ഒട്ടാവ : മിഡിൽ ഈസ്റ്റിലെ യുദ്ധം അഞ്ചാം വാരത്തിലേക്ക് കടന്നതും ഹോർമുസ് കടലിടുക്ക് അടച്ചതും ആഗോള വിപണിയിൽ എണ്ണവില വർധിക്കാൻ കാരണമായതായി റിപ്പോർട്ടുകൾ വ്യക്തമാക്കുന്നു. നിലവിൽ ടൊറന്റോയിൽ ഒരു ലിറ്റർ പെട്രോളിന് 1.72 ഡോളറാണ് നിരക്ക്. മറ്റു കനേഡിയൻ നഗരങ്ങളിൽ ഇതിലും ഉയർന്ന വിലയാണ് ഈടാക്കുന്നത്. ഇന്ധനവില വർധനവ് സാധാരണക്കാരുടെ ജീവിതച്ചെലവ് ഗണ്യമായി വർധിപ്പിച്ചതായും റിപ്പോർട്ട് ചൂണ്ടിക്കാട്ടുന്നു.
വർധിച്ചുവരുന്ന സാമ്പത്തിക പ്രതിസന്ധി കണക്കിലെടുത്ത് ഫെഡറൽ, പ്രൊവിൻഷ്യൽ സർക്കാരുകൾ ഇന്ധനനികുതി താൽക്കാലികമായി റദ്ദാക്കണമെന്ന് കനേഡിയൻ ടാക്സ് പേയേഴ്സ് ഫെഡറേഷൻ (CTF) ഫെഡറൽ ഡയറക്ടർ ഫ്രാങ്കോ ടെറസാനോ ആവശ്യപ്പെട്ടു. ചില നഗരങ്ങളിൽ എക്സൈസ് ഡ്യൂട്ടി, പ്രൊവിൻഷ്യൽ ലെവി, ജിഎസ്ടി എന്നിവയുൾപ്പെടെ ലിറ്ററിന് 65 സെന്റ് വരെ നികുതിയായി ഈടാക്കുന്നുണ്ടെന്നും അദ്ദേഹം വ്യക്തമാക്കി. നികുതി സ്ഥിരമായി കുറയ്ക്കുകയാണ് വേണ്ടതെന്നും അദ്ദേഹം കൂട്ടിച്ചേർത്തു.
ഇന്ധനവില വർധനവിനെ പ്രതിരോധിക്കാൻ ആസ്ട്രേലിയയും വിവിധ യൂറോപ്യൻ രാജ്യങ്ങളും നികുതിയിളവുകൾ പ്രഖ്യാപിച്ചിട്ടുണ്ട്. ആസ്ട്രേലിയ പെട്രോൾ, ഡീസൽ നികുതികൾ പകുതിയായി കുറയ്ക്കുകയും പൊതുഗതാഗതം സൗജന്യമാക്കുകയും ചെയ്തു. ഇറ്റലി, സ്പെയിൻ, അയർലൻഡ്, പോർച്ചുഗൽ എന്നീ രാജ്യങ്ങളും സമാനമായ രീതിയിൽ നികുതി കുറച്ചിട്ടുണ്ട്. എന്നാൽ കാനഡ ഇതുവരെ നികുതി ഘടനയിൽ മാറ്റം വരുത്താൻ തയ്യാറായിട്ടില്ല.
നികുതി കുറയ്ക്കുന്ന കാര്യത്തിൽ ഫെഡറൽ ധനമന്ത്രി ഫ്രാങ്കോയിസ്-ഫിലിപ്പ് ഷാംപെയ്ൻ കൃത്യമായ ഉറപ്പുകൾ നൽകിയില്ല. നിലവിലെ സാഹചര്യം സർക്കാർ നിരീക്ഷിച്ചു വരികയാണെന്നും ആഗോള വിപണിയിൽ എണ്ണ ലഭ്യത ഉറപ്പാക്കാൻ അന്താരാഷ്ട്ര പങ്കാളികളുമായി ചേർന്ന് പ്രവർത്തിക്കുന്നുണ്ടെന്നും അദ്ദേഹം അറിയിച്ചു. തന്ത്രപ്രധാനമായ പെട്രോളിയം ശേഖരം വിനിയോഗിക്കുന്നതും ആഭ്യന്തര ഉൽപ്പാദനം വർധിപ്പിക്കുന്നതും വിപണിയെ സ്ഥിരപ്പെടുത്താൻ സഹായിക്കുമെന്നും മന്ത്രി വ്യക്തമാക്കി.
Fuel prices are soaring in Canada; there is a strong demand for tax cuts
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
