ടൊറന്റോ: റഷ്യയുടെ ഉക്രെയ്ൻ അധിനിവേശത്തിന്റെ നാലാം വാർഷികത്തിന് മുന്നോടിയായി ഞായറാഴ്ച ഉച്ചകഴിഞ്ഞ് ടൊറന്റോയിലെ നതാൻ ഫിലിപ്സ് സ്ക്വയറിൽ നൂറുകണക്കിന് ആളുകൾ റാലി നടത്തി. 2025-ൽ സൈന്യത്തിൽ ചേർന്നതിന് ശേഷം യുദ്ധത്തിൽ കൊല്ലപ്പെട്ട വോളന്റിയർ മെഡിക് മരീന വൊറോണ്ട്സോവ ഉൾപ്പെടെയുള്ളവരുടെ സ്മരണ പുതുക്കിയാണ് ജനങ്ങൾ ഒത്തുചേർന്നത്. ഉക്രെയ്ൻ കീഴടങ്ങില്ലെന്നും ശക്തമായി നിലകൊള്ളുമെന്നും റാലിയിൽ പങ്കെടുത്തവർ അറിയിച്ചു.
റഷ്യയുടെ കടന്നുകയറ്റം തടയുന്നതിൽ ഉക്രെയ്നിന് ലഭിക്കുന്ന ആഗോള പിന്തുണ നിർണ്ണായകമാണെന്ന് ‘സ്റ്റാൻഡ് വിത്ത് ഉക്രെയ്ൻ’ കമ്മിറ്റി ചെയർമാൻ മാർക്ക് ഷ്വെക് വ്യക്തമാക്കി. ഉക്രെയ്ൻ വീണുപോയാൽ അത് മറ്റ് യൂറോപ്യൻ രാജ്യങ്ങളെ ബാധിക്കുമെന്നും അദ്ദേഹം വിലയിരുത്തി. ടൊറന്റോ മേയർ ഒലീവിയ ചൗ, ഒന്റാറിയോ പ്രീമിയർ ഡഗ് ഫോർഡ്, ഫെഡറൽ പ്രതിപക്ഷ നേതാവ് പിയറി പൊയ്ലിവ്രെ എന്നിവർ ചടങ്ങിൽ പങ്കെടുത്ത് ഉക്രെയ്നുള്ള പിന്തുണ ആവർത്തിച്ചു.
യുദ്ധം ആരംഭിച്ചത് മുതൽ സഹോദര നഗരമായ കീവിന് 17 വാഹനങ്ങളും എട്ട് ജനറേറ്ററുകളും ടൊറന്റോ നൽകിയതായി മേയർ ഒലീവിയ ചൗ അറിയിച്ചു. ഒന്റാറിയോയിൽ ഏകദേശം 3.5 ലക്ഷം ഉക്രേനിയൻ വംശജർ ഉണ്ടെന്നും ഒന്നര ലക്ഷത്തിലധികം അഭയാർത്ഥികളെ ഇതിനോടകം സ്വാഗതം ചെയ്തതായും ഡഗ് ഫോർഡ് വ്യക്തമാക്കി. ഉക്രെയ്ൻ സൈന്യം നിലവിൽ ഉപയോഗിക്കുന്ന 40,000 സിആർവി 7 മിസൈലുകൾ കൈമാറാൻ സർക്കാരിനോട് ആവശ്യപ്പെട്ടത് തങ്ങളാണെന്ന് പിയറി പൊയ്ലിവ്രെ പറഞ്ഞു.
റഷ്യൻ അധിനിവേശത്തിന്റെ ഔദ്യോഗിക വാർഷികം ചൊവ്വാഴ്ചയാണ്. ഇതിന്റെ ഭാഗമായി ഞായറാഴ്ച ടൊറന്റോയ്ക്ക് പുറമെ കാനഡയിലെ വിവിധ നഗരങ്ങളിൽ റാലികളും മെഴുകുതിരി തെളിക്കൽ ചടങ്ങുകളും സംഘടിപ്പിച്ചു. നാല് വർഷമായി തുടരുന്ന ആക്രമണങ്ങളിൽ ജീവൻ നഷ്ടപ്പെട്ടവരെ സ്മരിക്കുന്നതിനൊപ്പം പോരാട്ടം തുടരുന്നവർക്ക് ഐക്യദാർഢ്യം പ്രഖ്യാപിക്കുകയുമാണ് ഇത്തരം ഒത്തുചേരലുകളിലൂടെ ലക്ഷ്യമിടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Fourth anniversary of Russian invasion: Ukraine solidarity rally in Toronto
