എഡ്മന്റൺ: കാനഡയിൽ നിന്നും ആൽബർട്ട പ്രവിശ്യ വേർപെടുന്നത് സംബന്ധിച്ച റഫറണ്ടത്തിനായി ഒപ്പുകൾ ശേഖരിക്കാനുള്ള നീക്കം എഡ്മന്റൺ കോടതി താൽക്കാലികമായി തടഞ്ഞു. ഫസ്റ്റ് നേഷൻസ് സംഘടനകൾ നൽകിയ ഹർജി പരിഗണിച്ച ജഡ്ജി ഷൈന ലിയോണാർഡ്, ഒപ്പുശേഖരണ നടപടികൾക്ക് ഒരു മാസത്തെ സ്റ്റേ അനുവദിച്ചു. നിലവിലുള്ള കരാറുകൾ ലംഘിക്കപ്പെടുമെന്ന സ്വദേശി വിഭാഗങ്ങളുടെ വാദം മുൻനിർത്തിയാണ് കോടതിയുടെ ഈ അടിയന്തര ഇടപെടൽ.
ആൽബർട്ട സ്വതന്ത്ര രാഷ്ട്രമായാൽ ഫസ്റ്റ് നേഷൻസ് വിഭാഗങ്ങളുമായി നിലവിലുള്ള ഉടമ്പടികൾ (Treaties) തകരുമെന്ന് സ്റ്റർജൻ ലേക്ക് ക്രീ നേഷൻ ഉൾപ്പെടെയുള്ള സംഘടനകൾ കോടതിയിൽ വാദിച്ചു. പുതിയ അന്താരാഷ്ട്ര അതിർത്തി വരുന്നതോടെ തങ്ങളുടെ പരമ്പരാഗത വേട്ടയാടൽ, മത്സ്യബന്ധന അവകാശങ്ങൾ തടസ്സപ്പെടുമെന്നും ഇത് ഭരണഘടനാപരമായ ലംഘനമാണെന്നും ഇവർ ചൂണ്ടിക്കാട്ടി. ഇതോടെ ഏകദേശം 1,77,800-ലധികം ഒപ്പുകൾ ശേഖരിച്ചതായി അവകാശപ്പെടുന്ന ‘സ്റ്റേ ഫ്രീ ആൽബർട്ട’ എന്ന ഗ്രൂപ്പിന്റെ പ്രവർത്തനങ്ങൾ പ്രതിസന്ധിയിലായി.
അതേസമയം, വോട്ടെടുപ്പിനായുള്ള ഒപ്പുശേഖരണം ആരുടെയും അവകാശങ്ങളെ ബാധിക്കില്ലെന്നാണ് സർക്കാർ അഭിഭാഷകരും വിഭജന അനുകൂലികളും കോടതിയെ അറിയിച്ചത്. എന്നാൽ, ഫസ്റ്റ് നേഷൻസ് വിഭാഗങ്ങളുടെ സമ്മതമില്ലാതെ പ്രവിശ്യയുടെ അതിർത്തികളിൽ മാറ്റം വരുത്തുന്നത് പ്രായോഗികമല്ലെന്ന് ഭരണഘടനാ വിദഗ്ധർ വിലയിരുത്തുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Court temporarily blocks Alberta's separation; First Nations say move to secede violates treaty; Final ruling soon
