ഹാലിഫാക്സ്: നോവ സ്കോഷ്യയിൽ വൈദ്യുതി നിരക്ക് വർദ്ധിപ്പിക്കാനുള്ള നീക്കത്തിന് പ്രൊവിൻഷ്യൽ റെഗുലേറ്ററുടെ ഭാഗിക അനുമതി. എന്നാൽ ഉപഭോക്താക്കൾക്ക് വലിയ ആശ്വാസം നൽകിക്കൊണ്ട്, നോവ സ്കോഷ്യ പവർ (Nova Scotia Power) ആവശ്യപ്പെട്ട ഭീമമായ വർദ്ധനവ് റെഗുലേറ്റർ ബോർഡ് തള്ളി. 2026-ൽ 3.8 ശതമാനവും 2027-ൽ 4.8 ശതമാനവും വർദ്ധനവ് നടപ്പിലാക്കാനായിരുന്നു സ്വകാര്യ ഉടമസ്ഥതയിലുള്ള ഈ കമ്പനിയുടെ ശ്രമം.
ബുധനാഴ്ച പുറപ്പെടുവിച്ച 300 പേജുള്ള സുപ്രധാന ഉത്തരവിലൂടെയാണ് നോവ സ്കോഷ്യ എനർജി ബോർഡ് കമ്പനിയുടെ നീക്കത്തിന് തടയിട്ടത്. കമ്പനി എക്സിക്യൂട്ടീവുകളുടെ ശമ്പള ആനുകൂല്യങ്ങൾ ഉൾപ്പെടെയുള്ള ദശലക്ഷക്കണക്കിന് ഡോളറിന്റെ അധിക ചിലവ് ജനങ്ങളിൽ നിന്ന് ഈടാക്കാൻ അനുവദിക്കില്ലെന്ന് ബോർഡ് വ്യക്തമാക്കി. കൂടാതെ, പ്രവർത്തന ചിലവിനത്തിൽ 10 മില്യൺ ഡോളറിന്റെ കുറവ് വരുത്താനും കമ്പനിയോട് നിർദ്ദേശിച്ചിട്ടുണ്ട്. ഇതോടെ കമ്പനി ലക്ഷ്യമിട്ടതിനേക്കാൾ കുറഞ്ഞ നിരക്കിലുള്ള വർദ്ധനവ് മാത്രമേ പ്രവിശ്യയിൽ ഉണ്ടാകൂ.
രൂക്ഷമായ കാലാവസ്ഥാ സാഹചര്യങ്ങളിലും തടസ്സമില്ലാത്ത വൈദ്യുതി സേവനം ഉറപ്പാക്കാൻ ഈ വർദ്ധനവ് ആവശ്യമാണെന്ന് കമ്പനി സി.ഇ.ഒ വിവേക് സൂദ് പറഞ്ഞു. റെഗുലേറ്ററുടെ നിർദ്ദേശപ്രകാരം പുതുക്കിയ നിരക്കുകൾ രണ്ടാഴ്ചയ്ക്കുള്ളിൽ കമ്പനി പ്രഖ്യാപിക്കും. ഇതിന് ശേഷം പൊതുജനങ്ങളുടെയും മറ്റ് സംഘടനകളുടെയും അഭിപ്രായം കൂടി പരിഗണിച്ചാകും ഒരു മാസത്തിനുള്ളിൽ അന്തിമ തീരുമാനം കൈക്കൊള്ളുക.
അതേസമയം, റെഗുലേറ്ററുടെ തീരുമാനത്തിനെതിരെ പ്രീമിയർ ടിം ഹൂസ്റ്റൺ കടുത്ത പ്രതിഷേധം രേഖപ്പെടുത്തി. ബോർഡിന്റെ ഈ തീരുമാനം ജനങ്ങളുടെ യഥാർത്ഥ ജീവിതസാഹചര്യങ്ങൾ മനസ്സിലാക്കാതെയുള്ളതാണെന്ന് അദ്ദേഹം വിമർശിച്ചു. ഊർജ്ജ മേഖലയിലെ കുത്തക അവസാനിപ്പിക്കാൻ കൂടുതൽ ബദൽ സംവിധാനങ്ങൾ കൊണ്ടുവരുമെന്നും അദ്ദേഹം കൂട്ടിച്ചേർത്തു. വൈദ്യുതി നിരക്ക് വർദ്ധനവ് നിയന്ത്രിക്കാൻ സർക്കാർ പരാജയപ്പെട്ടുവെന്ന് ആരോപിച്ച് പ്രതിപക്ഷ നേതാക്കളായ ക്ലോഡിയ ചെൻഡറും ഇയാൻ റാങ്കിനും രംഗത്തെത്തിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Electricity rates are increasing in Nova Scotia;
