ഒട്ടാവ: കാനഡയിലേക്ക് കുടിയേറാൻ ആഗ്രഹിക്കുന്നവർക്ക് ഏറെ പ്രതീക്ഷ നൽകികൊണ്ട് ജനുവരി 21ന് നടന്ന ഏറ്റവും പുതിയ എക്സ്പ്രസ് എൻട്രി നറുക്കെടുപ്പ് വിവരങ്ങൾ ഐആർസിസി (IRCC) പുറത്തുവിട്ടു. കനേഡിയൻ എക്സ്പീരിയൻസ് ക്ലാസ് (CEC) വിഭാഗത്തിൽ ഉൾപ്പെട്ട 6,000 അപേക്ഷകർക്ക് കാനഡയിൽ സ്ഥിരതാമസത്തിന് (Permanent Residency) അപേക്ഷിക്കാനുള്ള ക്ഷണം (ITA) ലഭിച്ചു. കാനഡയിൽ ജോലി ചെയ്യുന്നവർക്കും അവിടെ പ്രവൃത്തിപരിചയമുള്ളവർക്കും മുൻഗണന നൽകുന്ന രീതിയാണ് ഇത്തവണയും ഇമിഗ്രേഷൻ വിഭാഗം തുടരുന്നത്.
ഈ നറുക്കെടുപ്പിലെ ഏറ്റവും ശ്രദ്ധേയമായ കാര്യം കട്ട്-ഓഫ് സ്കോറിലെ കുറവാണ്. അപേക്ഷകർ തിരഞ്ഞെടുക്കപ്പെടാനുള്ള മിനിമം കോംപ്രിഹെൻസീവ് റാങ്കിംഗ് സിസ്റ്റം (CRS) സ്കോർ 509 ആണ്. മുൻ നറുക്കെടുപ്പുകളെ അപേക്ഷിച്ച് സ്കോർ കുറഞ്ഞത് പൂളിൽ കാത്തിരിക്കുന്ന ഒട്ടേറെ മലയാളികൾ ഉൾപ്പെടെയുള്ള ഉദ്യോഗാർത്ഥികൾക്ക് വലിയ അനുകൂല ഘടകമാണ്. സ്കോർ ഇനിയും താഴാനുള്ള സാധ്യത ഉള്ളതിനാൽ വരും ദിവസങ്ങളിൽ കൂടുതൽ പേർക്ക് ഐ.ടി.എ (ITA) ലഭിക്കുമെന്നാണ് പ്രതീക്ഷിക്കുന്നത്.
തിരഞ്ഞെടുക്കപ്പെട്ട അപേക്ഷകർക്ക് തങ്ങളുടെ പി.ആർ. അപേക്ഷ സമർപ്പിക്കാൻ നിശ്ചിത സമയം അനുവദിച്ചിട്ടുണ്ട്. 2026-ന്റെ തുടക്കത്തിൽ തന്നെ 6,000 പേരെ ഒന്നിച്ച് വിളിച്ചത് കാനഡയുടെ ഇമിഗ്രേഷൻ ലക്ഷ്യങ്ങൾ വേഗത്തിൽ പൂർത്തിയാക്കാനുള്ള തയ്യാറെടുപ്പിന്റെ സൂചനയാണ്. യോഗ്യരായ ഉദ്യോഗാർത്ഥികൾ തങ്ങളുടെ രേഖകൾ കൃത്യമാണെന്ന് ഉറപ്പുവരുത്തുകയും നിശ്ചിത സമയത്തിനകം തന്നെ അപേക്ഷാ നടപടികൾ പൂർത്തിയാക്കുകയും ചെയ്യേണ്ടതാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Express Entry Draw January 21 , 2026
