റൺവേയിലെ സുരക്ഷാ സംവിധാനം പാളി; വിമാനവും ഫയർ ട്രക്കും കൂട്ടിയിടിച്ചത് സെക്കൻഡുകളുടെ വ്യത്യാസത്തിൽ; നിർണായക വിവരങ്ങൾ പുറത്ത്

ന്യൂയോർക്ക്: ലോകത്തെ ഏറ്റവും തിരക്കേറിയ വിമാനത്താവളങ്ങളിലൊന്നായ ന്യൂയോർക്കിലെ ലാഗ്വാർഡിയയിൽ എയർ കാനഡ വിമാനവും ഫയർ ട്രക്കും കൂട്ടിയിടിച്ചുണ്ടായ ദാരുണമായ അപകടത്തിൽ ഞെട്ടിക്കുന്ന വിവരങ്ങൾ പുറത്ത്. വിമാനം ലാൻഡ് ചെയ്യുന്നതിന് തൊട്ടുമുമ്പ് റൺവേയിലെ തടസ്സങ്ങളെക്കുറിച്ച് പൈലറ്റിന് സൂചന നൽകേണ്ട ‘റൺവേ വാണിംഗ് സിസ്റ്റം’ (Runway Warning System) പ്രവർത്തിച്ചില്ലെന്ന് നാഷണൽ ട്രാൻസ്പോർട്ടേഷൻ സേഫ്റ്റി ബോർഡ് (NTSB) അറിയിച്ചു. സംഭവത്തിൽ രണ്ട് പൈലറ്റുമാർ കൊല്ലപ്പെടുകയും നിരവധി യാത്രക്കാർക്ക് പരിക്കേൽക്കുകയും ചെയ്തിരുന്നു.

അപകടസമയത്ത് ഫയർ ട്രക്കിൽ ട്രാൻസ്‌പോണ്ടർ (Transponder) ഇല്ലാതിരുന്നതാണ് മുന്നറിയിപ്പ് സന്ദേശം ലഭിക്കാതെ പോയതിന് പ്രധാന കാരണമായി എൻ.ടി.എസ്.ബി ചെയർപേഴ്‌സൺ ജെനിഫർ ഹോമെൻഡി ചൂണ്ടിക്കാട്ടുന്നത്. വിമാനത്താവളത്തിലെ വാഹനങ്ങളിൽ ഇത്തരം സംവിധാനങ്ങൾ നിർബന്ധമാക്കണമെന്ന് തങ്ങൾ ഇതുവരെ ശുപാർശ ചെയ്തിട്ടില്ലെങ്കിലും, സുരക്ഷ മുൻനിർത്തി ഇത് അനിവാര്യമാണെന്ന് അവർ വാർത്താസമ്മേളനത്തിൽ വ്യക്തമാക്കി. റൺവേയിലോ ആകാശത്തോ ഉള്ള തടസ്സങ്ങളെക്കുറിച്ച് കൃത്യമായ വിവരങ്ങൾ എയർ ട്രാഫിക് കൺട്രോളർമാർക്ക് ലഭ്യമാകണമെന്നും അവർ കൂട്ടിച്ചേർത്തു.

ഞായറാഴ്ച രാത്രി വൈകിയാണ് മോൺട്രിയോളിൽ നിന്നെത്തിയ 76 യാത്രക്കാരുള്ള ജാസ് ഏവിയേഷൻ (എയർ കാനഡയ്ക്ക് വേണ്ടി സർവീസ് നടത്തുന്നത്) വിമാനം റൺവേയിൽ ഫയർ ട്രക്കുമായി കൂട്ടിയിടിച്ചത്. വിമാനം നിലത്തിറങ്ങാൻ കേവലം 100 അടി മാത്രം ഉയരത്തിൽ നിൽക്കെയാണ് റൺവേ മുറിച്ചുകടക്കാൻ ഫയർ ട്രക്കിന് എയർ ട്രാഫിക് കൺട്രോളിൽ നിന്ന് അനുമതി ലഭിച്ചത്. അനുമതി നൽകി 20-ാം സെക്കൻഡിൽ വിമാനം ട്രക്കിലേക്ക് ഇടിച്ചുകയറുകയായിരുന്നു. നിയന്ത്രണം വിട്ട വിമാനത്തിൽ നിന്ന് സീറ്റ് ബെൽറ്റ് ധരിച്ചിരുന്ന ഒരു ഫ്ലൈറ്റ് അറ്റൻഡന്റ് റൺവേയിലേക്ക് തെറിച്ചുവീണെങ്കിലും അത്ഭുതകരമായി രക്ഷപ്പെട്ടു.

മറ്റൊരു വിമാനത്തിന്റെ അടിയന്തര ലാൻഡിംഗുമായി ബന്ധപ്പെട്ട തിരക്കിലായിരുന്നു അപകടസമയത്ത് കൺട്രോൾ ടവറിലുണ്ടായിരുന്ന ഉദ്യോഗസ്ഥരെന്ന് പ്രാഥമിക വിവരമുണ്ട്. എന്നാൽ ഉദ്യോഗസ്ഥർക്ക് സംഭവിച്ച പിഴവാണെന്ന് ഇപ്പോൾ പറയാനാകില്ലെന്നും ജോലിഭാരം ഇതിന് കാരണമായിട്ടുണ്ടാകാമെന്നും ഹോമെൻഡി പറഞ്ഞു. വിമാനത്തിന്റെ കോക്പിറ്റ് വോയ്‌സ് റെക്കോർഡറും ഫ്ലൈറ്റ് ഡാറ്റ റെക്കോർഡറും കണ്ടെടുത്തു. ഫയർ ട്രക്കിലുണ്ടായിരുന്ന ജീവനക്കാരെയും കൺട്രോളർമാരെയും വരുംദിവസങ്ങളിൽ വിശദമായി ചോദ്യം ചെയ്യും.

അപകടത്തെത്തുടർന്ന് ലാഗ്വാർഡിയ വിമാനത്താവളത്തിലെ ഒരു റൺവേ ഇപ്പോഴും അടച്ചിട്ടിരിക്കുകയാണ്. ചൊവ്വാഴ്ച വിമാനത്താവളത്തിലെ കാൽഭാഗം സർവീസുകളും റദ്ദാക്കി. വരുംദിവസങ്ങളിലും വിമാന സർവീസുകളിൽ കാലതാമസം നേരിടാൻ സാധ്യതയുണ്ടെന്ന് അധികൃതർ അറിയിച്ചു.

fire-truck-in-deadly-laguardia-crash-lacked-equipment-needed-to-trigger-warning-system-ntsb-says

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt