ഒട്ടാവ: കാനഡയിൽ കുറ്റകൃത്യങ്ങളിൽ ഏർപ്പെടുന്ന വിദേശ പൗരന്മാർക്കെതിരെ നിലവിലുള്ള നിയമങ്ങൾ കൂടുതൽ കർശനമാക്കാൻ കോൺസർവേറ്റീവ് പാർട്ടി. ഗുരുതരമായ കുറ്റകൃത്യങ്ങളിൽ ശിക്ഷിക്കപ്പെടുന്ന, പൗരത്വമില്ലാത്ത വ്യക്തികൾക്ക് രാജ്യത്ത് അഭയാർത്ഥി അപേക്ഷ സമർപ്പിക്കാനുള്ള അവസരം നിഷേധിക്കുന്ന പുതിയ നിയമഭേദഗതിയാണ് പാർട്ടി ലക്ഷ്യമിടുന്നത്.
പിയറി പൊയിലീവ്രെയുടെ നേതൃത്വത്തിലുള്ള കോൺസർവേറ്റീവ് പാർട്ടി ഇതുസംബന്ധിച്ച പ്രമേയം പാർലമെന്റിൽ അവതരിപ്പിക്കാൻ ഒരുങ്ങുകയാണ്. നിലവിൽ കോടതികളിൽ ക്രിമിനൽ കേസുകൾ നേരിടുന്നവർക്കും അഭയാർത്ഥി അപേക്ഷ നൽകാൻ അനുമതി നൽകരുത് എന്നതാണ് പ്രമേയത്തിലെ പ്രധാന ആവശ്യം. ഗുരുതര കുറ്റകൃത്യങ്ങളിൽ ഏർപ്പെടുന്ന വിദേശികളെ രാജ്യത്തുനിന്ന് പുറത്താക്കണമെന്നും കനേഡിയൻ പൗരന്മാരുടെ സുരക്ഷയ്ക്കാണ് മുൻഗണന നൽകേണ്ടതെന്നും പാർട്ടി നേതൃത്വം വ്യക്തമാക്കി.
കാനഡയിലെ വിവിധ നഗരങ്ങളിൽ പീഡനക്കേസുകളും (Extortion) അക്രമാസക്തമായ കുറ്റകൃത്യങ്ങളും വർധിച്ചു വരുന്ന സാഹചര്യത്തിലാണ് ഇത്തരമൊരു നീക്കം. ബ്രിട്ടീഷ് കൊളംബിയ പ്രീമിയർ ഡേവിഡ് എബി ഉൾപ്പെടെയുള്ള പ്രമുഖ നേതാക്കളും വിവിധ നഗരങ്ങളിലെ മേയർമാരും നിലവിലെ നിയമങ്ങളിലെ പോരായ്മകൾ പരിഹരിക്കാൻ കേന്ദ്ര സർക്കാരിനോട് ആവശ്യപ്പെട്ടിട്ടുണ്ട്. വിദേശ കുറ്റവാളികളുടെ പുനരധിവാസത്തിനായി നികുതിപ്പണം ചെലവഴിക്കേണ്ടതില്ലെന്ന നിലപാടിലാണ് കോൺസർവേറ്റീവ് പ്രതിനിധികൾ.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Foreign criminals will be locked up; Conservative Party to tighten law
