ഒട്ടാവ: കാനഡയിൽ താമസിക്കുന്ന യുക്രെയ്ൻ പൗരന്മാർക്കും അവരുടെ കുടുംബാംഗങ്ങൾക്കും താൽക്കാലിക താമസാനുമതി (Temporary Resident Status) നീട്ടിനൽകുന്നതിനായി പുതിയ ഇളവുകൾ പ്രഖ്യാപിച്ചു. ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) പുറപ്പെടുവിച്ച പുതിയ നയപ്രകാരം, യുക്രെയ്ൻ സ്വദേശികൾക്ക് വർക്ക് പെർമിറ്റും സ്റ്റഡി പെർമിറ്റും ലഭിക്കുന്നതിനുള്ള മാനദണ്ഡങ്ങളിൽ വലിയ ഇളവുകളാണ് വരുത്തിയിരിക്കുന്നത്. 2026 ജനുവരി 16 മുതൽ പ്രാബല്യത്തിൽ വന്ന ഈ നിയമം 2027 മാർച്ച് 31 വരെ തുടരും.
കാനഡയിൽ കുടുംബാംഗങ്ങളുള്ള യുക്രെയ്ൻ പൗരന്മാർക്കായി നടപ്പിലാക്കിയ പ്രത്യേക സ്ഥിരതാമസ പദ്ധതിയിൽ (Permanent Residence) ഇതിനകം അപേക്ഷിച്ചവർക്കാണ് ഈ ഇളവുകൾ ലഭ്യമാകുക. നിലവിൽ കാനഡയിൽ സാധുവായ താമസാനുമതി ഉള്ളവർക്കും, വിസ കാലാവധി കഴിഞ്ഞ് 90 ദിവസത്തിനുള്ളിൽ അത് പുനഃസ്ഥാപിക്കാൻ അപേക്ഷ നൽകിയവർക്കും ഇതിന്റെ പ്രയോജനം ലഭിക്കും. സാധാരണഗതിയിൽ ഇത്തരം പെർമിറ്റുകൾക്ക് കാനഡയ്ക്ക് പുറത്തുനിന്നാണ് അപേക്ഷിക്കേണ്ടതെങ്കിലും പുതിയ നയം അനുസരിച്ച് രാജ്യത്തിനകത്തു നിന്നുതന്നെ നടപടികൾ പൂർത്തിയാക്കാം.
സ്ഥിരതാമസത്തിനുള്ള അപേക്ഷ നൽകുന്ന സമയത്ത് സാധുവായ വിസ ഉണ്ടായിരുന്നവർക്കും, അപേക്ഷ നൽകുന്നതിന് 90 ദിവസം മുൻപ് വരെ വിസ കാലാവധി ഉണ്ടായിരുന്നവർക്കും ഈ ആനുകൂല്യം ലഭ്യമാണ്. മതിയായ അനുമതിയില്ലാതെ ജോലി ചെയ്യുകയോ പഠിക്കുകയോ ചെയ്തവർക്കും നിശ്ചിത കാലാവധി കഴിഞ്ഞും രാജ്യത്ത് തുടർന്നവർക്കും പുതിയ നയം ഇളവുകൾ നൽകുന്നുണ്ട്. 2026 മാർച്ച് 31-ന് മുൻപായി ഇത്തരം അപേക്ഷകൾ സമർപ്പിക്കണം.
സ്ഥിരതാമസ അപേക്ഷയുടെ ഔദ്യോഗിക രസീത് (Acknowledgement of Receipt) ലഭിക്കാത്തവർക്കും പുതിയ പെർമിറ്റുകൾക്കായി അപേക്ഷിക്കാവുന്നതാണ്. റഷ്യ-യുക്രെയ്ൻ യുദ്ധത്തെത്തുടർന്ന് ദുരിതമനുഭവിക്കുന്ന കുടുംബങ്ങളെ സഹായിക്കാൻ 2023 ഒക്ടോബറിൽ ആരംഭിച്ച പ്രത്യേക പദ്ധതിയുടെ തുടർച്ചയായാണ് ഈ നീക്കം. കാനഡയിൽ പൗരത്വമോ സ്ഥിരതാമസമോ ഉള്ള കുടുംബാംഗങ്ങളുള്ള യുക്രെയ്ൻ പൗരന്മാർക്കാണ് ഈ പദ്ധതിയിലൂടെ മുൻഗണന നൽകുന്നത്.
ഏകദേശം 13,000-ത്തിലധികം അപേക്ഷകളിലായി 24,000-ത്തോളം യുക്രെയ്ൻ പൗരന്മാരാണ് ഈ പദ്ധതിയിലൂടെ സ്ഥിരതാമസത്തിനായി അപേക്ഷ നൽകിയിരിക്കുന്നത്. 2022 മാർച്ചിൽ ആരംഭിച്ച കാനഡ-യുക്രെയ്ൻ അടിയന്തര യാത്രാ പദ്ധതിക്ക് (CUAET) പിന്നാലെയാണ് കാനഡ ഈ പുതിയ മാനുഷിക നടപടി സ്വീകരിച്ചിരിക്കുന്നത്. സാഹചര്യം വിലയിരുത്തി ഏത് സമയത്തും ഈ താൽക്കാലിക നയത്തിൽ മാറ്റം വരുത്താൻ സർക്കാരിന് അധികാരമുണ്ടാകും.
federal-government-launches-temporary-measure-for-ukrainians-to-maintain-legal-status-in-canada
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
