൗണ്ടുകൾ റദ്ദാക്കിയതോടെ ചാർലസ് ശ്വാബ് എന്ന ബാങ്ക് വഴി പണം കടത്താൻ ശ്രമം നടന്നതായും രേഖകൾ വ്യക്തമാക്കുന്നു.

മൊറോക്കോയുമായുള്ള എപ്സ്റ്റീന്റെ ബന്ധത്തിന് പതിറ്റാണ്ടുകളുടെ പഴക്കമുണ്ടെന്ന സൂചനകളും പുറത്തുവരുന്നുണ്ട്. 2002-ൽ തന്നെ മാരക്കേഷിലെ പെൺകുട്ടികളെ എപ്സ്റ്റീന് പരിചയപ്പെടുത്താൻ ഏജന്റുമാർ സജീവമായിരുന്നുവെന്ന് ഫ്രഞ്ച് മാധ്യമങ്ങൾ റിപ്പോർട്ട് ചെയ്യുന്നു. കൊട്ടാരം വാങ്ങാനുള്ള അവസാനവട്ട ശ്രമത്തിന്റെ ഭാഗമായി 2019 ജൂലൈ 4-ന് എപ്സ്റ്റീൻ ഒപ്പിട്ട തുക കൈമാറാനുള്ള അപേക്ഷ ബാങ്കിന് ലഭിച്ചിരുന്നു. എന്നാൽ, മതിയായ ഫണ്ടില്ലെന്ന കാരണത്താൽ ഈ ഇടപാട് നടന്നില്ല. ഇതിന് കൃത്യം രണ്ട് ദിവസത്തിന് ശേഷമാണ് ന്യൂജേഴ്‌സിയിലെ ടെറ്റർബോറോ വിമാനത്താവളത്തിൽ വെച്ച് എപ്സ്റ്റീൻ ഫെഡറൽ ഏജന്റുമാരുടെ പിടിയിലാകുന്നത്.

അറസ്റ്റിന് ശേഷം 100 മില്യൺ ഡോളറിന്റെ ബോണ്ട് നൽകി പുറത്തിറങ്ങാൻ എപ്സ്റ്റീൻ ശ്രമിച്ചെങ്കിലും കോടതി ജാമ്യം നിഷേധിച്ചു. ആഡംബര കൊട്ടാരങ്ങളിലെ സുഖവാസത്തിന് പകരം മാൻഹാട്ടനിലെ മെട്രോപൊളിറ്റൻ കറക്ഷൻ സെന്ററിലെ ഇടുങ്ങിയ സെല്ലിലായിരുന്നു പിന്നീട് അയാളുടെ ജീവിതം. 2019 ഓഗസ്റ്റിൽ ജയിലിനുള്ളിൽ എപ്സ്റ്റീനെ മരിച്ച നിലയിൽ കണ്ടെത്തുകയായിരുന്നു. എപ്സ്റ്റീന്റെ മരണത്തോടെ ഈ രഹസ്യ ഇടപാടുകൾ അവസാനിച്ചെങ്കിലും, അയാൾ നെയ്ത അന്താരാഷ്ട്ര പെൺവാണിഭ ശൃംഖലയുടെ വ്യാപ്തി എത്രത്തോളമായിരുന്നുവെന്ന് അടിവരയിടുന്നതാണ് ഇപ്പോൾ പുറത്തുവന്ന പുതിയ രേഖകൾ.

how-epstein-tried-to-buy-a-moroccan-palace-months-before-his-death

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt