എറണാകുളം: കേരളത്തിന്റെ മൂന്നാമത്തെ വന്ദേ ഭാരത് എക്സ്പ്രസ് ട്രെയിനിന്റെ ഷെഡ്യൂൾ റെയിൽവേ ബോർഡ് പ്രഖ്യാപിച്ചു. എറണാകുളത്തിനും കർണ്ണാടകയിലെ കെ.എസ്.ആർ ബെംഗളൂരുവിനും ഇടയിലാണ് ഈ പുതിയ സർവീസ്. നവംബർ രണ്ടാം വാരം മുതൽ ട്രെയിൻ സർവീസ് ആരംഭിക്കുമെന്നാണ് പ്രതീക്ഷ. ബുധനാഴ്ച ഒഴികെ ആഴ്ചയിൽ ആറ് ദിവസമാണ് ഈ ട്രെയിൻ പ്രവർത്തിക്കുക. കേരളത്തിൽ തൃശ്ശൂർ, പാലക്കാട് എന്നീ രണ്ട് സ്റ്റോപ്പുകളും, തമിഴ്നാട്ടിൽ കോയമ്പത്തൂർ, തിരുപ്പൂർ, ഈറോഡ്, സേലം എന്നീ നാല് സ്റ്റോപ്പുകളും ഈ ട്രെയിനിനുണ്ടാകും. മെയിന്റനൻസ് ജോലികൾക്കായി ട്രെയിൻ ബെംഗളൂരു യാർഡിലാകും നിർത്തുക.
ട്രെയിൻ നമ്പർ 226651 കെ.എസ്.ആർ ബെംഗളൂരു – എറണാകുളം വന്ദേ ഭാരത് എക്സ്പ്രസ് പുലർച്ചെ 5.10-ന് ബെംഗളൂരുവിൽ നിന്ന് പുറപ്പെട്ട് ഉച്ചയ്ക്ക് 1.50-ന് എറണാകുളത്ത് എത്തിച്ചേരും. കൃഷ്ണരാജപുരം, സേലം, ഈറോഡ്, തിരുപ്പൂർ, കോയമ്പത്തൂർ എന്നീ സ്റ്റേഷനുകളിലെ സ്റ്റോപ്പുകൾക്ക് ശേഷം 11.28-ന് പാലക്കാട് എത്തി 11.30-ന് പുറപ്പെട്ട്, തുടർന്ന് തൃശ്ശൂരിലെ സ്റ്റോപ്പിന് ശേഷം ഉച്ചയ്ക്ക് 1.50-ന് എറണാകുളത്ത് യാത്ര അവസാനിപ്പിക്കും. മടക്കയാത്രയിൽ, ട്രെയിൻ നമ്പർ 22652 എറണാകുളം – കെ.എസ്.ആർ ബെംഗളൂരു വന്ദേ ഭാരത് എക്സ്പ്രസ് ഉച്ചയ്ക്ക് 2.20-ന് എറണാകുളത്ത് നിന്ന് പുറപ്പെട്ട് രാത്രി 11 മണിക്ക് ബെംഗളൂരുവിലെത്തും.
മടക്കയാത്രയിൽ തൃശ്ശൂർ, പാലക്കാട്, കോയമ്പത്തൂർ, തിരുപ്പൂർ, ഈറോഡ്, സേലം, കൃഷ്ണരാജപുരം എന്നിവിടങ്ങളിലെ സ്റ്റോപ്പുകൾക്ക് ശേഷമാണ് ട്രെയിൻ രാത്രി 11 മണിയോടെ കെ.എസ്.ആർ. ബെംഗളൂരുവിൽ എത്തിച്ചേരുക. പുതിയ വന്ദേ ഭാരത് എക്സ്പ്രസ് സർവീസ് കേരളത്തിൽ നിന്ന് ബെംഗളൂരുവിലേക്കുള്ള യാത്രക്കാർക്ക് കൂടുതൽ സൗകര്യപ്രദമായ ഒരു യാത്രാമാർഗ്ഗമായിരിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Kerala's third Vande Bharat: Ernakulam-Bengaluru schedule announced!
