അന്താരാഷ്ട്ര ബഹിരാകാശ നിലയത്തിലെ (ISS) ഒരു സഞ്ചാരിക്ക് ഗുരുതരമായ ആരോഗ്യപ്രശ്നം നേരിട്ടതിനെത്തുടർന്ന്, നിലവിലുള്ള ‘ക്രൂ-11’ ദൗത്യം അടിയന്തരമായി അവസാനിപ്പിക്കാൻ നാസ തീരുമാനിച്ചു. അമേരിക്കൻ ബഹിരാകാശ ഏജൻസിയുടെ ഔദ്യോഗിക അറിയിപ്പ് പ്രകാരം, ജനുവരി 14-ന് അമേരിക്കൻ സമയം വൈകുന്നേരം 5 മണിക്ക് (ഇന്ത്യൻ സമയം ജനുവരി 15 പുലർച്ചെ 3.30) നാലംഗ സംഘം സ്പേസ് എക്സിന്റെ ഡ്രാഗൺ പേടകത്തിൽ ഭൂമിയിലേക്ക് തിരിക്കും. ബഹിരാകാശ നിലയത്തിന്റെ 25 വർഷത്തെ ചരിത്രത്തിൽ ഇതാദ്യമായാണ് ഒരു മെഡിക്കൽ അടിയന്തര സാഹചര്യത്തെത്തുടർന്ന് ഇത്തരമൊരു ‘ഇവാക്യുവേഷൻ’ വേണ്ടിവരുന്നത്.
ഫെബ്രുവരി അവസാനം വരെ നിശ്ചയിച്ചിരുന്ന ദൗത്യമാണ് ആരോഗ്യപരമായ കാരണങ്ങളാൽ ഒരു മാസം മുൻപേ വെട്ടിച്ചുരുക്കുന്നത്. ജനുവരി 8-ന് നിലയത്തിന്റെ പവർ സിസ്റ്റം അറ്റകുറ്റപ്പണിക്കായി സെന കാർഡ്മാനും മൈക്ക് ഫിൻകെയും നടത്താനിരുന്ന ബഹിരാകാശ നടത്തം (Spacewalk) അവസാന നിമിഷം റദ്ദാക്കിയിരുന്നു. ഇവരിലൊരാളുടെ ആരോഗ്യസ്ഥിതി മോശമായതാണ് സ്പേസ് വാക്ക് ഒഴിവാക്കാൻ കാരണമെങ്കിലും, സ്വകാര്യത കണക്കിലെടുത്ത് ഏത് സഞ്ചാരിക്കാണ് ആരോഗ്യപ്രശ്നമെന്ന് നാസ വെളിപ്പെടുത്തിയിട്ടില്ല. നിലവിൽ സഞ്ചാരി സുരക്ഷിതനാണെന്നും എന്നാൽ മൈക്രോ ഗ്രാവിറ്റിയിൽ കൂടുതൽ ചികിത്സ അസാധ്യമായതിനാലാണ് മടക്കയാത്രയെന്നും നാസ വ്യക്തമാക്കി.
നാസയുടെ സെന കാർഡ്മാൻ (കമാൻഡർ), മൈക്ക് ഫിൻകെ (പൈലറ്റ്), ജപ്പാൻ ബഹിരാകാശ ഏജൻസിയായ ജാക്സയുടെ കിമിയ യുവി, റഷ്യൻ ഏജൻസിയായ റോസ്കോസ്മോസിന്റെ ഒലെഗ് പ്ലാറ്റോണോവ് എന്നിവരാണ് ക്രൂ-11 സംഘത്തിലുള്ളത്. സ്പേസ് എക്സിന്റെ ‘ഡ്രാഗൺ എൻഡവർ’ പേടകത്തിലാണ് ഇവർ മടങ്ങിയെത്തുക. കാലിഫോർണിയ തീരത്താണ് പേടകം ഇറങ്ങാൻ നിശ്ചയിച്ചിരിക്കുന്നത്. യാത്രക്കാരുടെ സുരക്ഷയ്ക്ക് മുൻഗണന നൽകുന്നതിനാലാണ് സംഘത്തെ മുഴുവനായി ഒരേസമയം തിരികെ എത്തിക്കുന്നത്.
സാധാരണയായി നിലവിലുള്ള സംഘം മടങ്ങുന്നതിന് മുൻപ് പുതിയ സംഘം ബഹിരാകാശ നിലയത്തിലെത്തി ചുമതലകൾ കൈമാറുകയാണ് പതിവ്. എന്നാൽ ക്രൂ-11 നേരത്തെ മടങ്ങുന്നതോടെ, നിലവിൽ അവിടെയുള്ള റഷ്യയുടെ സൊയൂസ് എം എസ് 28 സംഘത്തിനായിരിക്കും നിലയത്തിന്റെ പൂർണ്ണ ചുമതല. നവംബറിൽ എത്തിയ രണ്ട് റഷ്യൻ സഞ്ചാരികളും ഒരു അമേരിക്കൻ സഞ്ചാരിയും ഉൾപ്പെടുന്ന മൂന്നംഗ സംഘമാണ് ഇവർ. പുതിയ ടീം എത്തുന്നതുവരെ ഐ.എസ്.എസിന്റെ പ്രവർത്തനം ഇവർ നിയന്ത്രിക്കും.
പ്രതീക്ഷിക്കാത്ത ഈ സാഹചര്യത്തെത്തുടർന്ന്, അടുത്ത ദൗത്യമായ ‘ക്രൂ-12’ നേരത്തെയാക്കാൻ നാസ ആലോചിക്കുന്നുണ്ട്. നിലവിൽ ഫെബ്രുവരിയിലാണ് ക്രൂ-12 വിക്ഷേപണം തീരുമാനിച്ചിരിക്കുന്നത്. അടിയന്തര സാഹചര്യം കണക്കിലെടുത്ത് വിക്ഷേപണ തീയതി പുനഃക്രമീകരിക്കാനുള്ള ചർച്ചകൾ പുരോഗമിക്കുകയാണ്. ബഹിരാകാശ സഞ്ചാരികളുടെ ആരോഗ്യം സംരക്ഷിക്കുന്നതിനായി അന്താരാഷ്ട്ര തലത്തിലുള്ള എല്ലാ ഏജൻസികളും ഏകോപനത്തോടെയാണ് ഈ അടിയന്തര നീക്കം നടപ്പിലാക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Emergency situation on the space station: NASA announces return date of the Crew-11 mission
