ടൊറന്റോ: പുതുവർഷത്തിലേക്ക് ഒന്റാരിയോ പ്രവിശ്യ പ്രവേശിക്കുന്നത് തൊഴിൽ, ആരോഗ്യം, സുരക്ഷാ മേഖലകളിൽ നിർണ്ണായകമായ നിയമമാറ്റങ്ങളുമായാണ്. ഉദ്യോഗാർത്ഥികളെയും വാഹന ഉടമകളെയും സാധാരണക്കാരെയും ഒരുപോലെ ബാധിക്കുന്ന ഈ പരിഷ്കാരങ്ങളിൽ ഏറ്റവും പ്രധാനപ്പെട്ടത് തൊഴിൽ വിപണിയിലെ സുതാര്യതയാണ്.
ഇനി മുതൽ ഒന്റാരിയോയിൽ 25-ൽ കൂടുതൽ ജീവനക്കാരുള്ള സ്ഥാപനങ്ങൾ തങ്ങളുടെ ജോബ് പോസ്റ്റിംഗുകളിൽ ശമ്പള പരിധി വ്യക്തമാക്കണമെന്ന് നിയമം അനുശാസിക്കുന്നു. ശമ്പള കാര്യത്തിലുള്ള അവ്യക്തത ഒഴിവാക്കാനും ഉദ്യോഗാർത്ഥികൾക്ക് കൃത്യമായ ധാരണ നൽകാനുമാണ് ഈ നീക്കം. ഇതിനോടൊപ്പം തന്നെ, വിദേശത്തുനിന്നും എത്തുന്ന പ്രൊഫഷണലുകൾക്ക് തിരിച്ചടിയായിരുന്ന ‘കനേഡിയൻ എക്സ്പീരിയൻസ്’ വേണമെന്ന നിബന്ധനയും തൊഴിൽ പരസ്യങ്ങളിൽ നിന്ന് നീക്കം ചെയ്തു. ജോലിക്ക് അപേക്ഷിക്കുന്നവരെ തിരഞ്ഞെടുക്കാൻ ആർട്ടിഫിഷ്യൽ ഇന്റലിജൻസ് ഉപയോഗിക്കുന്നുണ്ടെങ്കിൽ അക്കാര്യം വെളിപ്പെടുത്തണമെന്നും, ഇന്റർവ്യൂ കഴിഞ്ഞാൽ 45 ദിവസത്തിനുള്ളിൽ ഫലം അറിയിക്കണമെന്നും പുതിയ ചട്ടങ്ങൾ വ്യക്തമാക്കുന്നു.
വീടുകളിലെ സുരക്ഷയുടെ കാര്യത്തിലും കടുത്ത നിയന്ത്രണങ്ങളാണ് വരുന്നത്. കാർബൺ മോണോക്സൈഡ് അലാറങ്ങൾ ഇനി കിടപ്പുമുറികൾക്ക് സമീപം മാത്രം പോരാ, മറിച്ച് വീടിന്റെ ബേസ്മെന്റ് ഉൾപ്പെടെയുള്ള ഓരോ നിലയിലും നിർബന്ധമായും സ്ഥാപിച്ചിരിക്കണം. ശൈത്യകാലത്ത് കാർബൺ മോണോക്സൈഡ് മൂലമുണ്ടാകുന്ന അപകടങ്ങൾ കുറയ്ക്കാൻ ലക്ഷ്യമിട്ടാണ് ഈ മാറ്റം.
ഗതാഗത മേഖലയിൽ കുറ്റവാളികൾക്ക് കനത്ത ശിക്ഷയാണ് പ്രവിശ്യ പ്രഖ്യാപിച്ചിരിക്കുന്നത്. മദ്യപിച്ച് വാഹനം ഓടിച്ച് മരണത്തിന് കാരണമാകുന്നവരുടെ ലൈസൻസ് ആജീവനാന്തം റദ്ദാക്കും. വാഹന മോഷണത്തിൽ ഏർപ്പെടുന്നവർക്ക് ആദ്യ തവണ 10 വർഷത്തെ ലൈസൻസ് റദ്ദാക്കൽ നടപടി നേരിടേണ്ടി വരും. കുറ്റം ആവർത്തിച്ചാൽ ലൈസൻസ് എന്നെന്നേക്കുമായി നഷ്ടമാകും. കൂടാതെ റോഡുകളിൽ സ്റ്റണ്ട് ഡ്രൈവിംഗ് നടത്തുന്നവർക്ക് കനത്ത പിഴയും തടവുശിക്ഷയും ലൈസൻസ് റദ്ദാക്കലും ഏർപ്പെടുത്തിയിട്ടുണ്ട്.
ആരോഗ്യ മേഖലയിൽ മറ്റ് പ്രവിശ്യകളിൽ നിന്നുള്ള സേവനം എളുപ്പമാക്കുന്ന ‘As of Right’ നിയമം കൂടുതൽ വിഭാഗങ്ങളിലേക്ക് വ്യാപിപ്പിച്ചു. ഡെന്റിസ്റ്റുകൾ, ഫാർമസിസ്റ്റുകൾ തുടങ്ങി 16 പുതിയ വിഭാഗങ്ങൾക്കും ഒന്റാരിയോയിൽ ജോലി ചെയ്യാൻ ഇത് എളുപ്പമാകും. നിർമ്മാണ മേഖലയിലുള്ളവർക്ക് ഡിഫിബ്രിലേറ്റർ സൗകര്യം ഏർപ്പെടുത്തുക, മദ്യ വിൽപ്പനയിലെ നിയന്ത്രണങ്ങളിൽ മാറ്റം വരുത്തുക തുടങ്ങിയ സുപ്രധാന തീരുമാനങ്ങളും പുതിയ നിയമങ്ങളുടെ ഭാഗമായി നടപ്പിലാകും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Here are the new Ontario laws coming into effect in 2026
