റെജീനയുടെ വടക്കുകിഴക്കൻ വ്യാവസായിക മേഖലയിൽ മൃതദേഹം കണ്ടെത്തിയ സംഭവത്തിൽ റെജീന പോലീസ് സർവീസ് (ആർ.പി.എസ്) അന്വേഷണം ആരംഭിച്ചു. ഇന്നലെ (ജൂലൈ 14) രാത്രി എട്ട് മണിയോടെ നാലാം അവന്യൂവിലെ 3000 ബ്ലോക്കിൽ നിന്നാണ് പോലീസ് സംഘം മൃതദേഹം കണ്ടെത്തിയത്. തുടർന്ന് നടത്തിയ പരിശോധനയിൽ പുരുഷൻ്റെ മൃതദേഹമാണെന്ന് തിരിച്ചറിയുകയായിരുന്നു.
സംഭവസ്ഥലം ഉടനടി പോലീസ് നിയന്ത്രണത്തിലാക്കുകയും, ആർ.പി.എസ്സിന്റെ പ്രധാന ക്രൈം യൂണിറ്റും ഫോറൻസിക് ഐഡൻ്റിഫിക്കേഷൻ യൂണിറ്റും സ്ഥലത്ത് എത്തി പരിശോധനകൾ നടത്തുകയും ചെയ്തു. മരിച്ചയാളെ കുറിച്ചോ സംഭവത്തെക്കുറിച്ചുള്ള കൂടുതൽ വിശദാംശങ്ങൾ ഈ ഘട്ടത്തിൽ പുറത്തുവിടില്ലെന്ന് റെജീന പോലീസ് അറിയിച്ചു. നിലവിൽ, സാസ്കച്ചെവാൻ കൊറോണേഴ്സ് സർവീസുമായി സഹകരിച്ചാണ് അന്വേഷണം പുരോഗമിക്കുന്നത്. ഈ സംഭവത്തെക്കുറിച്ച് എന്തെങ്കിലും വിവരങ്ങൾ അറിയാമെങ്കിൽ റെജീന പോലീസുമായി നേരിട്ടോ അല്ലെങ്കിൽ സാസ്കച്ചെവാൻ ക്രൈം സ്റ്റോപ്പേഴ്സിനെ രഹസ്യമായോ അറിയിക്കണമെന്ന് അധികൃതർ അഭ്യർത്ഥിച്ചു.
