ബ്രസീലിലെ പ്രായ ഗ്രാന്റയിൽ നടന്ന ഹോട്ട് എയർ ബലൂൺ അപകടത്തിൽ കുറഞ്ഞത് എട്ട് പേർ മരിച്ചതായി സംസ്ഥാന ഗവർണർ ജോർജിൻഹോ മെല്ലോ എക്സിലെ പോസ്റ്റിൽ അറിയിച്ചു. ശനിയാഴ്ച രാവിലെ നടന്ന അപകടസമയത്ത് ബലൂണിൽ 21 പേരാണ് ഉണ്ടായിരുന്നത്. പൈലറ്റ് ഉൾപ്പെടെ 13 പേർ രക്ഷപ്പെട്ടതായും ആരെയും കാണാതായിട്ടില്ലെന്നും സംസ്ഥാന സർക്കാർ പ്രസ് ഓഫീസ് അറിയിച്ചു.
അപകടം ഒരു ആരോഗ്യ കേന്ദ്രത്തിന് സമീപമാണ് നടന്നതെന്നും കൂട്ടിച്ചേർത്തു.
“രക്ഷപ്പെട്ട പൈലറ്റിന്റെ മൊഴി പ്രകാരം, ബലൂണിന്റെ കൂടയിൽ തീപിടുത്തമുണ്ടായി. തുടർന്ന് അദ്ദേഹം ബലൂൺ താഴെയിറക്കാൻ ശ്രമിക്കുകയും, നിലത്ത് വളരെ അടുത്ത് എത്തിയപ്പോൾ ആളുകളോട് ചാടാൻ ആവശ്യപ്പെടുകയും ചെയ്തെന്ന് പ്രായ ഗ്രാന്റ പോലീസ് സ്റ്റേഷനിലെ ഓഫീസർ ടിയാഗോ ലൂയിസ് ലെമോസ് മാധ്യമങ്ങളോട് പറഞ്ഞു. “അവർ ചാടാൻ തുടങ്ങി, എന്നാൽ ചിലർക്ക് അതിന് കഴിഞ്ഞില്ല. തീ ആളിക്കത്തുകയും ഭാരം കാരണം ബലൂൺ വീണ്ടും ഉയരുകയും ചെയ്തു. പിന്നീട് ബലൂണിന്റെ നിയന്ത്രണം നഷ്ടപ്പെട്ട് അത് താഴേക്ക് പതിച്ചു.
രക്ഷപ്പെട്ട 13 പേരെ സമീപത്തെ ആശുപത്രികളിൽ പ്രവേശിപ്പിച്ചതായും സംസ്ഥാന സർക്കാർ പ്രസ് ഓഫീസ് വ്യക്തമാക്കി. ചൈനയിൽ ഔദ്യോഗിക ദൗത്യത്തിലുള്ള ഗവർണർ മെല്ലോ, സ്ഥിതിഗതികൾ നിരീക്ഷിച്ചുവരികയാണെന്ന് പറഞ്ഞു. “തങ്ങൾ ദുഃഖത്തിലാണ്, സംഭവിച്ചത് ഒരു ദുരന്തമാണ്,” അദ്ദേഹം കൂട്ടിച്ചേർത്തു.
“ഇത് എങ്ങനെ സംഭവിച്ചുവെന്ന് തങ്ങൾ അന്വേഷിക്കും. എന്നാൽ ഇപ്പോൾ പ്രധാനമായിട്ടുള്ളത് ആളുകളിലേക്കും കുടുംബങ്ങളിലേക്കും എത്താൻ സാധ്യമായതെല്ലാം ചെയ്യുക എന്നതാണ്.” ബ്രസീൽ പ്രസിഡന്റ് ലൂയിസ് ഇനാസിയോ ലൂല ഡ സിൽവയും എക്സിൽ അനുശോചനം രേഖപ്പെടുത്തുകയും, ഫെഡറൽ സർക്കാരിന്റെ സഹായം ഉറപ്പാക്കുകയും ചെയ്തു.
തെക്കൻ സാന്താ കാതറീനയിലുള്ള പ്രായ ഗ്രാന്റ ഒരു പ്രശസ്തമായ വിനോദസഞ്ചാര കേന്ദ്രമാണ്, ഇവിടുത്തെ ബലൂൺ പ്രവർത്തനങ്ങൾക്ക് ഈ നഗരം പേരുകേട്ടതാണ്.
