കാനഡയിൽ ഇൻഫ്ലുവൻസ വ്യാപനം രൂക്ഷം: എട്ട് മാസം ഗർഭിണിയായ യുവതി ഗുരുതരാവസ്ഥയിൽ ആശുപത്രിയിൽ

ആൽബർട്ട: കാനഡയിൽ ശൈത്യകാല അവധിക്കാലം ആരംഭിക്കാനിരിക്കെ ഇൻഫ്ലുവൻസ വൈറസ് ബാധ അതിശക്തമാകുന്നു. രോഗബാധയെത്തുടർന്ന് എട്ട് മാസം ഗർഭിണിയായ യുവതിയെ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചു. ആൽബർട്ടയിലെ എയർഡ്രി സ്വദേശിനിയായ ഷാർലറ്റ് സ്വെയ്‌നാണ് (Charlotte Swain) ഒൻപത് ദിവസത്തോളം ആശുപത്രിയിൽ ചികിത്സയിൽ കഴിഞ്ഞത്.

കടുത്ത ചുമയും ശ്വാസതടസ്സവും അനുഭവപ്പെട്ടതിനെത്തുടർന്നാണ് ഷാർലറ്റിനെ ആശുപത്രിയിൽ പ്രവേശിപ്പിച്ചത്. പരിശോധനയിൽ ഇവർക്ക് ഇൻഫ്ലുവൻസ എ (Influenza A) സ്ഥിരീകരിക്കുകയും ഇത് പിന്നീട് ന്യൂമോണിയയായി മാറുകയും ചെയ്തു. രോഗം മൂർച്ഛിച്ചതിനെത്തുടർന്ന് ശ്വാസകോശത്തിന്റെ പ്രവർത്തനം തകരാറിലാകുകയും സെപ്റ്റിക് (Septic) അവസ്ഥയിലേക്ക് നീങ്ങുകയും ചെയ്തു. 24 മണിക്കൂറിനുള്ളിൽ ആരോഗ്യനില വഷളായതായി ഷാർലറ്റ് പറഞ്ഞു.

ഗർഭസ്ഥ ശിശുവിന്റെ സുരക്ഷ കണക്കിലെടുത്ത് ഡോക്ടർമാർ പ്രത്യേക മുൻകരുതലുകൾ സ്വീകരിച്ചിരുന്നു. അകാല പ്രസവത്തിനുള്ള സാധ്യത മുന്നിൽക്കണ്ട് കുട്ടിയുടെ ശ്വാസകോശ വളർച്ചയ്ക്കായി സ്റ്റിറോയ്ഡ് കുത്തിവയ്പ്പുകളും നൽകി. എന്നാൽ നിലവിൽ ആരോഗ്യനിലയിൽ പുരോഗതിയുണ്ടെന്നും മറ്റു സങ്കീർണ്ണതകളില്ലാതെ ഷാർലറ്റ് വീട്ടിൽ തിരിച്ചെത്തിയതായും ഔദ്യോഗിക വൃത്തങ്ങൾ അറിയിച്ചു. പൂർണ്ണ ആരോഗ്യവതിയാകാൻ ഇനിയും സമയമെടുക്കുമെന്ന് ഇവർ പറഞ്ഞു.

കാനഡയിലെ പ്രയറി (Prairies) മേഖലകളിൽ ഇൻഫ്ലുവൻസ വ്യാപനം വളരെ കൂടുതലാണെന്നാണ് ഗവൺമെന്റ് കണക്കുകൾ സൂചിപ്പിക്കുന്നത്. നിലവിൽ 32.4 ശതമാനമാണ് ഇവിടുത്തെ ടെസ്റ്റ് പോസിറ്റിവിറ്റി നിരക്ക്. സസ്കാച്ചവൻ (Saskatchewan) പ്രവിശ്യയിൽ കഴിഞ്ഞ ഒരു മാസത്തിനിടെ രോഗബാധിതരുടെ എണ്ണം മൂന്നിരട്ടിയായി വർധിച്ചു. ആശുപത്രികളിലും തീവ്രപരിചരണ വിഭാഗങ്ങളിലും പ്രവേശിപ്പിക്കപ്പെടുന്നവരുടെ എണ്ണത്തിലും വലിയ വർധനവുണ്ട്.

രോഗവ്യാപനം ശക്തമാകുന്ന സാഹചര്യത്തിൽ ആരോഗ്യവകുപ്പ് ജാഗ്രതാ നിർദ്ദേശം നൽകിയിട്ടുണ്ട്. സസ്കാച്ചവനിൽ കഴിഞ്ഞ രണ്ടാഴ്ചയ്ക്കിടെ ഇൻഫ്ലുവൻസ ബാധിച്ച് ഒരാൾ മരിക്കുകയും ചെയ്തു. പ്രായമായവർ, കുട്ടികൾ, ഗർഭിണികൾ, മറ്റ് രോഗബാധയുള്ളവർ എന്നിവർ പ്രത്യേക ജാഗ്രത പാലിക്കണമെന്ന് മെഡിക്കൽ ഓഫീസർ ഡോ. സൈമൺ കപാജ് അറിയിച്ചു. ക്രിസ്മസ് പ്രമാണിച്ച് ആളുകൾ ഒത്തുചേരുന്നതും യാത്ര ചെയ്യുന്നതും വ്യാപനം വർധിപ്പിക്കാൻ സാധ്യതയുണ്ട്.

രോഗബാധ തടയാൻ വാക്സിനേഷൻ സ്വീകരിക്കുക എന്നതാണ് ഏറ്റവും ഫലപ്രദമായ മാർഗമെന്ന് ഡോക്ടർമാർ നിർദ്ദേശിക്കുന്നു. രോഗവ്യാപനം തുടരുന്ന സാഹചര്യത്തിൽ ഇനിയും വാക്സിൻ എടുക്കാത്തവർ എത്രയും വേഗം പ്രതിരോധ കുത്തിവയ്പ്പ് എടുക്കണമെന്ന് അധികൃതർ ആവശ്യപ്പെട്ടു.

extremely-painful-alberta-woman-expecting-baby-hospitalized-with-influenza

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt