വിനിപെഗ്: മാനിറ്റോബയിലെ വിവിധ ഫെഡറൽ സർക്കാർ വകുപ്പുകളിൽ നടപ്പിലാക്കുന്ന തൊഴിൽ വെട്ടിക്കുറയ്ക്കലുകളുടെ കണക്കുകളിൽ കൃത്യമായ വ്യക്തതയില്ലെന്ന് പബ്ലിക് സർവീസ് അലയൻസ് ഓഫ് കാനഡ. കനേഡിയൻ ഫുഡ് ഇൻസ്പെക്ഷൻ ഏജൻസി (CFIA), സ്റ്റാറ്റിസ്റ്റിക്സ് കാനഡ, സർവീസ് കാനഡ തുടങ്ങിയ പ്രധാന സ്ഥാപനങ്ങളിലെ ചെലവ് ചുരുക്കൽ നടപടികൾ മാനിറ്റോബയിലെ ജീവനക്കാരെ എങ്ങനെ ബാധിക്കുമെന്ന് യൂണിയൻ അധികൃതർ പരിശോധിച്ചുവരികയാണ്.
രാജ്യവ്യാപകമായി 16,000 പൊതുസേവന തസ്തികകൾ കുറയ്ക്കാനുള്ള ഫെഡറൽ സർക്കാർ തീരുമാനത്തിന്റെ ഭാഗമായാണ് ഈ നടപടി. ഈ ആഴ്ചയുടെ തുടക്കം മുതൽ മാനിറ്റോബയിലെ ജീവനക്കാർക്ക് പിരിച്ചുവിടൽ സംബന്ധിച്ച പ്രാഥമിക നോട്ടീസുകൾ ലഭിച്ചു തുടങ്ങിയതായി പി.എസ്.എ.സി (PSAC) റീജിയണൽ എക്സിക്യൂട്ടീവ് വൈസ് പ്രസിഡന്റ് മാരിയാൻ ഹ്ലാദുൻ അറിയിച്ചു. എത്ര തസ്തികകൾ ഒഴിവാക്കുമെന്നോ എപ്പോൾ ഈ നടപടികൾ പൂർത്തിയാകുമെന്നോ ഉള്ള കാര്യത്തിൽ സർക്കാർ കൃത്യമായ വിവരം നൽകുന്നില്ലെന്ന് യൂണിയൻ കുറ്റപ്പെടുത്തി.
ഭക്ഷ്യ സുരക്ഷാ പരിശോധകർ, ശാസ്ത്രജ്ഞർ, ഗവേഷകർ എന്നിവരുൾപ്പെടെയുള്ള വിദഗ്ധ തൊഴിലാളികളെയാണ് ഈ പിരിച്ചുവിടൽ പ്രധാനമായും ബാധിക്കുന്നത്. പോർട്ടേജ് ലാ പ്രെയറിയിലുള്ള അഗ്രികൾച്ചർ ആൻഡ് അഗ്രി-ഫുഡ് കാനഡയുടെ ഗവേഷണ ഫാം അടച്ചുപൂട്ടാൻ സർക്കാർ ഇതിനകം തീരുമാനിച്ചിട്ടുണ്ട്. രാജ്യവ്യാപകമായി നൂറുകണക്കിന് ഭക്ഷ്യ പരിശോധന തസ്തികകൾ ഇല്ലാതാക്കുന്നത് പൊതുജനാരോഗ്യത്തെ ബാധിക്കുമെന്ന് മാരിയാൻ ഹ്ലാദുൻ മുന്നറിയിപ്പ് നൽകി. നിലവിൽ തന്നെ ജോലിഭാരമുള്ള ഇൻസ്പെക്ടർമാരുടെ എണ്ണം കുറയ്ക്കുന്നത് ഭക്ഷ്യവസ്തുക്കളുടെ ഗുണനിലവാര പരിശോധനയിൽ വീഴ്ചയുണ്ടാക്കാൻ കാരണമാകുമെന്ന് അവർ ചൂണ്ടിക്കാട്ടി.
അതേസമയം, പ്രവർത്തനക്ഷമത വർധിപ്പിക്കാനുദ്ദേശിച്ചുള്ള ലക്ഷ്യബദ്ധമായ മാറ്റങ്ങളുടെ ഭാഗമായാണ് ഈ നടപടിയെന്ന് കനേഡിയൻ ഫുഡ് ഇൻസ്പെക്ഷൻ ഏജൻസി പ്രതികരിച്ചു. എന്നാൽ, ശാസ്ത്ര മേഖലയിലെ വെട്ടിക്കുറയ്ക്കലുകൾ തെറ്റായ സമയത്താണെന്ന് വിദ്ഗ്ധർ അഭിപ്രായപ്പെടുന്നു. അമേരിക്കയിൽ സമാനമായ രീതിയിൽ ഗവേഷകർക്ക് തൊഴിൽ നഷ്ടപ്പെടുന്ന സാഹചര്യത്തിൽ, കാനഡ ശാസ്ത്ര മേഖലയിൽ നിക്ഷേപം വർധിപ്പിക്കുകയാണ് വേണ്ടതെന്ന് മാനിറ്റോബ സർവകലാശാലയിലെ അസിസ്റ്റന്റ് പ്രൊഫസർ ഡിലൻ മാക്കേ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Federal employee job cuts in Manitoba; Government without disclosing figures, union expresses concern
