ഒട്ടാവ: പാസ്പോർട്ട് സേവനങ്ങൾ നിശ്ചിത സമയപരിധിക്കുള്ളിൽ ലഭ്യമാക്കിയില്ലെങ്കിൽ അപേക്ഷകർക്ക് ഫീസ് പൂർണ്ണമായും തിരികെ നൽകാൻ ഫെഡറൽ സർക്കാർ. അപേക്ഷ സമർപ്പിച്ച് 30 പ്രവൃത്തി ദിവസങ്ങൾ കഴിഞ്ഞിട്ടും പാസ്പോർട്ട് നടപടികൾ പൂർത്തിയാകാത്ത പക്ഷം തുക റീഫണ്ട് ചെയ്യുന്ന പുതിയ നയമാണ് കുടിയേറ്റ മന്ത്രി ലെന മെറ്റ്ലെഗ് ദിയാബ് ബുധനാഴ്ച പ്രഖ്യാപിച്ചത്. സർക്കാർ സേവനങ്ങളിൽ കൂടുതൽ ഉത്തരവാദിത്തവും വിശ്വാസ്യതയും ഉറപ്പാക്കുന്നതിന്റെ ഭാഗമായാണ് ഈ വിപ്ലവകരമായ തീരുമാനം നടപ്പിലാക്കുന്നത്.
പുതിയ “30 days or free” എന്ന നയം പ്രകാരം, നടപടിക്രമങ്ങൾ വൈകുന്ന അപേക്ഷകർക്ക് യാതൊരു പ്രത്യേക അപേക്ഷയും കൂടാതെ തന്നെ ഫീസ് സ്വമേധയാ തിരികെ ലഭിക്കും. പൂരിപ്പിച്ച അപേക്ഷാ ഫോം, ഫോട്ടോ, ആവശ്യമായ രേഖകൾ എന്നിവ സഹിതം ഫീസ് അടച്ച് അപേക്ഷ പൂർണ്ണമായി സമർപ്പിക്കുന്ന ദിവസം മുതലാണ് സമയപരിധി കണക്കാക്കുക. പാസ്പോർട്ട് പ്രിന്റ് ചെയ്ത് പരിശോധന പൂർത്തിയാക്കുന്നത് വരെയുള്ള സമയമാണ് ഇതിൽ ഉൾപ്പെടുന്നത്. എന്നാൽ പാസ്പോർട്ട് തപാൽ വഴി അപേക്ഷകന് ലഭിക്കാൻ എടുക്കുന്ന സമയം ഈ പരിധിയിൽ ഉൾപ്പെടില്ലെന്ന് അധികൃതർ വ്യക്തമാക്കി.
കാനഡക്കാർക്ക് കൂടുതൽ സുഗമമായ സേവനം ഉറപ്പാക്കുകയാണ് ഇതിലൂടെ ലക്ഷ്യമിടുന്നതെന്ന് തൊഴിൽ മന്ത്രി പാറ്റി ഹാജ്ദു പറഞ്ഞു. അതേസമയം, അടിയന്തര ആവശ്യങ്ങൾക്കായി നൽകുന്ന എക്സ്പ്രസ് അപേക്ഷകൾക്കും അഭയാർത്ഥി യാത്രാ രേഖകൾക്കും ഈ ഗ്യാരണ്ടി ബാധകമായിരിക്കില്ല. കൂടാതെ, അപ്രതീക്ഷിതമായ പ്രവർത്തന തടസ്സങ്ങൾ മൂലമോ അസാധാരണ സാഹചര്യങ്ങൾ മൂലമോ ഉണ്ടാകുന്ന കാലതാമസത്തിനും റീഫണ്ട് ലഭിക്കില്ലെന്ന് സർക്കാർ അറിയിച്ചു. നിലവിൽ ഭൂരിഭാഗം പാസ്പോർട്ടുകളും കൃത്യസമയത്ത് വിതരണം ചെയ്യുന്നുണ്ടെങ്കിലും, പുതിയ നയം സേവന നിലവാരം കൂടുതൽ മെച്ചപ്പെടുത്താൻ സഹായിക്കും.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Federal government announces new policy to refund passport fee if passport is delayed
