തമിഴ് സൂപ്പർ താരം വിജയ് നായകനാകുന്ന ബിഗ് ബജറ്റ് ചിത്രം ‘ജനനായകൻ’ നേരിടുന്ന സെൻസർ പ്രതിസന്ധികളിൽ പുതിയ വഴിത്തിരിവ്. മുംബൈയിൽ വെച്ച് നടന്ന സെൻസർ ബോർഡ് റിവൈസിങ് കമ്മിറ്റിയുടെ പുനഃപരിശോധനയ്ക്ക് ശേഷം, ചിത്രത്തിലെ രാഷ്ട്രീയ പരാമർശങ്ങൾ കണക്കിലെടുത്ത് അന്തിമ തീരുമാനത്തിനായി വിഷയം കേന്ദ്ര തിരഞ്ഞെടുപ്പ് കമ്മിഷന് വിട്ടിരിക്കുകയാണ്. വരാനിരിക്കുന്ന തിരഞ്ഞെടുപ്പ് പശ്ചാത്തലത്തിൽ ചിത്രത്തിലെ ഉള്ളടക്കം പെരുമാറ്റച്ചട്ട ലംഘനമാകുമോ എന്ന് പരിശോധിക്കാനാണ് ബോർഡിന്റെ നിർദ്ദേശം. ഇതോടെ ചിത്രത്തിന്റെ റിലീസ് സംബന്ധിച്ച അനിശ്ചിതത്വം തുടരുകയാണ്.
ജനുവരി ഒൻപതിന് പൊങ്കൽ റിലീസായി നിശ്ചയിച്ചിരുന്ന ‘ജനനായകൻ’, സെൻസർ സർട്ടിഫിക്കറ്റ് ലഭിക്കാത്തതിനെത്തുടർന്ന് പലതവണ മാറ്റിവെക്കേണ്ടി വന്നിരുന്നു. ചിത്രത്തിലെ ചില രംഗങ്ങൾ സൈന്യത്തെ അവഹേളിക്കുന്നതാണെന്നും മതവികാരം വ്രണപ്പെടുത്തുന്നതാണെന്നും ആരോപിച്ച് ലഭിച്ച പരാതികളാണ് തുടക്കത്തിൽ തടസ്സമായത്. ഇതിനെതിരെ നിർമ്മാതാക്കളായ കെ.വി.എൻ. പ്രൊഡക്ഷൻസ് മദ്രാസ് ഹൈക്കോടതിയെയും സുപ്രീം കോടതിയെയും സമീപിച്ചെങ്കിലും അനുകൂല വിധി നേടാനായില്ല. ഒടുവിൽ നിയമപോരാട്ടം അവസാനിപ്പിച്ച് ചിത്രം റിവൈസിങ് കമ്മിറ്റിക്ക് സമർപ്പിക്കാൻ നിർമ്മാതാക്കൾ തീരുമാനിക്കുകയായിരുന്നു.
ചൊവ്വാഴ്ച മുംബൈയിൽ നടന്ന സ്ക്രീനിംഗിൽ രാഷ്ട്രീയ പ്രാധാന്യമുള്ള നിരവധിയായ ഡയലോഗുകളും രംഗങ്ങളും കമ്മിറ്റി വിലയിരുത്തി. വിജയ് രാഷ്ട്രീയ പാർട്ടി രൂപീകരിച്ച് സജീവമാകുന്ന ഘട്ടമായതിനാൽ, ചിത്രത്തിലെ രാഷ്ട്രീയ ഉള്ളടക്കം വോട്ടർമാരെ സ്വാധീനിക്കാൻ സാധ്യതയുണ്ടോ എന്ന കാര്യത്തിൽ തിരഞ്ഞെടുപ്പ് കമ്മിഷന്റെ നിലപാട് നിർണ്ണായകമാകും. കമ്മിഷന്റെ അനുമതി ലഭിച്ചാൽ മാത്രമേ സെൻസർ ബോർഡ് സർട്ടിഫിക്കറ്റ് അനുവദിക്കുകയുള്ളൂ. നിലവിലെ സാഹചര്യത്തിൽ ഏപ്രിൽ മാസത്തിൽ നടക്കുന്ന തിരഞ്ഞെടുപ്പിന് ശേഷം മാത്രമേ ചിത്രം തിയേറ്ററുകളിൽ എത്താൻ സാധ്യതയുള്ളൂ എന്നാണ് സിനിമാ വൃത്തങ്ങൾ നൽകുന്ന സൂചന.
Jananayaka Fate Now with EC; Revising Panel Report
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
