ടൊറന്റോയിൽ അടുത്ത ഒരാഴ്ച കനത്ത ചൂടും ഈർപ്പവുമുള്ള കാലാവസ്ഥയായിരിക്കുമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. പകൽ സമയങ്ങളിൽ താപനില 30 ഡിഗ്രി സെൽഷ്യസിനു മുകളിൽ തുടരാനാണ് സാധ്യത.കഴിഞ്ഞ വ്യാഴാഴ്ച താപനില 30 ഡിഗ്രിക്ക് താഴെയായിരുന്നെങ്കിലും, അന്തരീക്ഷത്തിലെ ഈർപ്പം കാരണം ഇത് 37 ഡിഗ്രിയായി അനുഭവപ്പെട്ടിരുന്നു. അന്നേദിവസം ഉച്ചയോടെ നേരിയ മഴയ്ക്കും ഇടിമിന്നലിനും സാധ്യത പ്രവചിച്ചിരുന്നു. വെള്ളിയാഴ്ചയും താപനില 30 ഡിഗ്രിയിൽ തുടരുമെന്നും ഈർപ്പം കാരണം 37 ഡിഗ്രിയായി അനുഭവപ്പെടുമെന്നും കാലാവസ്ഥാ വകുപ്പ് അറിയിച്ചു.
ശനിയാഴ്ച കൂടുതൽ സൂര്യപ്രകാശമുണ്ടാകും. അന്നേദിവസം ഏകദേശം 31 ഡിഗ്രി സെൽഷ്യസ് താപനിലയാണ് പ്രതീക്ഷിക്കുന്നത്. ഞായറാഴ്ചയും 30 ഡിഗ്രിയോടെ ചൂട് തുടരുമ്പോൾ മഴയ്ക്ക് സാധ്യതയുണ്ട്. ജൂലൈ 14 തിങ്കളാഴ്ച മുതൽ 16 ബുധനാഴ്ച വരെ സൂര്യപ്രകാശവും മേഘാവൃതമായ കാലാവസ്ഥയും ഇടകലർന്ന് അനുഭവപ്പെടും. ഈ ദിവസങ്ങളിലും താപനില 30 ഡിഗ്രിയോട് അടുത്ത് തന്നെയായിരിക്കും.
ഈ സാഹചര്യത്തിൽ ടൊറന്റോ നിവാസികൾ അതീവ ജാഗ്രത പാലിക്കണമെന്ന് അധികൃതർ നിർദ്ദേശിച്ചിട്ടുണ്ട്. നിർജലീകരണം ഒഴിവാക്കാൻ ധാരാളം വെള്ളം കുടിക്കുക, തണലുള്ള സ്ഥലങ്ങൾ തിരഞ്ഞെടുക്കുക, കുഞ്ഞുങ്ങളും പ്രായമായവരും നേരിട്ടുള്ള സൂര്യപ്രകാശം ഏൽക്കുന്നത് ഒഴിവാക്കുക, കടും നിറമുള്ളതും കട്ടിയുള്ളതുമായ വസ്ത്രങ്ങൾ ധരിക്കുന്നത് ഒഴിവാക്കുക തുടങ്ങിയ നിർദ്ദേശങ്ങളാണ് അധികൃതർ നൽകിയിരിക്കുന്നത്.
