ലോകത്തെ ഏറ്റവും തിരക്കേറിയ വാണിജ്യ പാതയിൽ ഉടമസ്ഥാവകാശ തർക്കം: ഗോർഡി ഹോവ് പാലം കാനഡയുടേതോ അമേരിക്കയുടേതോ?

ടൊറന്റോ: അമേരിക്കയെയും കാനഡയെയും ബന്ധിപ്പിക്കുന്ന അതിപ്രധാനമായ ഗോർഡി ഹോവ് അന്താരാഷ്ട്ര പാലത്തിന്റെ നിർമ്മാണച്ചെലവ് പൂർണ്ണമായും കാനഡ വഹിക്കുന്നതിനെച്ചൊല്ലി പുതിയ രാഷ്ട്രീയ ചർച്ചകൾക്കാണ് വഴിതുറന്നരിക്കുന്നത്. 2012-ലെ ‘കാനഡ-മിഷിഗൺ ക്രോസിംഗ്’ കരാർ പ്രകാരമാണ് നിർമ്മാണത്തിനാവശ്യമായ തുക കാനഡ മുൻകൂറായി നൽകുന്നത്. എന്നാൽ, പാലത്തിന്റെ ഉടമസ്ഥാവകാശം കാനഡയ്ക്കാണ് എന്നാരോപിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ് രംഗത്തെത്തിയതോടെയാണ് വിഷയം വീണ്ടും ആഗോള ശ്രദ്ധയാകർഷിച്ചത്.

കാനഡയും അമേരിക്കയും തമ്മിലുള്ള വ്യാപാരത്തിന്റെ 25 ശതമാനത്തിലധികം കടന്നുപോകുന്ന വിൻസർ-ഡെട്രോയിറ്റ് പാതയിലെ ഗതാഗതക്കുരുക്ക് കുറയ്ക്കുന്നതിനായി വിഭാവനം ചെയ്ത ഈ പദ്ധതിയുടെ നിർമ്മാണ പുരോഗതി ഇപ്പോൾ സജീവ ചർച്ചയായിരിക്കുകയാണ്. 2000-ാമാണ്ടിന്റെ തുടക്കത്തിൽ ഇരുരാജ്യങ്ങളും നടത്തിയ സംയുക്ത പഠനങ്ങളുടെ അടിസ്ഥാനത്തിലാണ് പുതിയൊരു പാലം വേണമെന്ന ആവശ്യം ഉയർന്നത്. നിലവിലുള്ള അംബാസഡർ ബ്രിഡ്ജിലെ തിരക്ക് കുറയ്ക്കാൻ സർക്കാർ ഉടമസ്ഥതയിലുള്ള പുതിയ പാലം അനിവാര്യമാണെന്ന് 2004-ഓടെ വ്യക്തമായിരുന്നു. എന്നാൽ, മിഷിഗൺ നിയമസഭ പദ്ധതിക്കായി പണം അനുവദിക്കാൻ വിസമ്മതിച്ചതോടെയാണ് കാനഡ നിർമ്മാണച്ചെലവ് ഏറ്റെടുക്കാൻ തയ്യാറായത്.

2012-ൽ ഒപ്പിട്ട കരാർ പ്രകാരം പാലം രൂപകൽപ്പന ചെയ്യുന്നതും നിർമ്മിക്കുന്നതും പ്രവർത്തിപ്പിക്കുന്നതും കാനഡയാണ്. 6.4 ബില്യൺ ഡോളർ ചിലവ് വരുന്ന ഈ ബൃഹത് പദ്ധതിയുടെ ഇരുവശങ്ങളിലുമുള്ള നിർമ്മാണപ്രവർത്തനങ്ങൾ കാനഡയുടെ സാമ്പത്തിക സഹായത്തോടെയാണ് നടക്കുന്നത്. ഇതിനെതിരെയാണ് ട്രംപ് ഇപ്പോൾ വിമർശനം ഉയർത്തിയിരിക്കുന്നത്. നിർമ്മാണച്ചെലവ് കാനഡയാണ് വഹിക്കുന്നതെങ്കിലും, പാലം പ്രവർത്തനക്ഷമമാകുന്നതോടെ ടോൾ വരുമാനത്തിലൂടെ ഈ തുക തിരിച്ചുപിടിക്കാനാണ് പദ്ധതി.

കാനഡ മുടക്കിയ പണം ലഭിച്ചുകഴിഞ്ഞാൽ പാലത്തിൽ നിന്നുള്ള ലാഭം മിഷിഗൺ സംസ്ഥാനവുമായി പങ്കുവയ്ക്കുമെന്ന് കരാറിൽ വ്യക്തമാക്കുന്നുണ്ട്. വടക്കേ അമേരിക്കയിലെ ഏറ്റവും തിരക്കേറിയ വാണിജ്യ പാതയായ ഇവിടെ ഇരുരാജ്യങ്ങളിൽ നിന്നുമുള്ള ഇരുമ്പും ഉരുക്കുമാണ് നിർമ്മാണത്തിന് ഉപയോഗിച്ചിരിക്കുന്നത്. നിയമപോരാട്ടങ്ങളും രാഷ്ട്രീയ പ്രതിസന്ധികളും കടന്നുവന്ന പദ്ധതി ഇപ്പോൾ പൂർത്തിയാകാനിരിക്കെ, നഷ്ടപരിഹാരം നൽകാതെ പാലം തുറക്കാൻ അനുവദിക്കില്ലെന്ന ട്രംപിന്റെ നിലപാട് ഇരുരാജ്യങ്ങളും തമ്മിലുള്ള നയതന്ത്ര ബന്ധത്തിൽ എന്ത് മാറ്റമുണ്ടാക്കുമെന്നാണ് ലോകം ഉറ്റുനോക്കുന്നത്.

fact-check-canada-paid-for-gordie-howe-bridge-but-doesnt-own-it-alone

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82