ഒട്ടാവ: 2026-ലെ കാനഡയുടെ ആദ്യ എക്സ്പ്രസ് എൻട്രി നറുക്കെടുപ്പ് വിവരങ്ങൾ ഇമിഗ്രേഷൻ വിഭാഗമായ ഐആർസിസി (IRCC) പുറത്തുവിട്ടു. പ്രൊവിൻഷ്യൽ നോമിനി പ്രോഗ്രാം അഥവാ പിഎൻപി (PNP) വഴി തിരഞ്ഞെടുക്കപ്പെട്ട 574 ഉദ്യോഗാർത്ഥികൾക്കാണ് സ്ഥിരതാമസത്തിന് അപേക്ഷിക്കാനുള്ള ക്ഷണം (ITA) ഇത്തവണ ലഭിച്ചിരിക്കുന്നത്. ജനുവരി 5ന് നടന്ന നറുക്കെടുപ്പിൽ പരിഗണിക്കപ്പെടുന്നതിനായി ഉദ്യോഗാർത്ഥികൾക്ക് കുറഞ്ഞത് 711 സിആർഎസ് (CRS) സ്കോർ ആവശ്യമായിരുന്നു. കൂടാതെ 2025 ഒക്ടോബർ 6-ന് മുൻപ് എക്സ്പ്രസ് എൻട്രി പ്രൊഫൈൽ സമർപ്പിച്ചവരെയാണ് ടൈ-ബ്രേക്കിംഗ് നിയമപ്രകാരം ഈ റൗണ്ടിൽ ഉൾപ്പെടുത്തിയിരിക്കുന്നത്.
കാനഡയ്ക്കുള്ളിൽ നിലവിൽ താമസിക്കുന്നവർക്ക് സ്ഥിരതാമസത്തിന് മുൻഗണന നൽകുമെന്ന ഇമിഗ്രേഷൻ ലെവൽ പ്ലാൻ പ്രഖ്യാപനത്തിന് പിന്നാലെയാണ് ഈ വർഷത്തെ ആദ്യ ഡ്രോ ഫലം പുറത്തുവരുന്നത്. വരും മാസങ്ങളിൽ ഫ്രഞ്ച് ഭാഷാ പ്രാവീണ്യമുള്ളവർക്കും കാനഡയിൽ പ്രവൃത്തിപരിചയമുള്ള ഡോക്ടർമാർക്കുമായി പ്രത്യേക നറുക്കെടുപ്പുകൾ ഉണ്ടാകുമെന്ന് ഐആർസിസി നേരത്തെ സൂചന നൽകിയിരുന്നു. പുതിയ ഇമിഗ്രേഷൻ ലക്ഷ്യങ്ങൾ മുൻനിർത്തി കൂടുതൽ കാറ്റഗറി അധിഷ്ഠിത സെലക്ഷനുകൾ ഈ വർഷം ഉദ്യോഗാർത്ഥികൾ പ്രതീക്ഷിക്കുന്നുണ്ട്. ഈ നറുക്കെടുപ്പോടെ 2026-ൽ ഇതുവരെ ആകെ 574 പേർക്ക് കാനഡ എക്സ്പ്രസ് എൻട്രി വഴി അപേക്ഷിക്കാനുള്ള ക്ഷണം ലഭിച്ചു കഴിഞ്ഞു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
ഒരു അംഗീകൃത ഇമിഗ്രേഷൻ കൺസൽട്ടന്റിന്റെ സേവനങ്ങൾക്ക് ബന്ധപ്പെടാം: +1 (289) 690-8119 ( eHouse Immigrations Services Ltd) (https://ehouseimmigration.ca/)
Canada holds first Express Entry draw of 2026
