യുഎസ് പൗരനെ വിവാഹം കഴിച്ചാലും ഗ്രീൻ കാർഡ് ഉറപ്പില്ലെന്ന് നിയമവിദഗ്ധർ: പരിശോധനകൾ കടുപ്പിച്ച് അമേരിക്ക

വാഷിംഗ്ടൺ: അമേരിക്കൻ പൗരത്വമുള്ളയാളെ വിവാഹം കഴിക്കുന്നത് രാജ്യത്ത് സ്ഥിരതാമസത്തിനുള്ള (ഗ്രീൻ കാർഡ്) ഉറപ്പായ മാർഗ്ഗമാണെന്ന ധാരണ ഇനി വേണ്ടെന്ന് ഇമിഗ്രേഷൻ നിയമവിദഗ്ധർ. പ്രസിഡന്റ് ഡൊണാൾഡ് ട്രംപിന്റെ നേതൃത്വത്തിലുള്ള ഭരണകൂടം കുടിയേറ്റ നയങ്ങളിൽ കർശന നിയന്ത്രണങ്ങൾ ഏർപ്പെടുത്തിയ പശ്ചാത്തലത്തിലാണിതെന്ന് ‘സ്പാർ ആൻഡ് ബേൺസ്റ്റീൻ’ എന്ന നിയമസഹായ സ്ഥാപനത്തിലെ അറ്റോർണി ബ്രാഡ് ബേൺസ്റ്റീൻ വ്യക്തമാക്കി. വിവാഹത്തിലൂടെയുള്ള പൗരത്വ അപേക്ഷകളിൽ യുഎസ് അധികൃതർ പരിശോധനകൾ കടുപ്പിച്ചതായും അദ്ദേഹം അറിയിച്ചു.

അമേരിക്കൻ പൗരനെ വിവാഹം കഴിച്ചു എന്നതുകൊണ്ടുമാത്രം ഒരാൾക്ക് ഗ്രീൻ കാർഡിന് അർഹതയുണ്ടാവില്ലെന്നും ദമ്പതികൾ ഒരുമിച്ച് താമസിക്കുന്നുണ്ടോ എന്നതാണ് പ്രധാനമെന്നും ബേൺസ്റ്റീൻ വിശദീകരിച്ചു. ബന്ധം പുലർത്തുന്നതിനേക്കാൾ ഉപരിയായി ഒരേ വീട്ടിൽ ഒരുമിച്ച് താമസിക്കുന്നവർക്ക് മാത്രമേ ഗ്രീൻ കാർഡ് അനുവദിക്കൂ. തൊഴിൽപരമായ ആവശ്യങ്ങൾക്കോ സാമ്പത്തിക കാരണങ്ങൾക്കോ ആയി ദമ്പതികൾ വേറിട്ടാണ് താമസിക്കുന്നതെങ്കിൽ അത്തരം അപേക്ഷകൾ തള്ളാൻ സാധ്യതയുണ്ടെന്നും അദ്ദേഹം കൂട്ടിച്ചേർത്തു.

വിവാഹങ്ങൾ യഥാർത്ഥമാണോ അതോ കുടിയേറ്റ നിയമങ്ങൾ മറികടക്കാനുള്ള കുറുക്കുവഴിയാണോ എന്ന് പരിശോധിക്കാൻ യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (USCIS) ഉദ്യോഗസ്ഥർക്ക് പ്രത്യേക നിർദ്ദേശം നൽകിയിട്ടുണ്ട്. താമസരേഖകൾ, സംയുക്ത ബാങ്ക് അക്കൗണ്ടുകൾ, ഫോട്ടോകൾ, ദൈനംദിന ജീവിതത്തിന്റെ തെളിവുകൾ എന്നിവ ഉദ്യോഗസ്ഥർ സൂക്ഷ്മമായി പരിശോധിക്കും. സംശയം തോന്നുന്ന പക്ഷം അപേക്ഷകരുടെ വസതികളിൽ നേരിട്ടെത്തി അന്വേഷണം നടത്താനും സാധ്യതയുണ്ട്.

അമേരിക്കയിൽ കുടിയേറ്റ തട്ടിപ്പുകൾ തടയുന്നതിന്റെ ഭാഗമായാണ് പുതിയ നീക്കങ്ങൾ. ഇതിന്റെ ഭാഗമായി പ്രതിവർഷം 55,000 വിസകൾ അനുവദിക്കുന്ന ‘ഡൈവേഴ്സിറ്റി വിസ പ്രോഗ്രാം’ (ഗ്രീൻ കാർഡ് ലോട്ടറി) ഹോംലാൻഡ് സെക്യൂരിറ്റി സെക്രട്ടറി ക്രിസ്റ്റി നോം താൽക്കാലികമായി നിർത്തിവെച്ചിരുന്നു. രാജ്യസുരക്ഷ ഉറപ്പാക്കുന്നതിനായി പ്രസിഡന്റ് ട്രംപ് നൽകിയ നിർദ്ദേശത്തെ തുടർന്നാണ് ഈ തീരുമാനമെന്ന് ക്രിസ്റ്റി നോം വ്യക്തമാക്കിയിട്ടുണ്ട്.

അമേരിക്കൻ പൗരന്മാരെ വിവാഹം കഴിച്ചവർ ഒരുമിച്ച് താമസിക്കുന്നുണ്ടെന്ന് ഉറപ്പുവരുത്താൻ സംയുക്തമായ വാടക കരാറുകൾ, യൂട്ടിലിറ്റി ബില്ലുകൾ തുടങ്ങിയ രേഖകൾ കൃത്യമായി സൂക്ഷിക്കണമെന്ന് നിയമവിദഗ്ധർ നിർദ്ദേശിക്കുന്നു. കുടിയേറ്റ നിയമങ്ങളിലെ മാറ്റങ്ങൾ കാരണം അപേക്ഷകളിൽ ചെറിയ പിഴവുകൾ പോലും അമേരിക്കൻ സ്വപ്നങ്ങൾക്ക് തിരിച്ചടിയായേക്കാം. അതിനാൽ അപേക്ഷാ നടപടികൾ ആരംഭിക്കുന്നതിന് മുൻപ് നിയമോപദേശം തേടുന്നത് ഉചിതമായിരിക്കുമെന്നും റിപ്പോർട്ടുകൾ വ്യക്തമാക്കുന്നു.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

Legal experts say green card not guaranteed even if you marry a US citizen: US tightens checks