ഒന്റാറിയോ 2025 ബജറ്റിൽ ലേക്ക്റിഡ്ജ് ഹെൽത്തിൽ പുതിയ മാനസികാരോഗ്യ-ലഹരി ചികിത്സാ അടിയന്തിര വിഭാഗം ആരംഭിക്കാൻ ആവശ്യമായ ഫണ്ട് ഉൾപെടുത്താതിരുന്നതിൽ ഒഷാവയിലെ മേയർ ഡാൻ കാർട്ടർ കടുത്ത നിരാശ പ്രകടിപ്പിച്ചു. സ്വയം ലഹരി വിമുക്തനായ കാർട്ടർ, തന്റെ വ്യക്തിഗത അനുഭവം അടിസ്ഥാനംവച്ച്, നഗരത്തിൽ ഇത്തരം ചികിത്സാ സൗകര്യങ്ങളുടെ അത്യാവശ്യകതയെക്കുറിച്ച് Premier ഡഗ് ഫോർഡ് അടക്കം നിരവധി ഉന്നത പദവികളിലെ പ്രതിനിധികളെ സമീപിച്ചിരുന്നുവെന്നും വ്യക്തമാക്കി.350-ലധികം അമിത ലഹരി ഉപയോഗ കേസുകൾ കഴിഞ്ഞ വർഷം ഒഷാവയിൽ രേഖപ്പെടുത്തിയതായും, നഗരത്തിന് അതിനുള്ള മതിയായ വിഭവങ്ങളോ സൗകര്യങ്ങളോ നിലവിലില്ലെന്നും മേയർ ചൂണ്ടിക്കാട്ടി.
സംസ്ഥാന സർക്കാർ 28 HART (ആരോഗ്യ-ലഹരി പുനരധിവാസ ചികിത്സാ) കേന്ദ്രങ്ങൾക്കായി 550 മില്യൺ ഡോളർ നീക്കിവെച്ചിട്ടുണ്ടെങ്കിലും, ഒഷാവയിൽ രണ്ടെണ്ണം ഉൾപ്പെടെ, ഇവ പ്രധാനമായും പുനരധിവാസത്തിൽ കേന്ദ്രീകരിക്കുന്നുവെന്നും അടിയന്തിര വിഭാഗം നൽകുന്ന തൽക്ഷണ പ്രതിസന്ധി ഇടപെടൽ നൽകുന്നില്ലെന്നും കാർട്ടർ വാദിക്കുന്നു. പദ്ധതിക്കാവശ്യമായ 40 മില്യൺ ഡോളർ അനുവദിക്കാൻ പ്രീമിയർ ഡഗ് ഫോർഡിനോട് മേയർ തുടർന്നും അഭ്യർത്ഥിച്ചു.
പ്രാദേശിക MPമാരും ധനമന്ത്രി പീറ്റർ ബെത്ലെൻഫല്വി പോലും ഈ ഫണ്ടിംഗ് അഭ്യർത്ഥനയെ പിന്തുണച്ചിരുന്നതായി റിപ്പോർട്ടുകൾ സൂചിപ്പിക്കുന്നു. അതിനാൽ തന്നെ ബജറ്റിൽ ഇതിന്റെ അഭാവം നഗര ഉദ്യോഗസ്ഥർക്ക് പ്രത്യേകിച്ച് നിരാശാജനകമാണ്. വാർഡ് 5 കൗൺസിലർ ബ്രയാൻ നിക്കോൾസൺ പൊതുസ്ഥലങ്ങളിൽ വർധിച്ചുവരുന്ന ലഹരി ഉപയോഗത്തെക്കുറിച്ച് ആശങ്ക പ്രകടിപ്പിക്കുകയും, നഗരത്തിൽ മേൽനോട്ടത്തിലുള്ള ലഹരി ഉപയോഗ കേന്ദ്രങ്ങൾ നിരസിച്ച മുൻകാല തീരുമാനങ്ങളെ വിമർശിക്കുകയും ചെയ്തു.
