ന്യൂഡൽഹി: ആഗോള വിപണിയിൽ എണ്ണവില കുതിച്ചുയരുന്ന പശ്ചാത്തലത്തിൽ ഇന്ധന നികുതി ഒഴിവാക്കണമെന്ന ആവശ്യവുമായി പ്രമുഖ വിമാനക്കമ്പനികളായ എയർ ഇന്ത്യയും ഇൻഡിഗോയും കേന്ദ്ര സർക്കാരിനെ സമീപിച്ചു. ഇറാൻ-ഇസ്രയേൽ യുദ്ധസാഹചര്യം മൂലം വ്യോമയാന ഇന്ധനമായ ഏവിയേഷൻ ടർബൈൻ ഫ്യൂവൽ (ATF) വിലയിലുണ്ടായ അമിത വർധനവ് വലിയ സാമ്പത്തിക പ്രതിസന്ധിയാണ് സൃഷ്ടിക്കുന്നത്. ഇതിന് പുറമെ സ്വകാര്യ വിമാനത്താവളങ്ങളിലെ വിവിധ നിരക്കുകളിൽ ഇളവ് വേണമെന്ന ആവശ്യവും കമ്പനികൾ കേന്ദ്രത്തിന് മുന്നിൽ വെച്ചിട്ടുണ്ട്.
ഇന്ധനച്ചെലവ് വർധിച്ചതോടെ യാത്രക്കാരിൽ നിന്ന് ഫ്യൂവൽ സർചാർജ് ഈടാക്കിത്തുടങ്ങിയത് വിമാന ടിക്കറ്റ് നിരക്കുകൾ കുത്തനെ ഉയരാൻ കാരണമായി. എയർ ഇന്ത്യ മാർച്ച് 12 മുതൽ ഘട്ടം ഘട്ടമായി സർചാർജ് വർധിപ്പിച്ചു വരികയാണ്. ഇൻഡിഗോയാകട്ടെ, മാർച്ച് 14 മുതൽ ദൂരപരിധി അനുസരിച്ച് 425 രൂപ മുതൽ 2300 രൂപ വരെയാണ് അധികമായി ഈടാക്കുന്നത്. ഇതോടെ സാധാരണക്കാരായ യാത്രക്കാർക്ക് വിമാനയാത്ര വലിയ സാമ്പത്തിക ബാധ്യതയായി മാറിയിരിക്കുകയാണ്.
സർക്കാർ നികുതിയിളവ് നൽകിയാൽ മാത്രമേ ടിക്കറ്റ് നിരക്കുകൾ നിയന്ത്രിക്കാൻ കഴിയൂ എന്നാണ് എയർലൈനുകളുടെ നിലപാട്. നിലവിൽ വിമാനക്കമ്പനികൾ നേരിടുന്ന പ്രതിസന്ധി പരിഹരിക്കാൻ കേന്ദ്ര സിവിൽ ഏവിയേഷൻ മന്ത്രാലയത്തിന്റെ ഇടപെടൽ അത്യാവശ്യമാണെന്ന് ഈ രംഗത്തെ വിദഗ്ധർ ചൂണ്ടിക്കാട്ടുന്നു. വിഷയത്തിൽ കേന്ദ്ര സർക്കാർ ഇതുവരെ ഔദ്യോഗികമായി പ്രതികരിച്ചിട്ടില്ലെങ്കിലും വരും ദിവസങ്ങളിൽ നിർണ്ണായകമായ തീരുമാനങ്ങൾ ഉണ്ടാകുമെന്നാണ് റിപ്പോർട്ടുകൾ സൂചിപ്പിക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Fuel prices soar; Air India and IndiGo demand tax relief, ticket prices hiked
