പിടിമുറുക്കി മീസിൽസ്: ഏട്ട് കുഞ്ഞുങ്ങൾക്ക് അടിയന്തിര പ്രതിരോധ മരുന്ന് നൽകും!

പ്രിൻസ് എഡ്വേർഡ് ദ്വീപിൽ നാല് മുതൽ എട്ട് വരെ നവജാത ശിശുക്കൾക്ക് മീസിൽസ് (അഞ്ചാംപനി) അണുബാധയിൽ നിന്ന് സംരക്ഷണം നൽകുന്നതിനായുള്ള മരുന്ന് ആവശ്യമാണെന്ന് പ്രവിശ്യയിലെ ചീഫ് പബ്ലിക് ഹെൽത്ത് ഓഫീസ്. ഡോ. ഹെതർ മോറിസൺ പറയുന്നതനുസരിച്ച്, ഈ കുഞ്ഞുങ്ങൾക്ക് ഇൻട്രാവെനസ് ഇമ്യൂണോഗ്ലോബുലിൻ അല്ലെങ്കിൽ ഇൻട്രാമുസ്കുലർ ഇമ്യൂണോഗ്ലോബുലിൻ നൽകേണ്ടതുണ്ട്. ഇത് അണുബാധയെ തടയാനോ അതിന്റെ തീവ്രത കുറയ്ക്കാനോ സഹായിക്കും. വ്യാഴാഴ്ച രാത്രിയോടെയാണ് ഈ കുഞ്ഞുങ്ങളെ കണ്ടെത്തിയത്.
കഴിഞ്ഞ ദിവസം, പി.ഇ.ഐയിൽ മീസിൽസിന്റെ രണ്ട് പുതിയ കേസുകൾ സ്ഥിരീകരിച്ചിരുന്നു. ഈ കേസുകൾക്ക് നിരവധി പൊതു ഇടങ്ങളുമായി ബന്ധമുണ്ടെന്ന് കണ്ടെത്തിയിട്ടുണ്ട്.

ദ്വീപിലെ മിക്ക ആളുകൾക്കും രോഗപ്രതിരോധ ശേഷിയുണ്ടെങ്കിലും, ഒരു വയസ്സിൽ താഴെയുള്ള കുട്ടികൾക്ക് മീസിൽസ് വാക്സിൻ ലഭിക്കാത്തതിനാൽ അവർക്ക് രോഗം വരാനുള്ള സാധ്യത കൂടുതലാണെന്ന് ഡോ. മോറിസൺ വ്യക്തമാക്കി. പ്രവിശ്യയുടെ കുട്ടികളുടെ വാക്സിൻ പരിപാടിയുടെ ഭാഗമായി 12 മാസത്തിലും പിന്നീട് 18 മാസത്തിലുമാണ് മീസിൽസ് വാക്സിൻ നൽകുന്നത്.

ആരോഗ്യ ഉദ്യോഗസ്ഥർ രോഗം പകരാൻ സാധ്യതയുള്ള ചില പൊതു ഇടങ്ങൾ തിരിച്ചറിഞ്ഞിട്ടുണ്ട്. അവ താഴെ പറയുന്നവയാണ്:

• ആർ & എ (റേസ്‌ട്രാക്ക്) സർവീസ് സ്റ്റേഷൻ, 9967 റൂട്ട് 6, സ്റ്റാൻലി ബ്രിഡ്ജ്: ജൂൺ 21 ശനിയാഴ്ച, ഉച്ചയ്ക്ക് 1 മണിക്കും 4 മണിക്കും ഇടയിൽ.
• ചാർലട്ട്ടൗൺ ബൈബിൾ ചാപ്പൽ, 35 ലിങ്കൺവുഡ് ഡ്രൈവ്, ചാർലട്ട്ടൗൺ: ജൂൺ 22 ഞായറാഴ്ച, രാവിലെ 9 മണിക്കും ഉച്ചയ്ക്ക് 2 മണിക്കും ഇടയിൽ; ജൂൺ 22 ഞായറാഴ്ച, വൈകുന്നേരം 6:30 നും രാത്രി 9:30 നും ഇടയിൽ.
• ഹോംസെൻസ്, 1-202 ബുക്കാനൻ ഡ്രൈവ്, ചാർലട്ട്ടൗൺ: ജൂൺ 22 ഞായറാഴ്ച, വൈകുന്നേരം 6 മണിക്കും രാത്രി 8:30 നും ഇടയിൽ.
• മോറൽ കോ-ഓപ്, 7690 സെന്റ് പീറ്റേഴ്സ് റോഡ്, മോറൽ: ജൂൺ 23 തിങ്കളാഴ്ച, രാവിലെ 10 മണിക്കും ഉച്ചയ്ക്ക് 1 മണിക്കും ഇടയിൽ.
• ആദംസ് കൈറോപ്രാക്റ്റിക്, 100 ക്യാപിറ്റൽ ഡ്രൈവ്, ചാർലട്ട്ടൗൺ: ജൂൺ 23 തിങ്കളാഴ്ച, വൈകുന്നേരം 4 മണിക്കും 6:30 നും ഇടയിൽ.
• പ്രിൻസസ് ഓട്ടോ, 15 സെന്റ് ഡൺസ്റ്റാൻ സ്ട്രീറ്റ്, ചാർലട്ട്ടൗൺ: ജൂൺ 23 തിങ്കളാഴ്ച, വൈകുന്നേരം 4:30 നും 7:30 നും ഇടയിൽ.
• അൾട്രാമാർ ഗ്യാസ് സ്റ്റേഷൻ, 11302 സെന്റ് പീറ്റേഴ്സ് റോഡ്, സ്കോച്ച്ഫോർട്ട്: ജൂൺ 23 തിങ്കളാഴ്ച, വൈകുന്നേരം 5 മണിക്കും 8 മണിക്കും ഇടയിൽ.
• വെസ്റ്റ്ജെറ്റ് ഫ്ലൈറ്റ് 3540, കാംലൂപ്സ്, ബി.സി.യിൽ നിന്ന് കാൽഗരിയിലേക്ക്: ജൂൺ 25 ബുധനാഴ്ച (രാവിലെ 5:50 ന് പുറപ്പെട്ടു).
• വെസ്റ്റ്ജെറ്റ് ഫ്ലൈറ്റ് 630, കാൽഗരിയിൽ നിന്ന് ചാർലട്ട്ടൗണിലേക്ക്: ജൂൺ 25 ബുധനാഴ്ച (ഏകദേശം രാവിലെ 8:50 ന് പുറപ്പെട്ടു; വൈകുന്നേരം 4 മണിയോടെ ലാൻഡ് ചെയ്തു).
• ചാർലട്ട്ടൗൺ എയർപോർട്ട്: ജൂൺ 25 ബുധനാഴ്ച, വൈകുന്നേരം 4 മണിക്കും 6:30 നും ഇടയിൽ.

ഈ വിമാനങ്ങളിലോ മുകളിൽ പറഞ്ഞിട്ടുള്ള സ്ഥലങ്ങളിലോ നിർദ്ദിഷ്ട സമയങ്ങളിൽ ഉണ്ടായിരുന്നവരും, വാക്‌സിൻ എടുക്കാത്ത ഗർഭിണികളും, ഒരു വയസ്സിൽ താഴെയുള്ളവരും, രോഗപ്രതിരോധ ശേഷി കുറഞ്ഞവരും (വാക്സിൻ എടുത്തിട്ടുണ്ടെങ്കിൽ പോലും) ചീഫ് പബ്ലിക് ഹെൽത്ത് ഓഫീസുമായി ബന്ധപ്പെടണമെന്ന് ആരോഗ്യ ഉദ്യോഗസ്ഥർ അഭ്യർത്ഥിച്ചു. outbreak@ihis.org എന്ന ഇമെയിലിലോ 1-800-958-6400 എന്ന നമ്പറിലോ വിളിച്ച് പോസ്റ്റ്-എക്സ്പോഷർ ചികിത്സയ്ക്കുള്ള സൗകര്യങ്ങൾ ഒരുക്കാം. പൂർണ്ണമായ പേര്, ജനനത്തീയതി, ബന്ധപ്പെടാനുള്ള വിവരങ്ങൾ, രോഗബാധയുണ്ടായേക്കാവുന്ന സ്ഥലം എന്നിവ നൽകാൻ ആവശ്യപ്പെട്ടിട്ടുണ്ട്.

രോഗപ്രതിരോധ ശേഷിയില്ലാത്തവരും മുകളിൽ പറഞ്ഞിട്ടുള്ള ഏതെങ്കിലും സ്ഥലങ്ങളിൽ പോയിട്ടുള്ളവരും രോഗം പകരുന്ന ഘട്ടത്തിൽ പൊതു ഇടങ്ങളിൽ നിന്ന് വിട്ടുനിൽക്കണം. രോഗം ബാധിച്ച് 5 ദിവസത്തിന് ശേഷം ഈ ഒഴിവാക്കൽ കാലയളവ് ആരംഭിച്ച് 16 ദിവസത്തിന് ശേഷം അവസാനിക്കും. സ്കൂളുകൾ, ശിശു സംരക്ഷണ കേന്ദ്രങ്ങൾ, ഉന്നത വിദ്യാഭ്യാസ സ്ഥാപനങ്ങൾ, ജോലിസ്ഥലങ്ങൾ, മറ്റ് പൊതു ഇടങ്ങൾ എന്നിവ ഇതിൽ ഉൾപ്പെടുന്നു.

മീസിൽസിന്റെ ലക്ഷണങ്ങളിൽ പനി, ചുമ, കണ്ണുവേദന, തലയിൽ തുടങ്ങി ശരീരമാകെ പടരുന്ന ചുവന്ന പാടുകൾ എന്നിവ ഉൾപ്പെടുന്നു. അന്ധത, വൈറൽ മെനിഞ്ചൈറ്റിസ്, ന്യുമോണിയ തുടങ്ങിയ ഗുരുതരമായ സങ്കീർണതകൾ ഉണ്ടാകാം, ചിലപ്പോൾ മരണം വരെ സംഭവിക്കാം. അടുത്തിടെ ടെക്സാസിൽ വാക്സിൻ എടുക്കാത്ത രണ്ട് കുട്ടികൾ മരണപ്പെട്ടത് ഇതിന് ഉദാഹരണമാണ്.മീസിൽസ് രോഗമുള്ള ഒരാൾ ശ്വാസം വിടുമ്പോഴോ ചുമയ്ക്കുമ്പോഴോ തുമ്മുമ്പോഴോ സംസാരിക്കുമ്പോഴോ വായുവിലൂടെയാണ് വൈറസ് പകരുന്നത്. രോഗം ബാധിച്ച വ്യക്തിയുടെ മൂക്കിൽ നിന്നും തൊണ്ടയിൽ നിന്നുമുള്ള സ്രവങ്ങളുമായി നേരിട്ടുള്ള സമ്പർക്കത്തിലൂടെയും ഇത് പടരാം. രോഗം ബാധിച്ച ഒരാൾ ഒരു സ്ഥലം വിട്ട് പോയാലും മീസിൽസ് വൈറസിന് രണ്ട് മണിക്കൂർ വരെ വായുവിലോ പ്രതലങ്ങളിലോ നിലനിൽക്കാൻ കഴിയും. പാടുകൾ പ്രത്യക്ഷപ്പെടുന്നതിന് നാല് ദിവസം മുമ്പും പാടുകൾ പ്രത്യക്ഷപ്പെട്ടതിന് ശേഷം നാല് ദിവസം വരെയും രോഗമുള്ള ഒരാൾക്ക് രോഗം പകർത്താൻ കഴിയും.

നിങ്ങൾക്കോ നിങ്ങളുടെ കുടുംബാംഗങ്ങൾക്കോ മുകളിൽ വിവരിച്ച ലക്ഷണങ്ങൾ ഉണ്ടാവുകയാണെങ്കിൽ, പ്രത്യേകിച്ച് മുകളിൽ ലിസ്റ്റ് ചെയ്തിട്ടുള്ള സ്ഥലങ്ങളിൽ പോയി 21 ദിവസത്തിനുള്ളിലാണെങ്കിൽ, എത്രയും പെട്ടെന്ന് ഒരു ആരോഗ്യ വിദഗ്ധനെ സമീപിക്കുക. മറ്റുള്ളവരുമായി, പ്രത്യേകിച്ച് ഒരു വയസ്സിൽ താഴെയുള്ള കുട്ടികൾ, ഗർഭിണികൾ, രോഗപ്രതിരോധ ശേഷി കുറഞ്ഞവർ എന്നിവരുമായി സമ്പർക്കം ഒഴിവാക്കുക. വീട്ടിൽ നിന്ന് പുറത്ത് പോകുകയാണെങ്കിൽ മാസ്ക് ധരിക്കുക. വൈദ്യ സഹായത്തിനായി പൊതുഗതാഗതം ഉപയോഗിക്കുന്നത് ഒഴിവാക്കുക. രോഗം മറ്റുള്ളവരിലേക്ക് പടരുന്നത് തടയാൻ ആവശ്യമായ നടപടികൾ സ്വീകരിക്കുന്നതിനായി നിങ്ങളുടെ ആരോഗ്യ വിദഗ്ധനെയും ആരോഗ്യ കേന്ദ്രത്തെയും മുൻകൂട്ടി അറിയിക്കുക.