തിരുവനന്തപുരം: ഇസ്രയേൽ-ഇറാൻ യുദ്ധം രൂക്ഷമായതിനെത്തുടർന്ന് പശ്ചിമേഷ്യൻ മേഖലയിലേക്കുള്ള വിമാന സർവീസുകൾ അന്താരാഷ്ട്ര വിമാനക്കമ്പനികൾ കൂട്ടത്തോടെ റദ്ദാക്കി. ശനിയാഴ്ച കരിപ്പൂർ വിമാനത്താവളത്തിൽ നിന്നുള്ള ഗൾഫ് സർവീസുകൾ പൂർണ്ണമായും തടസ്സപ്പെട്ടതോടെ ബിസിനസ്സ് ആവശ്യങ്ങൾക്കും ജോലിക്കുമായി പോകാനിരുന്ന നൂറുകണക്കിന് യാത്രക്കാരാണ് വിമാനത്താവളങ്ങളിൽ കുടുങ്ങിയത്. നിലവിലെ സുരക്ഷാ സാഹചര്യം കണക്കിലെടുത്ത് വ്യോമപാതകളിൽ നിയന്ത്രണം ഏർപ്പെടുത്തിയതാണ് സർവീസുകൾ പെട്ടെന്ന് നിർത്തലാക്കാൻ കാരണമായത്.
കരിപ്പൂരിന് പുറമെ നെടുമ്പാശ്ശേരി, തിരുവനന്തപുരം വിമാനത്താവളങ്ങളിൽ നിന്നും ദോഹ, ദുബായ്, അബുദാബി, മസ്കറ്റ് തുടങ്ങിയ ഇടങ്ങളിലേക്കുള്ള സർവീസുകൾ റദ്ദാക്കിയിട്ടുണ്ട്. നെടുമ്പാശ്ശേരിയിൽ നിന്ന് പുറപ്പെടാനിരുന്ന ഇൻഡിഗോ, എയർ ഇന്ത്യ എക്സ്പ്രസ് വിമാനങ്ങൾ തടയുകയും മസ്കറ്റിൽ നിന്നുള്ള ഒമാൻ എയർ വിമാനം തിരിച്ചയക്കുകയും ചെയ്തു. തിരുവനന്തപുരത്തുനിന്ന് ശനിയാഴ്ച വൈകുന്നേരവും ഞായറാഴ്ച പുലർച്ചെയുമായി പുറപ്പെടേണ്ടിയിരുന്ന എയർ ഇന്ത്യ എക്സ്പ്രസ്, എത്തിഹാദ് വിമാനങ്ങളും റദ്ദാക്കിയ പട്ടികയിലുണ്ട്. വിസ കാലാവധി തീരാറായവരും അവധി കഴിഞ്ഞ് മടങ്ങുന്നവരുമായ പ്രവാസികൾ ഇതോടെ കടുത്ത ആശങ്കയിലായി.
യുദ്ധസാഹചര്യം നിലനിൽക്കുന്നതിനാൽ യാത്രക്കാർ വിമാനത്താവളങ്ങളിലേക്ക് തിരിക്കും മുൻപ് അതത് കമ്പനികളുമായി ബന്ധപ്പെട്ട് സർവീസ് സ്റ്റാറ്റസ് പരിശോധിക്കണമെന്ന് അധികൃതർ നിർദ്ദേശം നൽകി. മുൻകൂട്ടി അറിയിപ്പ് ലഭിക്കാതെ സർവീസുകൾ റദ്ദാക്കിയത് പലയിടങ്ങളിലും യാത്രക്കാരുടെ പ്രതിഷേധത്തിന് ഇടയാക്കിയിട്ടുണ്ട്. വരും ദിവസങ്ങളിലെ സംഘർഷാവസ്ഥ പരിഗണിച്ചായിരിക്കും സർവീസുകൾ പുനരാരംഭിക്കുന്ന കാര്യത്തിൽ അന്തിമ തീരുമാനമെടുക്കുകയെന്ന് വിമാനത്താവള അധികൃതർ വ്യക്തമാക്കി.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
War intensifies; Gulf services from Kerala cancelled en masse
