ലാഭം കുറഞ്ഞിട്ടും വമ്പൻ നിക്ഷേപം: എണ്ണ കയറ്റുമതി ഇരട്ടിപ്പിക്കാൻ എൻബ്രിഡ്ജ്: മെയിൻലൈൻ വിപുലീകരണം രണ്ടാം ഘട്ടത്തിലേക്ക്

കാൽഗറി: കാനഡയുടെ എണ്ണയുടെ ആവശ്യകത വർധിക്കുന്ന സാഹചര്യത്തിൽ തങ്ങളുടെ മെയിൻലൈൻ ക്രൂഡ് ഓയിൽ പൈപ്പ്ലൈൻ ശൃംഖലയുടെ ശേഷി വർധിപ്പിക്കാനൊരുങ്ങി എൻബ്രിഡ്ജ്. കാൽഗറി ആസ്ഥാനമായുള്ള പൈപ്പ്ലൈൻ ഓപ്പറേറ്ററായ എൻബ്രിഡ്ജ്, വിപുലീകരണത്തിന്റെ രണ്ടാം ഘട്ടം അടുത്ത വർഷം ആദ്യം ആരംഭിക്കാൻ ആലോചിക്കുന്നതായും അറിയിച്ചു.അംഗീകാരം ലഭിക്കുകയാണെങ്കിൽ, ഈ പദ്ധതി വഴി 2028 ഓടെ പ്രതിദിനം 2,50,000 ബാരൽ (bpd) ക്രൂഡ് ഓയിൽ കൂടി കടത്തിവിടാൻ സാധിക്കും. നിലവിൽ 2027 ടെ പ്രതിദിനം 1,50,000 ബാരൽ ശേഷി കൂട്ടാൻ ലക്ഷ്യമിടുന്ന ഒന്നാം ഘട്ട വിപുലീകരണത്തിന് ഇത് സഹായകരമാകും. കനേഡിയൻ എണ്ണ കയറ്റുമതിക്കാർക്കിടയിൽ വിപണിയിലേക്ക് പ്രവേശനം ലഭിക്കുന്നതിനുള്ള ആവശ്യം ശക്തമായതിനാലാണ് എൻബ്രിഡ്ജിൻ്റെ ഈ പുതിയ നീക്കം.

വെസ്റ്റ് കാനഡയിൽ നിന്ന് ഈസ്റ്റ് കാനഡയിലേക്കും യുഎസിലെ മിഡിൽ വെസ്റ്റ് പ്രദേശങ്ങളിലേക്കും പ്രതിദിനം 30 ലക്ഷം ബാരൽ ക്രൂഡ് ഓയിൽ എത്തിക്കാൻ ശേഷിയുള്ളതാണ് മെയിൻലൈൻ പൈപ്പ് ലൈൻ. ഉപഭോക്താക്കളിൽ നിന്നുള്ള ശക്തമായ ഡിമാൻഡ് കാരണം മൂന്നാം പാദത്തിൽ ശരാശരി 31 ലക്ഷം ബാരൽ എണ്ണയാണ് ഈ പൈപ്പ് ലൈൻ വഴി കൈമാറ്റം ചെയ്തത്. എന്നിരുന്നാലും, യുഎസിലെ ഗ്യാസ് യൂട്ടിലിറ്റി ഏറ്റെടുക്കലുകൾ ഉൾപ്പെടെയുള്ള മൂലധന നിക്ഷേപങ്ങളുമായി ബന്ധപ്പെട്ട ഉയർന്ന സാമ്പത്തിക ചെലവുകൾ കാരണം എൻബ്രിഡ്ജിന്റെ മൂന്നാം പാദ ലാഭത്തിൽ കുറവുണ്ടായി.

ആഗോള എണ്ണ വിപണിയിലെ ഏറ്റക്കുറച്ചിലുകൾക്കിടയിലും കാനഡയിലെ ഓയിൽ സാൻഡ്സ് വ്യവസായം സ്ഥിരത നിലനിർത്തുന്നുണ്ട്. കഴിഞ്ഞ വർഷം എണ്ണ ഉത്പാദനം റെക്കോർഡ് നിലയായ പ്രതിദിനം 51 ലക്ഷം ബാരലിൽ എത്തിയിരുന്നു. ഈ ദശകത്തിന്റെ അവസാനത്തോടെ പ്രതിദിനം 5 ലക്ഷം മുതൽ 6 ലക്ഷം വരെ ബാരലിന്റെ അധിക വിതരണ വളർച്ച എൻബ്രിഡ്ജ് പ്രതീക്ഷിക്കുന്നു. വർദ്ധിച്ചുവരുന്ന ഈ ഉൽപാദനം കൈകാര്യം ചെയ്യുന്നതിനുള്ള “ഏറ്റവും വേഗതയേറിയതും ചെലവ് കുറഞ്ഞതുമായ വഴി” മെയിൻലൈൻ പൈപ്പ് ലൈനിൻ്റെ ശേഷി വർദ്ധിപ്പിക്കുകയാണെന്നും കമ്പനി ഊന്നിപ്പറയുന്നു.

പൈപ്പ് ലൈൻ വിപുലീകരണ ചർച്ചകൾ നടക്കുന്നതിനോടൊപ്പം, കാനഡ സർക്കാർ കാർബൺ ക്യാപ്ച്ചർ , സംഭരണ പദ്ധതികളുമായി ബന്ധിപ്പിച്ചുകൊണ്ട് പുതിയ ക്രൂഡ് ഓയിൽ പൈപ്പ് ലൈൻ നിർമ്മിക്കുന്നതിനെക്കുറിച്ച് ആൽബർട്ട പ്രവിശ്യയുമായി ചർച്ച നടത്തുന്നുണ്ട്. ഈ പദ്ധതിക്ക് സ്വകാര്യ മേഖലയുടെ പിന്തുണ ഇതുവരെ ലഭിച്ചിട്ടില്ലെങ്കിലും, എണ്ണ, പ്രകൃതിവാതക ഉദ്വമനം (emission caps) സംബന്ധിച്ചുള്ള നിയന്ത്രണങ്ങളിൽ മാറ്റം വരുത്തിയാൽ കൂടുതൽ നിക്ഷേപം വരാൻ സാധ്യതയുണ്ടെന്ന് ഫെഡറൽ ഉദ്യോഗസ്ഥർ സൂചന നൽകി. അത്തരമൊരു നയപരമായ മാറ്റം വഴി വടക്കൻ ആൽബർട്ടയിലെ എണ്ണ ശേഖരത്തിൽ നിന്ന് കൂടുതൽ പൈപ്പ് ലൈൻ ശേഷിയും മൂല്യവും നേടിയെടുക്കാൻ കഴിയുമെന്ന് എൻബ്രിഡ്ജ് എക്സിക്യൂട്ടീവുകൾ അഭിപ്രായപ്പെട്ടു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Enbridge to double oil exports: Mainline expansion enters second phase