കാൽഗറി ട്രാൻസിറ്റ് തങ്ങളുടെ സി-ട്രെയിൻ സർവീസിനായി പുതിയ ഇലക്ട്രോണിക് ഫെയർ വാലിഡേഷൻ സംവിധാനം ഔദ്യോഗികമായി പുറത്തിറക്കി. ഇതനുസരിച്ച് എല്ലാ യാത്രക്കാരും ട്രെയിനിൽ കയറുന്നതിന് മുൻപ് അവരുടെ മൊബൈൽ ടിക്കറ്റുകൾ സ്കാൻ ചെയ്യുന്നത് നിർബന്ധമാക്കിയിട്ടുണ്ട്. ബുധനാഴ്ച മുതൽ പ്രാബല്യത്തിൽ വന്ന ഈ മാറ്റം, കാൽഗറി ട്രാൻസിറ്റ് ബസ്സുകളിൽ ഇപ്പോൾ പ്രാബല്യത്തിലുള്ള ടിക്കറ്റ് നിയമങ്ങൾ സി-ട്രെയിനിലും ബാധകമാക്കും.
നഗരത്തിൽ നടത്തിയ പഠനത്തിൽ 46% മുതിർന്ന യാത്രക്കാരും 50% യുവജനങ്ങളും ടിക്കറ്റുകൾ ശരിയായി വാലിഡേറ്റ് ചെയ്യുന്നില്ലെന്നും ചിലർ ടിക്കറ്റ് എടുക്കുന്നില്ലെന്നും കണ്ടെത്തിയതിനെ തുടർന്നാണ് ഈ നടപടി. പുതിയ സംവിധാനം ടിക്കറ്റ് വെട്ടിപ്പ് തടയാനും കാര്യങ്ങൾ കൂടുതൽ സുതാര്യമാക്കാനും സഹായിക്കുമെന്ന് ട്രാൻസിറ്റ് അധികൃതർ പറയുന്നു.
ഇലക്ട്രോണിക് മൊബൈൽ ടിക്കറ്റുകൾ 2020-ൽ കാൽഗറിയിൽ ആദ്യമായി അവതരിപ്പിച്ചെങ്കിലും, സി-ട്രെയിനുകളിലെ സ്കാനിംഗ് നിർബന്ധമാക്കിയത് അടുത്തിടെയാണ്. ഇത് നിയമം കൂടുതൽ കർശനമാക്കാനും ഫെയർ സംവിധാനം ആധുനികവൽക്കരിക്കാനും ലക്ഷ്യമിടുന്നു. യാത്രക്കാർ ഇപ്പോൾ അവരുടെ ആക്ടിവേറ്റ് ചെയ്ത മൊബൈൽ ടിക്കറ്റുകൾ ട്രെയിനിൽ പ്രവേശിക്കുന്നതിന് മുൻപ് ഇലക്ട്രോണിക് വാലിഡേറ്ററുകളിൽ കാണിക്കണം.
പുതിയ നിയമങ്ങളുമായി പൊരുത്തപ്പെടാൻ പൊതുജനങ്ങൾക്ക് സമയം നൽകുന്നതിനായി കാൽഗറി ട്രാൻസിറ്റ് ഒരു താൽക്കാലിക ഗ്രേസ് പിരീഡ് നടപ്പാക്കിയിട്ടുണ്ട്.”ഈ സംവിധാനം എങ്ങനെ ഉപയോഗിക്കണമെന്ന് പൊതുജനങ്ങൾക്ക് മനസ്സിലായെന്ന് ഉറപ്പാക്കിയാൽ, ഞങ്ങൾ എൻഫോഴ്സ്മെന്റ് ഘടകങ്ങളുമായി മുന്നോട്ട് പോകും. നെറ്റ്വർക്കിലുടനീളം കൂടുതൽ സ്ഥിരതയുള്ളതും ഉത്തരവാദിത്തമുള്ളതുമായ ഫെയർ ഉപയോഗം ഉറപ്പാക്കുകയും മൊത്തത്തിലുള്ള ട്രാൻസിറ്റ് അനുഭവം മെച്ചപ്പെടുത്തുകയുമാണ് പ്രധാന ഉദ്ദേശം,” സിറ്റി ഓഫ് കാൽഗറിയുടെ പബ്ലിക് വെഹിക്കിൾ സ്റ്റാൻഡേർഡ്സ് വിഭാഗം മേധാവി മാർഷ ഗോണ്ടർ പറഞ്ഞു.
