ഹരീഷ് റാണയ്ക്ക് വിട; സംസ്കാര ചടങ്ങുകൾ ഇന്ന് ഗാസിയാബാദിൽ

ഗാസിയാബാദ്: നീണ്ട 13 വർഷത്തെ നിശബ്ദതയ്ക്കും തീരാവേദനകൾക്കും വിരാമമിട്ട് യാത്രയായ ഹരീഷ് റാണയുടെ സംസ്കാര ചടങ്ങുകൾ ഇന്ന് നടക്കും. ഉത്തർപ്രദേശിലെ ഗാസിയാബാദിൽ രാവിലെയാണ് ചടങ്ങുകൾ നിശ്ചയിച്ചിരിക്കുന്നത്. അടുത്ത കുടുംബാംഗങ്ങളും സുഹൃത്തുക്കളും മാത്രം പങ്കെടുക്കുന്ന ലളിതമായ ചടങ്ങുകളോടെയാകും ഹരീഷ് റാണയ്ക്ക് നാട് വിടനൽകുക. ഇന്നലെ വൈകിട്ടോടെയാണ് ഹരീഷ് മരണത്തിന് കീഴടങ്ങിയതായി ഔദ്യോഗിക സ്ഥിരീകരണം ഉണ്ടായത്.

2018-ൽ സുപ്രീം കോടതി ദയാവധം നിയമവിധേയമാക്കിയതിന് ശേഷം ഇന്ത്യയിൽ ഇത്തരത്തിൽ മരിക്കാൻ അനുമതി ലഭിക്കുന്ന ആദ്യ വ്യക്തിയാണ് ഹരീഷ് റാണ. അന്തസ്സായി മരിക്കാനുള്ള അവകാശം ഓരോ പൗരനുമുണ്ടെന്ന് നിരീക്ഷിച്ചുകൊണ്ട് മാർച്ച് 11-നാണ് സുപ്രീം കോടതി ഈ ചരിത്രപരമായ ഉത്തരവ് പുറപ്പെടുവിച്ചത്. 32 വയസ്സുകാരനായ ഹരീഷ് കഴിഞ്ഞ 13 വർഷമായി പൂർണ്ണമായും യന്ത്രസഹായത്തോടെയാണ് ജീവൻ നിലനിർത്തിയിരുന്നത്. മകന്റെ ദുരിതാവസ്ഥ കണ്ട് മനംനൊന്ത മാതാപിതാക്കൾ നൽകിയ ഹർജി പരിഗണിച്ചായിരുന്നു കോടതിയുടെ ഇടപെടൽ.

2013 ഓഗസ്റ്റ് 20-നാണ് ഹരീഷ് റാണയുടെ ജീവിതം മാറിമറിഞ്ഞത്. ചണ്ഡീഗഡിൽ സിവിൽ എൻജിനീയറിങ് പഠിച്ചുകൊണ്ടിരിക്കെ ഹോസ്റ്റൽ കെട്ടിടത്തിന്റെ നാലാം നിലയിൽ നിന്ന് വീണ് തലയ്ക്ക് ഗുരുതരമായി പരിക്കേൽക്കുകയായിരുന്നു. അപകടത്തെത്തുടർന്ന് 100 ശതമാനം വൈകല്യം സംഭവിച്ച ഹരീഷിന് പിന്നീട് ഒരിക്കലും കണ്ണുതുറക്കാനോ കൈകാലുകൾ ചലിപ്പിക്കാനോ കഴിഞ്ഞിരുന്നില്ല. ചികിത്സ തുടർന്നിട്ട് കാര്യമില്ലെന്ന ഡോക്ടർമാരുടെ റിപ്പോർട്ടും മാതാപിതാക്കളുടെ അപേക്ഷയും മുൻനിർത്തി ജസ്റ്റിസ് ജെ.ബി. പർദ്ദിവാല, ജസ്റ്റിസ് കെ.വി. വിശ്വനാഥൻ എന്നിവരടങ്ങിയ ബെഞ്ചാണ് ചികിത്സ ഘട്ടംഘട്ടമായി അവസാനിപ്പിക്കാൻ നിർദ്ദേശിച്ചത്.

കോടതി ഉത്തരവിനെത്തുടർന്ന് എയിംസിലെ പാലിയേറ്റീവ് കെയർ വിഭാഗത്തിലേക്ക് മാറ്റിയ ഹരീഷിന് നൽകിയിരുന്ന ജീവൻരക്ഷാ സംവിധാനങ്ങൾ ഡോ. സീമ മിശ്രയുടെ നേതൃത്വത്തിലുള്ള പത്തംഗ സംഘം ഘട്ടംഘട്ടമായി പിൻവലിക്കുകയായിരുന്നു. അന്ത്യനിമിഷങ്ങളിൽ പ്രിയപ്പെട്ട അമ്മയുടെ സാമീപ്യം മാത്രമായിരുന്നു ഹരീഷിന് കൂട്ടുണ്ടായിരുന്നത്. വിധി വന്ന് കൃത്യം 13-ാം ദിവസം വൈകിട്ട് 4.10-ഓടെയാണ് ഹരീഷ് വേദനയില്ലാത്ത ലോകത്തേക്ക് യാത്രയായത്. നിയമത്തിനപ്പുറം മനുഷ്യത്വപരമായ പരിഗണന നൽകിയ ഈ വിധി ഇന്ത്യൻ നിയമചരിത്രത്തിലെ സുപ്രധാന ഏടായി മാറും.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Farewell to Harish Rana; Funeral services to be held in Ghaziabad today