ഒന്റാരിയോയിൽ യുവാക്കൾക്കിടയിൽ സാമ്പത്തിക പ്രതിസന്ധി രൂക്ഷം; തൊഴിലവസരങ്ങളിൽ വൻ ഇടിവ്

ടൊറന്റോ: ഒന്റാരിയോയിൽ ഉയർന്ന ശമ്പളവും സുരക്ഷിതമായ ജോലിയുമുള്ള യുവാക്കൾ പോലും കടുത്ത സാമ്പത്തിക പ്രതിസന്ധി നേരിടുന്നതായി റിപ്പോർട്ടുകൾ വ്യക്തമാക്കുന്നു. വർഷം 90,000 ഡോളർ വരുമാനമുള്ളവർക്ക് പോലും നിത്യജീവിതം മുൻപോട്ടു കൊണ്ടുപോകാൻ പ്രയാസപ്പെടേണ്ടി വരുന്ന സാഹചര്യമാണുള്ളതെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു. വരുമാനത്തിന്റെ വലിയൊരു ഭാഗം നികുതിക്കും വാടകയ്ക്കും ദൈനംദിന ആവശ്യങ്ങൾക്കുമായി ചെലവാകുന്നതിനാൽ വീട് വാങ്ങുക എന്നത് അപ്രാപ്യമായ സ്വപ്നമായി മാറുന്നുവെന്ന് ടൊറന്റോയിലെ ആരോഗ്യപ്രവർത്തകർ ഉൾപ്പെടെയുള്ളവർ സാക്ഷ്യപ്പെടുത്തുന്നു.

ജനുവരി മാസത്തിൽ ഒന്റാറിയോയിൽ 67,000 തൊഴിലവസരങ്ങൾ കുറഞ്ഞതായാണ് സ്റ്റാറ്റിസ്റ്റിക്സ് കാനഡയുടെ കണക്കുകൾ വ്യക്തമാക്കുന്നത്. 15 മുതൽ 24 വയസ്സുവരെയുള്ള യുവാക്കളുടെ തൊഴിൽ പങ്കാളിത്ത നിരക്കിലും വലിയ കുറവുണ്ടായിട്ടുണ്ട്. വിദ്യാഭ്യാസവും മികച്ച ജോലിയുമുണ്ടെങ്കിൽ സാമ്പത്തിക ഭദ്രത ഉറപ്പാക്കാമെന്ന പഴയ ധാരണകൾ നിലവിലെ സാഹചര്യത്തിൽ മാറിക്കൊണ്ടിരിക്കുകയാണെന്ന് ഈ രംഗത്തെ വിദഗ്ധർ വിലയിരുത്തുന്നു. പല യുവാക്കളും നിലവിൽ മാതാപിതാക്കൾക്കൊപ്പമാണ് താമസിക്കുന്നത്.

ഭവനവിലയും ദൈനംദിന ചെലവുകളുമാണ് യുവാക്കളുടെ സമ്പാദ്യത്തിന് പ്രധാന തടസ്സമെന്ന് ആർബിസി (RBC) നടത്തിയ സർവേയിൽ വ്യക്തമാക്കുന്നു. സർവേയിൽ പങ്കെടുത്ത 66 ശതമാനം ഒന്റാരിയോ നിവാസികളും ഭവനലഭ്യത ഒരു വലിയ വെല്ലുവിളിയായി ചൂണ്ടിക്കാട്ടി. ടൊറന്റോയിൽ ശരാശരി വീട് വില 9,73,289 ഡോളറായി താഴ്ന്നെങ്കിലും, സാധാരണക്കാരായ യുവാക്കൾക്ക് ഇത് ഇപ്പോഴും താങ്ങാനാവുന്ന പരിധിക്ക് പുറത്താണെന്ന് വിദഗ്ധനായ ഷോൺ കൂപ്പർ വ്യക്തമാക്കി.

സാമൂഹിക മാധ്യമങ്ങളിലൂടെയുള്ള ആഡംബര പ്രദർശനങ്ങൾ യുവാക്കളിൽ മാനസിക സമ്മർദ്ദം വർദ്ധിപ്പിക്കുന്നതായി സാമ്പത്തിക ആസൂത്രകയായ ജെസീക്ക മൂർഹൗസ് അഭിപ്രായപ്പെട്ടു. തങ്ങളുടെ പ്രായത്തിലുള്ള മറ്റുള്ളവർ വലിയ സാമ്പത്തിക നേട്ടങ്ങൾ കൈവരിക്കുന്നു എന്ന തോന്നൽ മികച്ച രീതിയിൽ ജോലി ചെയ്യുന്നവർക്ക് പോലും അപകർഷതാബോധം ഉണ്ടാക്കുന്നു. അതിനാൽ ഇരുപതുകളിൽ തന്നെ സാമ്പത്തിക ആസൂത്രണത്തെക്കുറിച്ച് ഗൗരവമായി ചിന്തിക്കേണ്ട അവസ്ഥയിലാണ് ഇന്നത്തെ തലമുറയെന്ന് അവർ കൂട്ടിച്ചേർത്തു.

തൊഴിൽ വിപണിയിലെ കടുത്ത മത്സരവും സാങ്കേതിക വിദ്യയിലെ മാറ്റങ്ങളും യുവാക്കളെ ബാധിക്കുന്നുണ്ട്. AI പോലുള്ള സാങ്കേതിക വിദ്യകളുടെ കടന്നുവരവ് കൺസൾട്ടിംഗ് ഉൾപ്പെടെയുള്ള മേഖലകളിൽ തൊഴിൽ നഷ്ടത്തിന് കാരണമാകുന്നതായി ഉദ്യോഗാർത്ഥികൾ പരാതിപ്പെടുന്നു. നിലവിലെ പ്രതിസന്ധി മറികടക്കാൻ കൃത്യമായ ബജറ്റിംഗും സാമ്പത്തിക അച്ചടക്കവും അനിവാര്യമാണെന്നും യുവാക്കൾക്ക് കൂടുതൽ പിന്തുണ ആവശ്യമാണെന്നും വിദഗ്ധർ വിലയിരുത്തുന്നു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Economic crisis deepens among youth in Ontario; job opportunities plummet