പ്രിൻസ് എഡ്വേർഡ് ഐലൻഡിൽ കഴിഞ്ഞവർഷം വീട് നിർമ്മാണം റെക്കോർഡ് വേഗതയിൽ മുന്നോട്ട് പോയെങ്കിലും, താങ്ങാനാവുന്ന ഭവനങ്ങൾ ഉറപ്പാക്കാൻ ഇനിയും കൂടുതൽ നിർമ്മാണ പ്രവർത്തനങ്ങൾ വേണമെന്ന് പുതിയ റിപ്പോർട്ടുകൾ സൂചിപ്പിക്കുന്നു.
2024-ൽ ആകെ 1,684 പുതിയ വീടുകളുടെ നിർമ്മാണമാണ് ആരംഭിച്ചത് . ഇത് മുൻവർഷത്തെ അപേക്ഷിച്ച് 48.7 ശതമാനം വർധനവാണ്. 1970-കൾക്ക് ശേഷം ആദ്യമായാണ് ഇത്രയും വലിയൊരു വർധനവ് രേഖപ്പെടുത്തിയത്.
ഭവന നിർമ്മാണ മേഖലയിലെ ഈ മുന്നേറ്റം സ്വാഗതാർഹമാണെങ്കിലും, കാനഡ മോർട്ട്ഗേജ് ആൻഡ് ഹൗസിംഗ് കോർപ്പറേഷൻ (CMHC) പുറത്തിറക്കിയ കണക്കുകൾ പ്രകാരം, ഭവന ലഭ്യത മഹാമാരിക്ക് മുൻപുള്ള നിലയിലേക്ക് തിരിച്ചെത്തിക്കാൻ പ്രതിവർഷം 2,200 പുതിയ വീടുകൾ നിർമ്മിക്കേണ്ടതുണ്ട്. ഇത് 1973-ൽ P.E.I-യിൽ സ്ഥാപിച്ച 2,122 എന്ന എക്കാലത്തെയും റെക്കോർഡിനേക്കാൾ ഉയർന്ന ലക്ഷ്യമാണ്.
ഈ ലക്ഷ്യം കൈവരിക്കുക എന്നത് നിർമ്മാണ മേഖലയ്ക്ക് വലിയ വെല്ലുവിളിയാണെന്ന് കൺസ്ട്രക്ഷൻ അസോസിയേഷൻ ഓഫ് P.E.I. എക്സിക്യൂട്ടീവ് ഡയറക്ടറായ സാം സാൻഡേഴ്സൺ പറയുന്നു. നിലവിൽ 8,500-ൽ അധികം ആളുകൾ ഈ മേഖലയിൽ ജോലി ചെയ്യുന്നുണ്ടെങ്കിലും, നിർമ്മാണരംഗം പൂർണ്ണ ശേഷിയിലാണ് പ്രവർത്തിക്കുന്നത്. അതുകൊണ്ടുതന്നെ ഈ വലിയ ലക്ഷ്യം നേടണമെങ്കിൽ വലിയ നിക്ഷേപങ്ങളും നയപരമായ മാറ്റങ്ങളും ആവശ്യമാണ്.
തൊഴിലാളികളുടെ ക്ഷാമം, പ്രത്യേകിച്ച് വിദഗ്ധരായവരുടെ കുറവ്, ഒരു പ്രധാന വെല്ലുവിളിയാണ്. കൂടാതെ വിരമിക്കൽ കാരണം പരിചയസമ്പന്നരായ തൊഴിലാളികളുടെ എണ്ണം കുറയുന്നത് ഉത്പാദനക്ഷമതയെയും ബാധിക്കുന്നു. ഈ പ്രതിസന്ധികൾ മറികടക്കാൻ പരിശീലന പരിപാടികളിലൂടെയും മറ്റ് സഹായങ്ങളിലൂടെയും കൂടുതൽ തൊഴിലാളികളെ ഈ രംഗത്തേക്ക് കൊണ്ടുവരാനുള്ള ശ്രമങ്ങൾ നടക്കുന്നുണ്ട്.അതേസമയം യുവജനങ്ങളുടെ ഭവന പ്രശ്നങ്ങളിൽ ഇടപെടുന്ന Fusion Charlottetown എന്ന സംഘടന റെക്കോർഡ് ഭവന നിർമ്മാണത്തെ സ്വാഗതം ചെയ്യുന്നു. 2,200 വീടുകൾ എന്ന ലക്ഷ്യം വളരെ വലുതാണെങ്കിലും, ശരിയായ നയങ്ങളും സാമ്പത്തിക പിന്തുണയും ഉണ്ടെങ്കിൽ ഇത് സാധ്യമാണെന്ന് അവർ കരുതുന്നു. നഗരപ്രദേശങ്ങളിൽ അപ്പാർട്ട്മെന്റ് നിർമ്മാണം പ്രോത്സാഹിപ്പിക്കുക, റോഡുകളും മറ്റ് അടിസ്ഥാന സൗകര്യങ്ങളും വികസിപ്പിക്കുന്നതിന് ഫണ്ട് അനുവദിക്കുക, താങ്ങാനാവുന്ന ഭവന പദ്ധതികൾക്ക് നികുതി ഇളവുകൾ നൽകുക തുടങ്ങിയ ശുപാർശകൾ അവർ സർക്കാരിന് നൽകിയിട്ടുണ്ട്.
എന്നാൽ ഭവന നയ വിദഗ്ധനായ സ്റ്റീവ് പോമറോയ് പറയുന്നത്, വെറും നിർമ്മാണങ്ങളുടെ എണ്ണം കൂട്ടുന്നത് കൊണ്ട് മാത്രം താങ്ങാനാവുന്ന ഭവനങ്ങൾ ഉറപ്പാക്കാൻ കഴിയില്ലെന്നാണ്. ഉയർന്ന വരുമാനമുള്ളവർക്കുവേണ്ടിയുള്ള വീടുകളാണ് സാധാരണയായി നിർമ്മിക്കപ്പെടുന്നത്. അതിനാൽ താഴ്ന്ന വരുമാനക്കാർക്ക് ലഭ്യമാകുന്ന വീടുകൾ നിർമ്മിക്കാൻ സർക്കാർ ഇടപെടൽ ആവശ്യമാണ്. ലാഭേച്ഛയില്ലാതെ പ്രവർത്തിക്കുന്ന നോൺ-പ്രോഫിറ്റ്, കോ-ഓപ്പറേറ്റീവ് സംഘടനകളിലൂടെ താങ്ങാനാവുന്ന ഭവന നിർമ്മാണം പ്രോത്സാഹിപ്പിക്കേണ്ടതുണ്ടെന്ന് അദ്ദേഹം ചൂണ്ടിക്കാട്ടുന്നു.ഇത്തരം സാമൂഹിക ഭവന പദ്ധതികളിൽ P.E.I. മികച്ച മുന്നേറ്റം കാഴ്ചവെച്ചിട്ടുണ്ടെന്നും, ഈ മേഖലയിൽ രാജ്യത്ത് ഏറ്റവും ഉയർന്ന റേറ്റിംഗ് നേടിയ സംസ്ഥാനങ്ങളിലൊന്ന് P.E.I. ആണെന്നും ഒരു ദേശീയ റിപ്പോർട്ടിൽ പറയുന്നു.
Housing construction in PEI hits record high, but housing crisis still looms
