പ്രിൻസ് എഡ്വേർഡ്; പഠിക്കാൻ പോകുന്ന സ്കൂൾ കുട്ടികൾക്കും അവരെ പഠിപ്പിക്കുന്ന അധ്യാപകർക്കും ഒരുപോലെ സുരക്ഷിതമല്ലാത്ത ഒരിടമായി മാറുന്നുവോ നമ്മുടെ വിദ്യാലയങ്ങൾ? കാനഡയിലെ പ്രിൻസ് എഡ്വേർഡ് ഐലൻഡിൽ (P.E.I.) നിന്നുള്ള കാഴ്ചകൾ അല്പം ഗൗരവമുള്ളതാണ്. സ്റ്റാഫുകളുടെ കുറവും അമിതമായ ജോലിഭാരവും കാരണം ബുദ്ധിമുട്ടിലാവുന്ന അധ്യാപകരും രക്ഷിതാക്കളും ചേർന്ന് ഇവിടെ വലിയ പ്രതിഷേധത്തിലാണ്.
കഴിഞ്ഞ ദിവസം ചാർലറ്റ്ടൗണിൽ നടന്ന പി.സി. ലീഡർഷിപ്പ് ഫോറത്തിലേക്ക് പ്ലക്കാർഡുകളുമായി എത്തിയ ഡസൻകണക്കിന് ആളുകൾ ഒരേ സ്വരത്തിൽ ചോദിക്കുന്നത് ഒന്നേയുള്ളൂ: “ഞങ്ങളുടെ കുട്ടികളുടെ വിദ്യാഭ്യാസത്തിന് ഇനി ആര് കാവൽ നിൽക്കും?” പ്രധാന പ്രശ്നം ക്ലാസ് മുറികളിലെ തിരക്കാണ്. ഒരാൾക്ക് താങ്ങാവുന്നതിലും അധികം കുട്ടികളെ ഒരേസമയം നിയന്ത്രിക്കേണ്ടി വരുന്ന അവസ്ഥയാണ് നിലവിലുള്ളത്.
മുപ്പതോളം കുട്ടികളുള്ള ഒരു ക്ലാസിൽ അവരുടെ പാഠഭാഗങ്ങൾ തീർക്കുന്നതിനൊപ്പം, ഓരോ കുട്ടിയുടെയും മാനസികവും പെരുമാറ്റപരവുമായ പ്രശ്നങ്ങൾ ശ്രദ്ധിക്കാൻ ഒരു അധ്യാപികയ്ക്ക് എങ്ങനെ സാധിക്കും? പ്രത്യേക പരിഗണന അർഹിക്കുന്ന കുട്ടികൾക്ക് നൽകേണ്ട ‘എഡ്യൂക്കേഷൻ അസിസ്റ്റന്റുമാരുടെ’ (EA) കുറവ് വലിയൊരു പ്രതിസന്ധിയാണ്. ഓട്ടിസവും പ്രമേഹവും ബാധിച്ച ഒരു കുട്ടിക്ക് ലഭിക്കേണ്ട പിന്തുണ ലഭിക്കാത്തതിനാൽ മാസങ്ങളോളം സ്കൂളിൽ പോകാൻ കഴിയാത്ത സാഹചര്യം പോലും ഇവിടെയുണ്ട്.
സർക്കാർ കണക്കുകൾ പ്രകാരം ഫണ്ടിലും സ്റ്റാഫുകളുടെ എണ്ണത്തിലും വർദ്ധനവ് ഉണ്ടായിട്ടുണ്ടെന്ന് പറയുന്നുണ്ടെങ്കിലും, യാഥാർത്ഥ്യം മറ്റൊന്നാണെന്ന് യൂണിയൻ നേതാക്കൾ ചൂണ്ടിക്കാട്ടുന്നു. തുച്ഛമായ ശമ്പളവും താല്കാലിക കരാറുകളും കാരണം പലരും ഈ ജോലി ഉപേക്ഷിച്ചു പോവുകയാണ്. “മുന്നിലുള്ളത് ഒരു വലിയ മതിൽക്കെട്ടാണെന്നും അതിനോടാണ് ഞങ്ങൾ സംസാരിക്കുന്നതെന്നും” പ്രതിഷേധക്കാർ പറയുന്നു. വെറും കണക്കുകൾ നിരത്തുന്നതിന് പകരം, കുട്ടികൾക്ക് മികച്ച പിന്തുണ ഉറപ്പാക്കാനും സ്റ്റാഫുകളുടെ മാനസിക സമ്മർദ്ദം കുറയ്ക്കാനും സർക്കാർ അടിയന്തിരമായി ഇടപെടണമെന്നാണ് ഇവരുടെ ആവശ്യം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
education-system-in-crisis-parents-unions-staff-protest-pei-classroom-strain
