ഒന്റാരിയോ: മിനസോട്ടയിലെ മൗവർ കൗണ്ടിയിലുണ്ടായ ട്രക്ക് അപകടത്തിൽ മരിച്ച കനേഡിയൻ മലയാളി അജീഷ് തോമസിനായി ഗോഫണ്ട് ക്യാമ്പയിൻ ആരംഭിച്ചു. ലണ്ടൻ ഒന്റാരിയോയിൽ താമസിക്കുന്ന അജീഷ് തോമസ് ഓടിച്ചിരുന്ന സെമി ട്രക്കാണ് അപകടത്തിൽ പെട്ടത്. ഫെബ്രുവരി 2 തിങ്കളാഴ്ചയാണ് അപകടം സംഭവിച്ചത് എന്നാണ് ഔദ്യോഗിക വിവരം. അടുത്തിടെയാണ് അജീഷ് കാനഡയിലേക്ക് കുടിയേറിയത്.
അജീഷിന്റെ അപ്രതീക്ഷിത വേർപാട് കുടുംബത്തെയും സുഹൃത്തുക്കളെയും വലിയ ആഘാതത്തിലാഴ്ത്തിയിരിക്കുകയാണ്. ഭാര്യ ഷെറിനും രണ്ട് ചെറിയ കുട്ടികളുമടങ്ങുന്നതാണ് അജീഷിന്റെ കുടുംബം. നിലവിൽ ഷെറിന് തൊഴിലില്ലാത്തത് കുടുംബത്തെ വലിയ സാമ്പത്തിക പ്രതിസന്ധിയിലാക്കിയിട്ടുണ്ട്.
അജീഷിന്റെ കുടുംബത്തെ സഹായിക്കുന്നതിനായി ‘കേരള ട്രക്കേഴ്സ് ഇൻ കാനഡ’യുടെ (KTC) നേതൃത്വത്തിൽ ഗോ ഫണ്ട് മീ (GoFundMe) വഴി ധനസമാഹരണം ആരംഭിച്ചിട്ടുണ്ട്. ശവസംസ്കാര ചടങ്ങുകൾക്കും കുടുംബത്തിന്റെ തുടർന്നുള്ള ജീവിതച്ചെലവുകൾക്കുമായി ഈ തുക കൈമാറും. ലണ്ടനിലെ സെന്റ് ജോർജ്ജ് ഓർത്തഡോക്സ് കോൺഗ്രിഗേഷൻ ഉൾപ്പെടെയുള്ള വിവിധ സംഘടനകളുടെ പിന്തുണ ഈ സംരംഭത്തിനുണ്ട്.
ലണ്ടൻ ഒന്റാറിയോ മലയാളി അസോസിയേഷൻ (LOMA), ലണ്ടൻ കേരളീയ സമാജം (LKS), കനേഡിയൻ കൊച്ചിൻ ക്ലബ് തുടങ്ങിയ മലയാളി സംഘടനകളും ഈ സമാഹരണത്തിൽ പങ്കാളികളാണ്. കൂടാതെ ലണ്ടനിലെ വിവിധ ക്രൈസ്തവ ദേവാലയങ്ങളും സന്നദ്ധ സംഘടനകളും കുടുംബത്തിന് ഐക്യദാർഢ്യം പ്രഖ്യാപിച്ചിട്ടുണ്ട്. ലഭിക്കുന്ന സംഭാവനകൾ നേരിട്ട് അജീഷിന്റെ ഭാര്യ ഷെറിന് കൈമാറുമെന്ന് സംഘാടകർ അറിയിച്ചു.
https://www.gofundme.com/f/pzevh-donate-to-support-the-family-of-late-ajeesh-thomas
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
GoFund campaign launched for Ajeesh Thomas, who died in a truck accident
