ന്യൂഡൽഹി: വിവാഹം ഉറപ്പിച്ചു എന്നതുകൊണ്ട് മാത്രം പങ്കാളിയുമായി ശാരീരിക ബന്ധത്തിൽ ഏർപ്പെടുന്നത് സൂക്ഷിച്ചു വേണമെന്ന് സുപ്രീം കോടതി. മാട്രിമോണിയൽ സൈറ്റിലൂടെ പരിചയപ്പെട്ട യുവാവ് വിവാഹ വാഗ്ദാനം നൽകി പീഡിപ്പിച്ചെന്ന യുവതിയുടെ പരാതി പരിഗണിക്കവെയാണ് കോടതിയുടെ സുപ്രധാന നിരീക്ഷണം. ജസ്റ്റിസ് ബി.വി. നാഗരത്ന, ജസ്റ്റിസ് ഉജ്ജ്വൽ ഭുയാൻ എന്നിവരടങ്ങിയ ബെഞ്ചാണ് സ്ത്രീകളോട് ഇത്തരം സാഹചര്യങ്ങളിൽ ജാഗ്രത പാലിക്കണമെന്ന് ഉപദേശിച്ചത്.
തങ്ങൾ ഒരുപക്ഷേ പഴയ ചിന്താഗതിക്കാരായിരിക്കാം എന്ന് ആമുഖമായി സൂചിപ്പിച്ച കോടതി, വിവാഹത്തിന് മുൻപ് ആരെയും അന്ധമായി വിശ്വസിക്കരുതെന്ന് ഓർമ്മിപ്പിച്ചു. ബന്ധം എത്രത്തോളം ദൃഢമാണെങ്കിലും വിവാഹത്തിന് മുൻപ് ശാരീരിക ബന്ധത്തിൽ ഏർപ്പെടുന്നത് മനസ്സിലാക്കാൻ കഴിയുന്നില്ലെന്നും ജാഗ്രത അനിവാര്യമാണെന്നും കോടതി വ്യക്തമാക്കി. വിവാഹ വാഗ്ദാനം നൽകി പീഡിപ്പിച്ചെന്ന പരാതി നൽകിയ 30-കാരിയായ യുവതിയോട്, വിവാഹത്തിന് മുൻപ് എന്തിനാണ് ഇത്തരം യാത്രകൾക്ക് മുതിർന്നതെന്നും കോടതി ചോദിച്ചു.
2022-ൽ മാട്രിമോണിയൽ സൈറ്റിലൂടെ പരിചയപ്പെട്ട യുവാവ് ഡൽഹിയിലും ദുബായിലും വെച്ച് പീഡിപ്പിച്ചുവെന്നും, ദൃശ്യങ്ങൾ പകർത്തി ഭീഷണിപ്പെടുത്തിയെന്നുമാണ് യുവതിയുടെ പരാതി. യുവാവ് നേരത്തെ വിവാഹിതനാണെന്ന വിവരം മറച്ചുവെച്ചുവെന്നും 2024-ൽ ഇയാൾ മറ്റൊരു വിവാഹം കഴിച്ചുവെന്നും യുവതി കോടതിയെ അറിയിച്ചു. യുവാവ് നൽകിയ മുൻകൂർ ജാമ്യാപേക്ഷ പരിഗണിക്കുന്നതിനിടെയാണ് കോടതി ഈ വിഷയത്തിൽ നിലപാട് വ്യക്തമാക്കിയത്.
അതേസമയം, ഉഭയസമ്മത പ്രകാരമുള്ള ബന്ധങ്ങൾ പിന്നീട് വഷളാകുമ്പോൾ പീഡനമായി കണക്കാക്കി ശിക്ഷിക്കുന്നത് ശരിയല്ലെന്നും കോടതി നിരീക്ഷിച്ചു. ഈ കേസിൽ മധ്യസ്ഥ ചർച്ചയ്ക്കുള്ള സാധ്യതകൾ പരിശോധിക്കാൻ നിർദ്ദേശിച്ച കോടതി, കൂടുതൽ വാദം കേൾക്കുന്നതിനായി കേസ് ബുധനാഴ്ചത്തേക്ക് മാറ്റി. നിലവിലെ സാമൂഹിക സാഹചര്യത്തിൽ വിവാഹത്തിന് മുൻപുള്ള ബന്ധങ്ങളിൽ സ്ത്രീകൾ ജാഗ്രത പുലർത്തേണ്ടത് അനിവാര്യമാണെന്ന് കോടതി ആവർത്തിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
“Even if marriage is confirmed, there should be no physical contact”; This is the Supreme Court’s different advice!
