ഫെഡറൽ ജീവനക്കാരുടെ ശമ്പള വിതരണത്തിലെ പിഴവുകൾക്ക് പേരുകേട്ട ഫീനിക്സ് പേ സിസ്റ്റം മാറ്റിസ്ഥാപിക്കാൻ അന്തിമ ഘട്ടത്തിൽ കാനഡ. കൃത്യതയും കാര്യക്ഷമതയും ഉറപ്പാക്കുന്ന ഡേഫോഴ്സ് എന്ന പുതിയ ആർട്ടിഫിഷ്യൽ ഇൻ്റലിജൻസ് അധിഷ്ഠിത സംവിധാനം ഉടൻ യാഥാർത്ഥ്യമാകും.
ഫെഡറൽ സർക്കാരിൻ്റെ ശമ്പള, മാനവ വിഭവശേഷി സേവനങ്ങൾ ആധുനികവൽക്കരിക്കുന്നതിൻ്റെ ഭാഗമായി ഫീനിക്സ് പേ സിസ്റ്റത്തിന് പകരമായി ഡേഫോഴ്സ് എന്ന പുതിയ എച്ച്ആർ ആൻഡ് പേറോൾ സംവിധാനം അന്തിമ നിർമ്മാണ പരീക്ഷണ ഘട്ടത്തിലാണെന്ന് പബ്ലിക് വർക്ക്സ് ആൻഡ് പ്രൊക്യുർമെൻ്റ് മന്ത്രി ജോയൽ ലൈറ്റ്ബൗണ്ട് സ്ഥിരീകരിച്ചു. ഇത് “ഉത്തരവാദിത്തപരവും സുതാര്യവുമായ” ഒരു നടപടിയാണെന്ന് അദ്ദേഹം വിശേഷിപ്പിച്ചു. ഒരു ആഗോള എച്ച്ആർ ടെക് കമ്പനി വികസിപ്പിച്ചെടുത്ത ഡേഫോഴ്സ്, പേറോൾ, ഹ്യൂമൻ റിസോഴ്സസ്, ടൈം മാനേജ്മെൻ്റ്, ടാലൻ്റ്, അനലിറ്റിക്സ് എന്നിവയ്ക്കായുള്ള ഒരു സംയോജിത പ്ലാറ്റ്ഫോമാണ്. വിവിധ വകുപ്പുകളിലുടനീളമുള്ള ഒന്നിലധികം എച്ച്ആർ സിസ്റ്റങ്ങളെ ഇത് മാറ്റിസ്ഥാപിക്കും.
അടുത്ത രണ്ട് വർഷത്തിനുള്ളിൽ, രണ്ട് വകുപ്പുകളിലും ഒരു പ്രത്യേക ഏജൻസിയിലും ഇത് ആദ്യഘട്ടമെന്ന നിലയിൽ നടപ്പിലാക്കും. 2016-ൽ ആരംഭിച്ച ഫീനിക്സ് പേ സിസ്റ്റം ആയിരക്കണക്കിന് ഫെഡറൽ ജീവനക്കാർക്ക് വ്യാപകമായ ശമ്പള പിഴവുകൾക്ക് കാരണമായിരുന്നു. 2017 മുതൽ ഫീനിക്സ് സിസ്റ്റം കൈകാര്യം ചെയ്യാൻ 3.5 ബില്യൺ ഡോളർ ഇതിനകം ചിലവഴിച്ചു. നിലവിൽ 327,000 തീർപ്പാക്കാത്ത ഇടപാടുകൾ ശേഷിക്കുന്നുണ്ട്. ഇതിൽ 331,000 സാമ്പത്തിക ഇടപാടുകളും 9,000 കൂട്ടായ വിലപേശലുമായി ബന്ധപ്പെട്ടവയുമാണ്. ഈ കേസുകളിൽ 49% ഒരു വർഷത്തിൽ കൂടുതൽ പഴക്കമുള്ളവയാണ്. ഫീനിക്സുമായി ബന്ധപ്പെട്ട പ്രശ്നങ്ങൾക്ക് യൂണിയനിലെ ജീവനക്കാർക്ക് നഷ്ടപരിഹാരം നൽകുന്നതിന് 2019-2020 ൽ സർക്കാരും യൂണിയനുകളും കരാറുകളിൽ എത്തിയിരുന്നു. 2025 ഏപ്രിലിൽ, നോൺ-യൂണിയൻ, കാഷ്വൽ തൊഴിലാളികൾക്കായുള്ള ക്ലാസ്-ആക്ഷൻ സെറ്റിൽമെൻ്റ് ക്യൂബെക്കിലെ സുപ്പീരിയർ കോടതി അംഗീകരിക്കുകയും ചെയ്തു. ആധുനികവും എഐ അടിസ്ഥാനമാക്കിയുള്ളതുമായ ഡേഫോഴ്സ് സിസ്റ്റം നടപ്പിലാക്കുന്നതോടെ, ഫെഡറൽ പേറോൾ, എച്ച്ആർ പ്രവർത്തനങ്ങളിൽ വിശ്വാസവും കൃത്യതയും കാര്യക്ഷമതയും പുനഃസ്ഥാപിക്കാൻ കഴിയുമെന്നാണ് കാനഡ പ്രതീക്ഷിക്കുന്നത്. ഫീനിക്സ് പേ പ്രശ്നങ്ങൾക്ക് ഇതോടെ അന്ത്യമാകുമെന്നും കരുതപ്പെടുന്നു.
