വാൻകൂവർ: 2026-ലെ ഫിഫ ലോകകപ്പിന് മുന്നോടിയായി വാൻകൂവർ നഗരത്തിൽ നീക്കിവെച്ചിരുന്ന ആയിരക്കണക്കിന് ഹോട്ടൽ മുറികൾ പൊതുജനങ്ങൾക്ക് ലഭ്യമാകും. ഫിഫ അധികൃതർ തങ്ങളുടെ പക്കലുണ്ടായിരുന്ന ഹോട്ടൽ ബുക്കിങ്ങുകൾ വലിയ തോതിൽ റദ്ദാക്കിയതാണ് ഇതിന് കാരണം. എന്നാൽ പുതിയ മുറികൾ വിപണിയിൽ എത്തിയെങ്കിലും ഹോട്ടൽ നിരക്കുകളിൽ കുറവുണ്ടാകാൻ സാധ്യതയില്ലെന്ന് ബി.സി. ഹോട്ടൽ അസോസിയേഷൻ അറിയിച്ചു. ജൂൺ 11 മുതൽ ജൂലൈ 19 വരെയുള്ള ലോകകപ്പ് കാലയളവിൽ വാൻകൂവർ നഗരത്തിലെ 70 മുതൽ 80 ശതമാനം വരെ ബുക്കിങ്ങുകൾ ഫിഫ ഒഴിവാക്കിയതായാണ് റിപ്പോർട്ട്.
വാൻകൂവറിൽ മാത്രം ഏതാണ്ട് 15,000 നൈറ്റ് റൂം ബുക്കിങ്ങുകൾ ഫിഫ റദ്ദാക്കിയതായി അസോസിയേഷൻ പ്രസിഡന്റും സി.ഇ.ഒയുമായ പോൾ ഹോവ്സ് വ്യക്തമാക്കി. ലോകകപ്പ് ആതിഥേയത്വം വഹിക്കുന്ന ടൊറന്റോ ഉൾപ്പെടെയുള്ള മറ്റ് 16 നഗരങ്ങളിലും സമാനമായ രീതിയിൽ ബുക്കിങ്ങുകൾ ഒഴിവാക്കിയിട്ടുണ്ട്. നിലവിൽ ന്യൂയോർക്കിന് പിന്നാലെ ഹോട്ടൽ ബുക്കിങ്ങ്, ടിക്കറ്റ് വിൽപ്പന എന്നിവയിൽ ലോകത്ത് രണ്ടാം സ്ഥാനത്താണ് വാൻകൂവർ. ലോകകപ്പ് സമയത്ത് നഗരത്തിലെ ഹോട്ടലുകളിൽ 90 ശതമാനം വരെ ബുക്കിങ്ങ് ഉണ്ടാകുമെന്നാണ് അസോസിയേഷന്റെ വിലയിരുത്തൽ.
ലോകകപ്പ് പ്രമാണിച്ച് ഏകദേശം 350,000 സന്ദർശകർ വാൻകൂവറിൽ എത്തുമെന്നാണ് പ്രവിശ്യാ ഭരണകൂടം കണക്കാക്കുന്നത്. എന്നാൽ ടൂറിസം മേഖലയിൽ നിന്നും സമ്മിശ്ര പ്രതികരണങ്ങളാണ് ലഭിക്കുന്നത്. ലോകകപ്പ് കാലയളവിൽ മറ്റ് സഞ്ചാരികൾ നഗരം ഒഴിവാക്കാൻ സാധ്യതയുണ്ടെന്ന് ടൂർ ഓപ്പറേറ്റർമാർ ആശങ്ക പ്രകടിപ്പിച്ചു. സൈമൺ ഫ്രേസർ യൂണിവേഴ്സിറ്റിയുമായി ചേർന്ന് ആരാധകർക്കായി കുറഞ്ഞ നിരക്കിൽ താമസമൊരുക്കിയെങ്കിലും ബുക്കിങ്ങ് പ്രതീക്ഷിച്ച നിലയിലേക്ക് എത്തിയിട്ടില്ലെന്ന് വെസ്റ്റ് ട്രെക് ടൂർസ് അധികൃതർ അറിയിച്ചു.
അതേസമയം, മത്സരങ്ങൾ അടുക്കുന്നതോടെ നഗരത്തിൽ സന്ദർശകരുടെ തിരക്ക് വർദ്ധിക്കുമെന്ന് ഡെസ്റ്റിനേഷൻ വാൻകൂവർ സി.ഇ.ഒ റോയ്സ് ചൗവിൻ പ്രത്യാശ പ്രകടിപ്പിച്ചു. നിലവിൽ യാത്രാ പ്ലാനുകൾ തയ്യാറാക്കുന്നതിൽ സഞ്ചാരികൾ കാലതാമസം വരുത്തുന്നതാണ് ബുക്കിങ്ങ് കുറയാൻ കാരണമെന്ന് അദ്ദേഹം വിലയിരുത്തി. ലോകകപ്പ് വേദിയായ ബി.സി. പ്ലേസിൽ ജൂൺ 18-ന് നടക്കുന്ന മത്സരത്തിൽ കാനഡ ഖത്തറിനെ നേരിടും. ടൂർണമെന്റിനായി വാൻകൂവറിൽ 2.5 ശതമാനം താമസം നികുതി ഏർപ്പെടുത്താൻ ബി.സി. ഭരണകൂടം നേരത്തെ അനുമതി നൽകിയിരുന്നു.
FIFA World Cup Update; 15,000 rooms released, says B.C. Hotel Association
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
