ഒട്ടാവയിൽ കാനഡ ഡേ ആഘോഷങ്ങൾ: ഗതാഗത സൗകര്യങ്ങളും വെടിക്കെട്ട് പ്രകടനങ്ങളും
ജൂലൈ 1-ന് കാനഡ ഡേ ആഘോഷങ്ങൾക്കായി ഒട്ടാവ ഒരുങ്ങിക്കഴിഞ്ഞു. രാജ്യതലസ്ഥാനത്ത് വിവിധ പരിപാടികളും വെടിക്കെട്ട് പ്രകടനങ്ങളും ഒരുക്കിയിട്ടുണ്ട്. പൊതുഗതാഗതത്തിന് പ്രത്യേക സൗകര്യങ്ങളും റോഡ് അടച്ചിടലുകളും പ്രഖ്യാപിച്ചിട്ടുണ്ട്. കാനഡ ഡേയിൽ OC ട്രാൻസ്പോ സൗജന്യ സേവനം നൽകും. O-ട്രെയിൻ, ബസുകൾ, പാരാ ട്രാൻസ്പോ എന്നിവയിലെല്ലാം യാത്ര സൗജന്യമാണ്.
O-ട്രെയിൻ ലൈൻ 1 രാവിലെ 6 മുതൽ രാത്രി 2 വരെയും, ലൈൻ 2 ഉം 4 ഉം രാവിലെ 7 മുതൽ രാത്രി 1 വരെയും സർവീസ് നടത്തും. വൈകുന്നേരങ്ങളിൽ ട്രെയിനുകളുടെ എണ്ണം വർദ്ധിപ്പിക്കും. വെടിക്കെട്ട് പ്രകടനങ്ങൾ നടക്കുന്ന സമയത്ത് പിമിസി സ്റ്റേഷനിൽ ട്രെയിനുകൾക്ക് സ്റ്റോപ്പ് ഉണ്ടാകില്ല. യാത്രക്കാർക്ക് ലിയോൺ അല്ലെങ്കിൽ ബേവ്യൂ സ്റ്റേഷനുകളിൽ ഇറങ്ങി വെടിക്കെട്ട് പ്രകടനം കാണാം.
പ്രധാന ആകർഷണങ്ങൾ, വെടിക്കെട്ട് പ്രകടനങ്ങൾ, കൂടാതെ മറ്റു കാര്യങ്ങൾ
ലേബ്രെറ്റൺ ഫ്ലാറ്റ്സ് പാർക്കാണ് ഇത്തവണത്തെ കാനഡ ഡേ ആഘോഷങ്ങളുടെ പ്രധാന കേന്ദ്രം. ഇവിടെ പകൽ മുഴുവൻ പരിപാടികളും രാത്രി വെടിക്കെട്ട് പ്രകടനവും നടക്കും. രാത്രി 10 മുതൽ 10:15 വരെയാണ് ഇവിടെ വെടിക്കെട്ട് പ്രകടനം. ബാർഹാവൻ, കനാറ്റ, സ്റ്റിറ്റ്സ്വിൽ, റിവർസൈഡ് സൗത്ത്, ഓർലിയൻസ്, ഓസ്ഗുഡ്, ബീക്കൺ ഹിൽ, ഗ്രീലി, ലിൻഡ ലെയ്ൻ പാർക്ക് എന്നിവിടങ്ങളിലും വെടിക്കെട്ട് പ്രകടനങ്ങൾ ഒരുക്കിയിട്ടുണ്ട്. പാർലമെന്റ് ഹില്ലിൽ രാവിലെ 10-ന് ചേഞ്ചിംഗ് ഓഫ് ദ ഗാർഡ് ചടങ്ങും ഉച്ചയ്ക്ക് 2-നും 3:30-നും റോയൽ കനേഡിയൻ എയർഫോഴ്സ് പൈപ്പ്സ് ആൻഡ് ഡ്രംസ് പരിപാടികളും വൈകുന്നേരം 4-ന് സ്നോബേർഡ്സിന്റെ വ്യോമാഭ്യാസ പ്രകടനവും ഉണ്ടാകും.
സുപ്രീം കോടതിക്ക് മുന്നിൽ കനേഡിയൻ ഹെറിറ്റേജ് വിവിധ പരിപാടികൾ നടത്തും. ഇവിടെ രാവിലെ 9 മുതൽ വൈകുന്നേരം 5 വരെ പൊതുജനങ്ങൾക്ക് സുപ്രീം കോടതി കെട്ടിടം സന്ദർശിക്കാനും അതിന്റെ വിവിധ ഭാഗങ്ങൾ കണ്ടറിയാനും സാധിക്കും. ഓൾഡ് ഹള്ളിൽ ഡാൻസ് പ്രകടനങ്ങൾ, ഗെയിമുകൾ, സംഗീത പരിപാടികൾ എന്നിവയും ഉണ്ടാകും. ബൈവാർഡ് മാർക്കറ്റിൽ നാല് ദിവസത്തെ ആഘോഷങ്ങളാണ് ഒരുക്കിയിരിക്കുന്നത്. മുഖത്ത് പെയിന്റ് ചെയ്യുന്നതും നൃത്ത ശിൽപ്പശാലകളും വാട്ടർകളർ പെയിന്റിംഗുമൊക്കെ ഇവിടെയുണ്ടാകും.
കമ്മ്യൂണിറ്റി ആഘോഷങ്ങളും, മ്യൂസിയങ്ങളിലെ സൗജന്യ പ്രവേശനവും
ഒട്ടാവയിലെ വിവിധ കമ്മ്യൂണിറ്റികളിലും കാനഡ ഡേ ആഘോഷങ്ങൾ നടക്കുന്നുണ്ട്. ബാർഹാവൻ, കനാറ്റ, സ്റ്റിറ്റ്സ്വിൽ, റിവർസൈഡ് സൗത്ത്, ഓർലിയൻസ്, ഗ്രീലി എന്നിവിടങ്ങളിൽ കുടുംബങ്ങൾക്ക് ആസ്വദിക്കാനുള്ള കിഡ്സ് സോൺ, ഫുഡ് വെണ്ടർമാർ, തത്സമയ വിനോദ പരിപാടികൾ എന്നിവയുണ്ടാകും. നാഷണൽ ആർട്സ് സെന്റർ ഓർക്കസ്ട്രയുടെ ഒരു സൗജന്യ കാനഡ ഡേ കൺസേർട്ട് ഉച്ചയ്ക്ക് 2:30-ന് നടക്കും (ടിക്കറ്റ് ആവശ്യമാണ്). ഒട്ടാവ ബ്ലാക്ക്ജാക്ക്സ്, വിന്നിപെഗ് സീ ബിയേഴ്സുമായി ഉച്ചയ്ക്ക് 3-ന് അരീന അറ്റ് ടിഡി പ്ലേസിൽ ഒരു ബാസ്കറ്റ്ബോൾ മത്സരവും കളിക്കും.
കാനഡ ഡേയോടനുബന്ധിച്ച് പല മ്യൂസിയങ്ങൾക്കും സൗജന്യ പ്രവേശനം അനുവദിച്ചിട്ടുണ്ട്. കനേഡിയൻ മ്യൂസിയം ഓഫ് നേച്ചർ, കാനഡ അഗ്രികൾച്ചർ ആൻഡ് ഫുഡ് മ്യൂസിയം, കാനഡ സയൻസ് ആൻഡ് ടെക്നോളജി മ്യൂസിയം, കാനഡ ഏവിയേഷൻ ആൻഡ് സ്പേസ് മ്യൂസിയം, കനേഡിയൻ വാർ മ്യൂസിയം, കനേഡിയൻ മ്യൂസിയം ഓഫ് ഹിസ്റ്ററി എന്നിവയെല്ലാം ജൂലൈ 1-ന് സൗജന്യമായി സന്ദർശിക്കാം.
ഗതാഗത നിയന്ത്രണം
ജൂലൈ 1 ന് രാവിലെ 6 മുതൽ ജൂലൈ 2 ന് രാവിലെ 2 വരെ ഓട്ടവയിൽ പ്രധാനപ്പെട്ട നിരവധി റോഡുകൾ അടച്ചിടും. വെല്ലിംഗ്ടൺ സ്ട്രീറ്റ്, സ്പാർക്ക്സ് സ്ട്രീറ്റ്, ക്വീൻ സ്ട്രീറ്റ്, മെറ്റ്കാഫ് സ്ട്രീറ്റ് എന്നിവ ഇതിൽ ഉൾപ്പെടുന്നു. കൂടാതെ, ഇന്റർപ്രൊവിൻഷ്യൽ പാലങ്ങളായ അലക്സാണ്ട്ര ബ്രിഡ്ജ്, ചൗഡിയർ ക്രോസിംഗ്, പോർട്ടേജ് ബ്രിഡ്ജ് എന്നിവിടങ്ങളിലും ഭാഗികമായോ പൂർണ്ണമായോ ഗതാഗത നിയന്ത്രണങ്ങൾ ഉണ്ടാകും. യാത്രക്കാർ ഈ മാറ്റങ്ങൾ ശ്രദ്ധിച്ച് യാത്ര പ്ലാൻ ചെയ്യേണ്ടതാണ്.
