ഒട്ടാവ: ഗ്ലീബിലെ ബാങ്ക് സ്ട്രീറ്റിൽ നിലവിലുള്ള ഗതാഗത പരിഷ്കരണങ്ങളുടെ ഭാഗമായി കൂടുതൽ ബസ് ലെയ്നുകൾ അനുവദിക്കണമെന്ന് ആവശ്യപ്പെട്ട് ഒട്ടാവ സെൻട്രിടൗൺ കമ്മ്യൂണിറ്റി അസോസിയേഷൻ. നഗരസഭാ അധികൃതർക്ക് നൽകിയ കത്തിലാണ് ഒട്ടാവയിലെ പ്രധാന പാതകളിലൊന്നായ ഇവിടെ പൊതുഗതാഗതത്തിന് കൂടുതൽ മുൻഗണന നൽകണമെന്ന് സംഘടന ആവശ്യപ്പെട്ടത്. നിലവിൽ ഹൈവേ 417 മുതൽ റിഡോ കനാൽ വരെയുള്ള ഭാഗങ്ങളിൽ ഗതാഗതക്ഷമത വർധിപ്പിക്കുന്നതിനായി നഗരസഭ പ്രത്യേക പഠനം നടത്തിവരികയാണ്.
ബാങ്ക് സ്ട്രീറ്റിലൂടെ കടന്നുപോകുന്ന ഒസി ട്രാൻസ്പോ ബസ് സർവീസുകൾ നേരിടുന്ന കാലതാമസവും റദ്ദാക്കലുകളും പരിഹരിക്കാൻ പ്രത്യേക ലെയ്നുകൾ അനിവാര്യമാണെന്ന് അസോസിയേഷൻ ചൂണ്ടിക്കാട്ടുന്നു. തിരക്കേറിയ സമയങ്ങളിൽ രാവിലെ വടക്കോട്ടും വൈകുന്നേരം തെക്കോട്ടും ബസ് ലെയ്നുകൾ അനുവദിക്കാനാണ് നഗരസഭയുടെ പ്രാഥമിക നിർദേശം. എന്നാൽ, ലാൻസ്ഡൗൺ പാർക്കിലെ കായിക മത്സരങ്ങൾ ഉൾപ്പെടെയുള്ള വലിയ പരിപാടികൾ നടക്കുമ്പോഴും, തിരക്കുള്ള മറ്റ് സമയങ്ങളിലും ഇരുവശങ്ങളിലേക്കും ബസ് ലെയ്ൻ സൗകര്യം വേണമെന്നാണ് അസോസിയേഷന്റെ പ്രധാന ആവശ്യം.
ബസ് ലെയ്നുകൾ നടപ്പിലാക്കുന്നത് യാത്രാസമയം ലാഭിക്കാനും കൂടുതൽ ആളുകളെ പൊതുഗതാഗതത്തിലേക്ക് ആകർഷിക്കാനും സഹായിക്കുമെന്ന് അസോസിയേഷൻ പ്രസിഡന്റ് റോബർട്ട് ഡെക്കർ പറഞ്ഞു. 24 മണിക്കൂറും ബസ് ലെയ്ൻ പ്രവർത്തിക്കുന്ന മേഖലകൾ വർധിപ്പിക്കുക, ട്രാൻസിറ്റ് പ്രിയോറിറ്റി സിഗ്നലുകൾ സ്ഥാപിക്കുക തുടങ്ങിയ നിർദേശങ്ങളും ഇതോടൊപ്പം സമർപ്പിച്ചിട്ടുണ്ട്. പൊതുജനങ്ങളിൽ നിന്നുള്ള അഭിപ്രായങ്ങൾ കൂടി പരിഗണിച്ച ശേഷമുള്ള അന്തിമ റിപ്പോർട്ട് നഗരസഭയുടെ പബ്ലിക് വർക്സ് ആൻഡ് ഇൻഫ്രാസ്ട്രക്ചർ കമ്മിറ്റിക്ക് കൈമാറും.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Community association writes to municipality demanding more bus lanes on Bank Street
