എഡ്മന്റൺ: ആൽബർട്ടയിലെ ആരോഗ്യ മേഖലയിൽ നിലനിന്നിരുന്ന പ്രതിസന്ധിക്ക് അയവ് വരുത്തിക്കൊണ്ട്, ആൽബർട്ട ഹെൽത്ത് സർവീസസ് (AHS) ഉം ഹെൽത്ത് സയൻസസ് അസോസിയേഷൻ ഓഫ് ആൽബർട്ട (HSAA) യൂണിയനും തമ്മിൽ മധ്യസ്ഥ ചർച്ചകൾ പുനരാരംഭിച്ചു.
പാരാമെഡിക്കൽ ജീവനക്കാർ, ലബോറട്ടറി ടെക്നോളജിസ്റ്റുകൾ, ഫാർമസിസ്റ്റുകൾ തുടങ്ങി 200-ൽ അധികം വിഭാഗങ്ങളിലെ 22,000 ആരോഗ്യ പ്രവർത്തകരെയാണ് HSAA പ്രതിനിധീകരിക്കുന്നത്.
നാല് വർഷത്തിനിടെ 12 ശതമാനം പൊതു ശമ്പള വർധനവ് ഉൾപ്പെടെയുള്ള വ്യവസ്ഥകൾ ഉൾപ്പെടുത്തിയ പ്രാഥമിക കരാർ (Tentative Deal) സെപ്റ്റംബറിൽ HSAA അംഗങ്ങളിൽ 60 ശതമാനത്തോളം പേർ വോട്ട് ചെയ്ത് തള്ളിയിരുന്നു. ശമ്പള വർദ്ധനവ് ഉണ്ടായിരുന്നിട്ടും, ജീവനക്കാരുടെ കുറവും (Staffing Levels) ജോലി ഭാരം താങ്ങാൻ കഴിയാത്ത അവസ്ഥയും (Unsustainable Workloads) പരിഹരിക്കാൻ കരാറിൽ വ്യവസ്ഥകളില്ല എന്നതായിരുന്നു യൂണിയന്റെ പ്രധാന വിമർശനം. ചർച്ചകൾ പുനരാരംഭിക്കുന്നതിനായി കാത്തിരിക്കുന്നതിനിടെ, യൂണിയൻ പ്രവർത്തകർ ഒക്ടോബറിൽ റാലി നടത്തുകയും പരസ്യ കാമ്പയിൻ ആരംഭിക്കുകയും ചെയ്തിരുന്നു.
ട്രഷറി ബോർഡ് ആൻഡ് ഫിനാൻസ് മന്ത്രിയുടെ ഓഫീസ് പുറത്തിറക്കിയ പ്രസ്താവനയിൽ, സർക്കാർ ഈ തൊഴിലാളികളെ വിലമതിക്കുന്നുവെന്നും, “ആരോഗ്യ പ്രവർത്തകരെയും ആൽബർട്ട നികുതിദായകരെയും പിന്തുണയ്ക്കുന്ന ന്യായവും യുക്തിസഹവുമായ ഒരു കരാറിലെത്താൻ കൂട്ടായ വിലപേശൽ പ്രക്രിയയോട് പ്രതിജ്ഞാബദ്ധരാണ്” എന്നും അറിയിച്ചു. ഈ മധ്യസ്ഥ ചർച്ചകൾ വഴി ഉടൻ തന്നെ ഒരു അന്തിമ കരാറിലെത്താൻ സാധിക്കുമെന്ന പ്രതീക്ഷയിലാണ് ആരോഗ്യ മേഖല.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Health sciences union, AHS return to bargaining table
