ഒന്റാരിയോയുടെ വിവിധ ഭാഗങ്ങളിൽ ശക്തമായ കാറ്റിനും കനത്ത മഴയ്ക്കും സാധ്യതയുണ്ടെന്ന് എൻവയോൺമെൻ്റ് കാനഡ മുന്നറിയിപ്പ് നൽകി. ചില പ്രദേശങ്ങളിൽ മഞ്ഞുവീഴ്ചയ്ക്കും സാധ്യതയുണ്ട്. നിലവിൽ ടൊറന്റോ നഗരം ശക്തമായ ഇടിമിന്നൽ മുന്നറിയിപ്പിൻ്റെ കീഴിലാണ്. കനത്ത മഴ, ആലിപ്പഴം വീഴ്ച്ച, അതിശക്തമായ കാറ്റ് എന്നിവയ്ക്ക് സാധ്യതയുണ്ടെന്നും മുന്നറിയിപ്പിൽ പറയുന്നു. ഉച്ചവരെ കനത്ത മഴയോടൊപ്പം ഇടിമിന്നൽ തുടരാനാണ് സാധ്യത. മിന്നലേറ്റ് ഓരോ വർഷവും കനേഡിയൻ പൗരന്മാർക്ക് ജീവൻ നഷ്ടപ്പെടുകയും പരിക്കേൽക്കുകയും ചെയ്യുന്ന സാഹചര്യത്തിൽ, ഇടിമിന്നൽ കേൾക്കുമ്പോൾ സുരക്ഷിതമായ കെട്ടിടങ്ങൾക്കുള്ളിൽ അഭയം തേടണമെന്ന് എൻവയോൺമെൻ്റ് കാനഡ പ്രത്യേകം നിർദ്ദേശിച്ചു.
മിന്നൽ പ്രളയത്തിനും (പെട്ടന്നുണ്ടാകുന്ന വെള്ളപ്പൊക്കം) കാഴ്ചാ പ്രശ്നങ്ങൾക്കും സാധ്യതയുണ്ട്. അടിയന്തിര സാഹചര്യങ്ങൾ നേരിടുന്നതിന്, കാലാവസ്ഥാ ഭീഷണി ഉണ്ടാകുമ്പോൾ ഉടൻ തന്നെ സുരക്ഷിതമോ ശക്തമായതോ ആയ സ്ഥലങ്ങളിൽ അഭയം തേടാനും, വെള്ളം നിറഞ്ഞ റോഡുകളിലൂടെ വാഹനമോടിക്കുന്നത് ഒഴിവാക്കാനും എമർജൻസി മാനേജ്മെൻ്റ് ഓണ്ടാറിയോ നിർദ്ദേശിച്ചു. ടൊറന്റോ പോലീസ് രാവിലെ 10:30-ഓടെ ഡോൺ വാലി പാർക്ക്വേ – ഗാർഡിനർ എക്സ്പ്രസ്വേ ഭാഗത്ത് വെള്ളക്കെട്ട് രൂപപ്പെട്ടതായി മുന്നറിയിപ്പ് നൽകി. ഡ്രൈവർമാർ ശ്രദ്ധയോടെ വാഹനമോടിക്കണമെന്നും, ചില പാതകൾ നിലവിൽ അടച്ചിട്ടിരിക്കുന്നതിനാൽ വഴിതിരിച്ചുവിടലുകൾ ശ്രദ്ധിക്കണമെന്നും അധികൃതർ അറിയിച്ചു.
നഗരത്തിൽ ഒരേ സമയം നിലനിൽക്കുന്ന രണ്ടാമത്തെ കാലാവസ്ഥാ മുന്നറിയിപ്പാണിത്. ജൂൺ അവസാനത്തോടെ ആരംഭിച്ച ഉയർന്ന താപനില മുന്നറിയിപ്പ് ഇപ്പോഴും പ്രാബല്യത്തിലാണ്. പകൽ താപനില 29°C മുതൽ 32°C വരെയാകുമെന്നും, ഹ്യൂമിഡെക്സ് മൂല്യം (യഥാർത്ഥ താപനിലയും ആപേക്ഷിക ആർദ്രതയും ചേരുമ്പോഴുണ്ടാകുന്ന അനുഭവവേദ്യമായ ചൂട്) 40°C വരെ എത്തുമെന്നും മുന്നറിയിപ്പുണ്ട്. ചൊവ്വാഴ്ചയായിരിക്കും ഈ ആഴ്ചയിലെ ഏറ്റവും ഉയർന്ന താപനില രേഖപ്പെടുത്താൻ സാധ്യത. തണുത്ത കാലാവസ്ഥ ഈ ആഴ്ച അവസാനം വരെ എത്താൻ സാധ്യതയില്ലെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.
