ഒട്ടാവ: കാനഡയുടെ സാമ്പത്തിക സുരക്ഷിതത്വം ഉറപ്പാക്കാൻ അമേരിക്കൻ വിപണിയോടുള്ള അമിത ആശ്രയം അടിയന്തിരമായി കുറയ്ക്കണമെന്ന് മുൻ പ്രധാനമന്ത്രി സ്റ്റീഫൻ ഹാർപ്പർ. ഒട്ടാവയിൽ തന്റെ സർക്കാരിന്റെ ഇരുപതാം വാർഷികാഘോഷ ചടങ്ങിൽ സംസാരിക്കുകയായിരുന്നു അദ്ദേഹം. നിലവിലെ അമേരിക്കൻ ഭരണകൂടത്തിന്റെ ഭാഗത്തുനിന്നുണ്ടാകുന്ന അപ്രതീക്ഷിത നീക്കങ്ങളും വ്യാപാര കരാറുകളുടെ ലംഘനവും കാനഡയ്ക്ക് വലിയ ഭീഷണിയാണെന്നും അദ്ദേഹം കൂട്ടിച്ചേർത്തു.
അമേരിക്കയുമായുള്ള വ്യാപാര തർക്കങ്ങൾ നീണ്ടുനിൽക്കുന്ന പശ്ചാത്തലത്തിൽ യുഎസ് ഉൽപ്പന്നങ്ങൾക്ക് താരിഫ് ഏർപ്പെടുത്തുന്നത് കാനഡ ഗൗരവമായി പരിഗണിക്കണമെന്ന് ഹാർപ്പർ നിർദ്ദേശിച്ചു. അമേരിക്കൻ വിപണി പഴയപോലെ സുരക്ഷിതമായിരിക്കുമെന്ന് കരുതുന്നത് പ്രായോഗികമല്ല. കാനഡ വെറുമൊരു വിഭവ സമാഹരണ കേന്ദ്രമായി മാറരുത്. നിർണ്ണായകമായ ഊർജ്ജ-ധാതു വിഭവങ്ങൾ അമേരിക്കയ്ക്ക് പുറത്തുള്ള രാജ്യങ്ങൾക്ക് കൂടി വിൽക്കാനുള്ള അവകാശം രാജ്യം ഉറപ്പാക്കണമെന്നും അദ്ദേഹം ആവശ്യപ്പെട്ടു.
പുതിയ ആഗോള സാഹചര്യങ്ങളോട് കാനഡ പൊരുത്തപ്പെടേണ്ടത് അനിവാര്യമാണെന്ന് ഹാർപ്പർ ഓർമ്മിപ്പിച്ചു. ഇതിനായി ബ്രിട്ടീഷ് കൊളംബിയ തീരത്തേക്കുള്ള എണ്ണ പൈപ്പ്ലൈൻ പദ്ധതി വേഗത്തിലാക്കണമെന്നും ഊർജ്ജ മേഖലയിലെ നിയന്ത്രണങ്ങൾ ലഘൂകരിക്കണമെന്നും അദ്ദേഹം പറഞ്ഞു. ഏഷ്യൻ വിപണികളിലേക്ക് എണ്ണ വിതരണം വർദ്ധിപ്പിക്കുന്നത് സാമ്പത്തിക വളർച്ചയ്ക്ക് സഹായിക്കും. ചരിത്രപരമായി ഇത്തരം വെല്ലുവിളികളെ നേരിട്ടാണ് കാനഡ എന്ന രാജ്യം രൂപപ്പെട്ടതെന്നും, നിലവിലെ സാഹചര്യത്തിലും അത്തരമൊരു ഐക്യവും ദീർഘവീക്ഷണവുമാണ് ആവശ്യമെന്നും അദ്ദേഹം പ്രസംഗത്തിൽ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Former Prime Minister Stephen Harper calls for new trade policy to reduce over-reliance on the US
