ഹാലിഫാക്സ്: നോവ സ്കോഷ്യയിൽ ഭക്ഷ്യ അരക്ഷിതാവസ്ഥ (Food Insecurity) റെക്കോർഡ് നിലയിലേക്ക്. 2025 കാനഡാസ് ഫുഡ് പ്രൈസ് റിപ്പോർട്ട് (Canada’s Food Price Report 2025) അനുസരിച്ച്, നോവ സ്കോഷ്യയിലെ നാലിൽ ഒരാൾക്ക് അഥവാ 28.9 ശതമാനം പേർക്ക് ആവശ്യത്തിന് ഭക്ഷണം ലഭിക്കുന്നില്ല. കാനഡയിലെ മറ്റ് പ്രവിശ്യകളെ അപേക്ഷിച്ച് ഏറ്റവും ഉയർന്ന നിരക്കാണിത്. അവധിക്കാലത്ത് പോലും സാധാരണക്കാർക്ക് വയറുനിറച്ച് ഭക്ഷണം കഴിക്കാൻ പ്രയാസപ്പെടുന്ന അവസ്ഥ വർധിച്ചുവരികയാണ്.
കഴിഞ്ഞ ഒരു വർഷത്തിനിടെ സ്ഥിതി കൂടുതൽ വഷളായതായി ഫീഡ് നോവ സ്കോഷയുടെ (Feed Nova Scotia) എക്സിക്യൂട്ടീവ് ഡയറക്ടറായ ആഷ് അവെറി ചൂണ്ടിക്കാട്ടി. ഭക്ഷ്യ അരക്ഷിതാവസ്ഥ 10 ശതമാനം വർധിച്ചിട്ടുണ്ടെന്നും പ്രവിശ്യയിലുടനീളമുള്ള ഭക്ഷ്യ ബാങ്കുകൾക്ക് ഈ പെരുകുന്ന ആവശ്യം താങ്ങാൻ കഴിയുന്നില്ലെന്നും അവർ കൂട്ടിച്ചേർത്തു.
കുട്ടികളും ജോലിക്കാരും ഭക്ഷ്യ ബാങ്കുകളെ ആശ്രയിക്കുന്നു
ഈ പ്രതിസന്ധി ചില പ്രത്യേക വിഭാഗങ്ങളെ കൂടുതൽ ദുരിതത്തിലാക്കുന്നു. തദ്ദേശീയ സമൂഹങ്ങൾ, ഒറ്റയ്ക്ക് കുട്ടികളെ വളർത്തുന്ന രക്ഷിതാക്കൾ (Single Parents), കുട്ടികൾ എന്നിവരാണ് ഏറ്റവും കൂടുതൽ ബാധിക്കപ്പെടുന്നത്. ഭക്ഷ്യ ബാങ്കുകളിൽ സഹായത്തിനായി എത്തുന്നവരിൽ മൂന്നിൽ ഒരാൾ കുട്ടിയാണ്. കൂടാതെ 22 ശതമാനം പേർക്ക് 12 വയസ്സിൽ താഴെയാണ് പ്രായം.
കൂടുതൽ ഞെട്ടിപ്പിക്കുന്ന വസ്തുത എന്തെന്നാൽ ജോലി ചെയ്യുന്ന ആളുകൾ പോലും ഇപ്പോൾ ഭക്ഷ്യ സഹായത്തിനായി എത്തുന്നു എന്നതാണ്. ഭക്ഷ്യ ബാങ്ക് ക്ലയന്റുകളിൽ 25 ശതമാനത്തിലധികം പേർക്ക് ജോലിയുണ്ട്. കഴിഞ്ഞ വർഷത്തെ അപേക്ഷിച്ച് ഇത് 14 ശതമാനം അധികമാണ്. ജീവിതച്ചെലവ് ക്രമാതീതമായി വർധിക്കുമ്പോൾ, സ്വന്തമായി വരുമാനമുള്ളവർക്ക് പോലും അടിസ്ഥാന ആവശ്യങ്ങൾ നിറവേറ്റാൻ കഴിയുന്നില്ല എന്നതിന്റെ സൂചനയാണിത്.
സംഭാവനകൾ സഹായിക്കുന്നുണ്ടെങ്കിലും പര്യാപ്തമല്ല
അമേരിക്കൻ ഉൽപ്പന്നങ്ങളുടെ വിൽപ്പന വഴി ലഭിച്ച തുക നോവ സ്കോഷ്യ ലിക്വർ കോർപ്പറേഷൻ ഫീഡ് നോവ സ്കോഷ്യക്ക് അടുത്തിടെ വൻ സംഭാവനയായി നൽകിയിരുന്നു. ഈ സഹായത്തോടെയാണ് 130-ൽ അധികം വരുന്ന ഭക്ഷ്യ ബാങ്കുകൾക്ക് വേണ്ടി പ്രതിവർഷം 25 ദശലക്ഷം ഡോളറിലധികം മൂല്യമുള്ള ഭക്ഷണം വിതരണം ചെയ്യാൻ സംഘടനയ്ക്ക് സാധിക്കുന്നത്. ഭക്ഷണം, പണം, സന്നദ്ധസേവനം എന്നിങ്ങനെ ലഭിക്കുന്ന എല്ലാ സംഭാവനകളും അടിയന്തിര ആവശ്യങ്ങൾ നിറവേറ്റുന്നതിൽ നിർണായക പങ്ക് വഹിക്കുന്നുണ്ടെന്ന് ആഷ് അവെറി വ്യക്തമാക്കി.
എങ്കിലും, സംഭാവനകൾ മാത്രം ഈ പ്രതിസന്ധിക്ക് ശാശ്വത പരിഹാരമല്ലെന്ന് അവെറി ഊന്നിപ്പറയുന്നു. ദാരിദ്ര്യം, വർധിച്ചുവരുന്ന ജീവിതച്ചെലവ് തുടങ്ങിയ ഭക്ഷ്യ അരക്ഷിതാവസ്ഥയുടെ മൂലകാരണങ്ങൾ പരിഹരിക്കുന്നതിനായി ഘടനാപരമായ പരിഷ്കാരങ്ങൾ ആവശ്യമാണ്. “അടിസ്ഥാന ആവശ്യങ്ങൾ നിറവേറ്റാൻ ആളുകൾ ഇപ്പോഴും കഷ്ടപ്പെടുകയാണ്,” എന്ന് അവർ പറഞ്ഞു. ആളുകൾക്ക് ഭക്ഷ്യ ബാങ്കുകളെ ആശ്രയിക്കേണ്ടി വരാതിരിക്കാൻ പ്രവിശ്യയിൽ സമഗ്രമായ മാറ്റങ്ങൾ വരേണ്ടതുണ്ടെന്നും അവർ ആവശ്യപ്പെട്ടു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Food insecurity on the rise in Nova Scotia;
